ႁႅင်းၵၢၼ်မိူင်းမၢၼ်ႈ ၸိူဝ်းၵႂႃႇမီးတီႈမိူင်းမလေးသျႃး(Malaysia) ၺႃးၸဝ်ႈၼႃႈတီႈ ၵူတ်ႇထတ်းတီႉၺွပ်း ၼႂ်းၶၢဝ်းတၢင်းၼိုင်ႈဝူင်ႈ မီးၸမ် 300 ၵေႃႉ ၸိူဝ်းၶဝ်မႆႈၸႂ် ၵူဝ်သူင်ႇမႃးၶိုၼ်းမိူင်းမၢၼ်ႈ ဝႃႈၼႆ။
ၼႂ်းႁူဝ်လိူၼ်ၼႆႉ ၸဝ်ႈၼႃႈတီႈ မိူင်းမလေးသျႃး တမ်းၽႅၼ်ၵၢၼ် ဢေႃႇပရႃႊၸီႊသေ ၵူတ်ႇထတ်းတီႉ ၺွပ်းႁႅင်းၵၢၼ် ၸိူဝ်းဢမ်ႇမီးဝတ်းဝႂ် ၵူႈဝၼ်း၊ ႁႅင်းၵၢၼ်မိူင်းမၢၼ်ႈ ၺႃးတီႉၺွပ်း မီးၼႂ်းၵႄႈ 200 – 300 ၊ ၸိူဝ်းဢမ်ႇလႆႈႁူႉၶၢဝ်ႇၵေႃႈ ၸၢင်ႈမီးထႅင်ႈတင်းၼမ်ၼႆ ႁႅင်းၵၢၼ် ၼၢင်းယိင်း ဢၼ်ယူႇသဝ်းဝႆႉတီႈဝဵင်း ၵႂႃႊလႃႊလၼ်ႊပူႊ (Kuala Lumpur) လၢတ်ႈ။
ဢိင်ၼိူဝ်လွင်ႈၼႆႉ မၼ်းၼၢင်းပၼ်တၢင်းၶႆႈၸႂ်ဝႆႉဝႃႈ ထုၵ်ႇလီငိူင်ႉဝႄႈ ဢွင်ႈတီႈၵူၼ်းၼွၵ်ႈမိူင်းၵႂႃႇမႃး ၼမ်၊ ပေႃးဢမ်ႇမီးဝတ်းဝႂ်တဵမ်ၵေႃႈ ႁႂ်ႈၾၢင်ႉၵၼ်ယူႇသဝ်း ဝႃႈၼႆ။
မိူဝ်ႈဝၼ်းတီႈ 5 ပူၼ်ႉမႃးၼႆႉ ၸဝ်ႈၼႃႈတီႈ မလေးသျႃး ၶဝ်ႈၵူတ်ႇထတ်း တီႈဝဵင်းၸရိၼ်ႊပၢၼ်ႊ (Seri bang) လႄႈ ဢိၵ်ႇထႅင်ႈလၢႆလၢႆတီႈ တီႉၺွပ်းလႆႈႁႅင်းၵၢၼ်ဢမ်ႇမီးဝတ်းဝႂ် 600 ပၢႆ ၼႂ်းၼၼ်ႉ ႁႅင်းၵၢၼ် မိူင်းမၢၼ်ႈ ၺႃးတီႉၺွပ်းပႃး 86 ၵေႃႉ၊ ၽွင်းၸဝ်ႈၼႃႈတီႈ ၶဝ်ႈၵူတ်ႇထတ်း ယူႇၼၼ်ႉ ႁႅင်းၵၢၼ်ၼၢင်း ယိင်းမိူင်းမၢၼ်ႈ ၵေႃႉၼိုင်ႈ လႅၼ်ႈပၢႆႈ ၺႃးရူတ်ႉၾႆးၽႃႇသေတၢႆထင်တီႈ။ လိူဝ်ၼၼ်ႉ ၼႂ်းဝၼ်းတီႈ 6 – 7 ၼႆႉၵေႃႈ ႁႅင်းၵၢၼ်မိူင်းမၢၼ်ႈ ၺႃးတီႉၺွပ်းထႅင်ႈ 70 ပၢႆ။ ယၢမ်းလဵဝ် ၺႃးၵုမ်းတူဝ်ဝႆႉ ဝႃႈၼႆ။
ဝၢႆးလင် သိုၵ်းမၢၼ်ႈ ယိုတ်းမိူင်း ႁႅင်းၵၢၼ်မိူင်းမၢၼ်ႈ ၸိူဝ်းၵႂႃႇမီးတီႈမိူင်းမလေးသျႃး တိူဝ်းၼမ်မႃးယူႇ ၵူႈ ဝၼ်း၊ ၸွမ်းၼင်ႇ လုမ်း UNHCR တီႈမိူင်းလေးသျႃး ၵဵပ်းသဵၼ်ႈမၢႆႁၢႆးငၢၼ်းဝႆႉ မိူဝ်ႈလိူၼ်ဢေႃႊၵတ်ႊသ် ပူၼ်ႉမႃးၼၼ်ႉ လုၵ်ႉတီႈမိူင်းမလေးသျႃးသေ တၢင်ႇယွၼ်းသုၼ်ႇယူႇသဝ်းၼႆႉ မီးၸမ် 2 သႅၼ်ၵေႃႉ ၼႂ်း ၼၼ်ႉ မွၵ်ႈ 170,000 (သႅၼ်ၸဵတ်းမိုၼ်ႇ) ပဵၼ်ၵူၼ်းမိူင်းမၢၼ်ႈ – သိုဝ်ႇၶၢဝ်ႇ RFA ဢွၵ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ