သိုၵ်းမၢၼ်ႈ တင်ႈၵဵတ်ႉလၢၼ်ႇ တီႈဝဵင်းသီႇသႅင်ႇ ၸိုင်ႈတႆးပွတ်းၸၢၼ်း ၵူတ်ႇထတ်းၶူဝ်းၵုၼ်ႇသေ ယိုတ်းၶဝ်ႈၼမ်ႉတၢင်းၵိၼ် ၸိူဝ်းတၢင်ႇၵႂႃႇမႃး တႃႇၵႃႉၶၢႆလႄႈ တႃႇၵိၼ်ယႅမ်ႉ။
ႁၢင်လိူၼ်သႅပ်ႊထႅမ်ႊပိူဝ်ႊပူၼ်ႉမႃးၼႆႉ သိုၵ်းမၢၼ်ႈ ပႂ်ႉၵူတ်ႇထတ်းတၢင်းၶဝ်ႈဢွၵ်ႇဝဵင်း ႁၢဝ်ႈႁႅင်းသေ ပေႃးပဵၼ်ရူတ်ႉ ဢၼ်တၢင်ႇ မၢၵ်ႇၶဝ်ႈတဝ်ႈၼမ်ႉမႃးၼမ် ၺႃးထဵတ်ႈထၢမ်တႂ်ႈတႂ်ႈၼိူဝ်ၼိူဝ်ယဝ်ႉ ယိုတ်းဝႆႉ ၶူဝ်းၵုၼ်ႇဢမ်ႇပၼ်ဢဝ်ၵႂႃႇ၊ တီႉဝႆႉပႃးၸဝ်ႈၵႃးထႅင်ႈ လူးၵွၼ်ႇ – ဝႃႈၼႆ။
ၼၢင်းယိင်း ၵူၼ်းပိုၼ်ႉတီႈ လၢတ်ႈၽူႈတွႆႇႁွၵ်ႈဝႃႈ -“သိုၵ်းမၢၼ်ႈ တီႉၸဵမ်ၶူဝ်းၵုၼ်ႇ ဢၼ်လုၵ်ႉတၢင်ႇတီႈ ၶဝ်ႈဝဵင်းမႃးလႄႈ ဢၼ်တေသိုဝ်ႉမိူဝ်းဝၢၼ်ႈယဝ်ႉၶႃႈ။ ၸဝ်ႈႁၢၼ်ႉၶၢႆၶူဝ်းၵုၼ်ႇ တီႈဝၢၼ်ႈတီႈဝဵင်းတႄႉ ယၢပ်ႇၸႂ်ယဝ်ႉ။ ၶဝ်ဢမ်ႇပၼ်ဢဝ်ၶူဝ်းၵုၼ်ႇမႃးၶၢႆၼႂ်းၵၢတ်ႇ။ ၵူၼ်းဝၢၼ်ႈၸိူဝ်းမႃးသိုဝ်ႉၶူဝ်း တီႈဝဵင်းတႃႇ မိူဝ်းၶၢႆၶိုၼ်းတီႈဝၢၼ်ႈၵေႃႈယၢပ်ႇၽိုတ်ႇ ဢေႃႈ။ ထုၵ်ႇႁွင်ႉၵူတ်ႇထတ်းသေ ယိုတ်းဝႆႉၶူဝ်းၶွင်။ ၵူၼ်းတေႃႉ ၶူဝ်းၵေႃႈ ၶဝ်ႁွင်ႉၵူတ်ႇထတ်းၵုမ်းၶင်ဝႆႉၶိုၼ်းၼိုင်ႈယဝ်ႉၸင်ႇပွႆႇမိူဝ်း။ ၶဝ်ၵူဝ်ပိူၼ်ႈ ဢဝ်ၶူဝ်းၸိူဝ်းၼၼ်ႉ ၵႂႃႇၸွႆႈ PDF ၶႃႈယူဝ်ႉ”- ဝႃႈၼႆ။
ၵူၼ်းမိူင်းဝဵင်းသီႇသႅင်ႇ ဢၼ်လႆႈပၢႆႈၽေးသိုၵ်းဝႆႉၼၼ်ႉ ယၢမ်းလဵဝ် ဢွၼ်ၵၼ် ပွၵ်ႈမႃးယူႇၶိုၼ်း တီႈႁိူၼ်းၽႂ်မၼ်း ၶိုင်ႈပၢႆယဝ်ႉ။
ၵူၼ်းမိူင်းဝဵင်းသီႇသႅင်ႇၼႆႉ ထူပ်းၽေးပၢင်တိုၵ်းသိုၵ်းသိူဝ် ၵူၺ်းဢမ်ႇၵႃး ထူပ်းပႃးၽေးၼမ်ႉထႅင်ႈလႄႈ ယၢမ်းလဵဝ် ပဵၼ်ဢၼ်ႁႃၵိၼ်လဵင်ႉတွင်ႉယၢပ်ႇ ၽိုတ်ႇၵိၼ်းၸႂ်။ တေၸႂ်ယႂ်ႇတီႈၸုမ်းၸဝ်ႈတႃႇၼ ၸုမ်း ၸွႆႈထႅမ်ၵေႃႈ သိုၵ်းမၢၼ်ႈသမ်ႉ ၵူတ်ႇထတ်းထဵတ်ႈထၢမ် ႁၢမ်ႈႁႄႉဢမ်ႇပၼ်တေႃႉသူင်ႇၶူဝ်းၶွင်။ ပဵၼ် ဢၼ်ယၢပ်ႇၽိုတ်ႇတႄႉ ဝႃႈၼႆ။
ယွၼ်ႉသိုၵ်းမၢၼ်ႈ ၵူတ်ႇထတ်းႁၢမ်ႈႁႄႉ ၵၢၼ်တေႃႉသူင်ႇၶူဝ်းၶၢႆ ၸိူဝ်းၼႆႉလႄႈ ယၢမ်းလဵဝ် တီႈတၢင်းဝၢၼ်ႈဢၼ်မီးၵႆဝဵင်းသီႇသႅင် လႆႈထူပ်းၵိၼ်း ၶဝ်ႈၼမ်ႉတၢင်းၵိၼ် ဢမ်ႇၵုမ်ႇထူမ်ႈဝႆႉ ဝႃႈၼႆ။
ၼၢင်းယိင်း ဢၼ်ယူႇၸမ်ဝဵင်းသီႇသႅင်ႇ လၢတ်ႈၽူႈတွႆႇႁွၵ်ႈဝႃႈ -“တၢင်းဝၢၼ်ႈတႄႉ ပေႃးၶၢဝ်းမၢၵ်ႇ ၶဝ်ႈတဝ်ႈၼမ်ႉၼႂ်းသူၼ်ဢွၵ်ႇၵေႃႈ လူဝ်ႇဢဝ်မႃးၶၢႆၼႂ်းဝဵင်း။ ပေႃးယဝ်ႉၶိုၼ်း သိုဝ်ႉၵုၼ်ႇႁႅင်ႈၼႂ်းဝဵင်းမိူဝ်းဝႆႉၵိၼ်။ ၵမ်ႈၽွင်ႈ သိုပ်ႇမိူဝ်းၶၢႆ။ ပေႃးမိူၼ်တေႃႈလဵဝ် ဢမ်ႇၸၢင်ႈသိုဝ်ႉၶၢႆၶူဝ်းၶွင်သင်။ တူဝ်ၵႂႃႇသိုဝ်ႉၵူၺ်းၵေႃႈ ဢမ်ႇလႆႈ ၾၢၵ်ႇပိူၼ်ႈၵႂႃႇသိုဝ်ႉပၼ်ၵေႃႈ ၽႂ်ဢမ်ႇၶႂ်ႈသိုဝ်ႉပၼ်ယဝ်ႉ”- ဝႃႈၼႆ။
ၼွၵ်ႈလိူဝ် ႁႃၵိၼ်လဵင်ႉတွင်ႉယၢပ်ႇယဝ်ႉ တီႈဝဵင်းသီႇသႅင်ႇၼႆႉ ယၢမ်းလဵဝ် ႁိူၼ်းဢၼ် ဢမ်ႇမီးလုၵ်ႈလၢင်း ၶဝ်ႈႁၢပ်ႇ ၵၢၼ်သိုၵ်းၼၼ်ႉသမ်ႉ ပျီႇတူႉၸိတ်ႉပဢူဝ်း PNO လူင်းပိုၼ်ႉတီႈ ၵဵပ်းငိုၼ်းၼိုင်ႈႁိူၼ်း 13 သႅၼ် ပျႃး။ ရူတ်ႉၵႃး ဢၼ်တေလတ်းၵႂႃႇမႃး ၼႂ်းဝဵင်းသီႇသႅင်ႇၵေႃႈ ပေႃးၶႂ်ႈလွတ်ႈၽေး တေလႆႈယွၼ်းဝႂ်ၶႂၢင်ႉဢၼုၺၢတ်ႈ တီႈၸုမ်းပျီႇတူႉၸိတ်ႉလႄႈ ၸုမ်းသိုၵ်းမၢၼ်ႈ။ ႁဵတ်းႁႂ်ႈၸဝ်ႈရူတ်ႉၸဝ်ႈၵႃး ၼႂ်းပိုၼ်ႉတီႈ ပဵၼ် ဢၼ်ယၢပ်ႇၽိုတ်ႇၶွင်ႉၶမ် တႃႇႁဵတ်းၵၢၼ်ႁႃ ၵိၼ်လဵင်ႉတွင်ႉ။
တႅမ်ႈ – ယိင်းသဵဝ်ႈၶၢဝ် (ၽူႈတွႆႇႁွၵ်ႈ)
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ