ဝၼ်းတီႈ 09/10/2024 မိူဝ်ႈၼႆႉ ယၢမ်းၵၢင်ၼႂ်ၸဝ်ႉ 2:25 မူင်း ၶိူင်ႈမိၼ်သိုၵ်းမၢၼ်ႈ မႃးပွႆႇမၢၵ်ႇတူၵ်းသႂ်ႇတီႈ ႁူင်းၸၢၵ်ႈ ၵိူဝ်ဝၢၼ် တၢၼ်ႇတွင်ႇဢူး ၶွင်ငူၺ်ႇယီႇပလႄး ဢၼ်မီးဝၢၼ်ႈသႅၼ်တေႃ ၸႄႈဝဵင်းမိူင်းယႆ ဢၼ်မီးၼိူဝ်သဵၼ်ႈတၢင်း မိူင်းယႆ – သီပေႃႉ။
ၵူၼ်းၸၢႆး ယူႇမိူင်းယႆ ဢႃယု 40 လၢတ်ႈၽူႈတွႆႇႁွၵ်ႈဝႃႈ -“သိုၵ်းမၢၼ်ႈ မႃးပွႆႇမၢၵ်ႇတူၵ်းသႂ်ႇ ႁူင်းၸၢၵ်ႈၵိူဝ်ဝၢၼ် တၢၼ်ႇတွင်ႇဢူး တိူဝ်ႉၺႃး ဢွင်ႈတီႈႁပ်ႉၶႅၵ်ႇ၊ တီႈၵူၼ်းလူင် VIP ၶဝ်မႃးၼွၼ်း၊ ၶိူင်ႈမိၼ်မႃး 2 လမ်း၊ မႃးပွႆႇ 4 လုၵ်ႈ၊ ယၢၼ် ၵၼ်မွၵ်ႈ 5 ဝႃးၵူၺ်း တူၵ်းၸမ်ၸမ်ၵၼ်ၵူၺ်း”- ဝႃႈၼႆ။
သိုၵ်းမၢၼ်ႈ မႃးပွႆႇမၢၵ်ႇလွင်ႈလူႉသုမ်း တေမီးႁိူၼ်းႁပ်ႉၶႅၵ်ႇ 4 လင်၊ ဢွင်ႈတီႈႁုင်မိုဝ်ႉလႄႈ ဢွင်ႈတီႈၵိၼ်ၶဝ်ႈ ၼိုင်ႈလင်၊ ရူတ်ႉၵႃးႁပ်ႉၶႅၵ်ႇၵေႃႈ တုမ်ႉတိူဝ်ႉလူႉၵွႆ သွင်လမ်း။
ၵူၼ်းႁဵတ်းၵၢၼ် တီႈႁူင်းၸၢၵ်ႈလႄႈ တီႈႁုင်မိုဝ်ႉ မၢတ်ႇၸဵပ်း 9 ၵေႃႉ၊ ၼၢင်းယိင်းၼုမ်ႇတၢႆ 1 ၵေႃႉ၊ မၢတ်ႇ ၸဵပ်းႁၢဝ်ႈႁႅင်း ၸၢႆးၵေႃႉၼိုင်ႈလႄႈ ယိင်းၵေႃႉၼိုင်ႈ ၶႃပုတ်း၊ ၵေႃႉၼိုင်ႈမိုဝ်းပုတ်း။ ၼႂ်းၼၼ်ႉ ၽူႈယႂ်ႇ ၵူၼ်းလူင်(ၸၢဝ်းၶႄႇ) ၼႂ်းႁူင်းၸၢၵ်ႈ ၵေႃႉၼိုင်ႈ မၢတ်ႇၸဵပ်းႁၢဝ်ႈႁႅင်း ထိုင်တီႈလႆႈမႆႈၸႂ်။
ယၢမ်းလဵဝ် ၵူၼ်းမၢတ်ၸဵပ်းၼၼ်ႉ သူင်ႇယူတ်းယႃဝႆႉ တီႈၵေးသီး၊ မိူင်းယႆယဝ်ႉ ဝႃႈၼႆ။
မၼ်းၸၢႆး သိုပ်ႇလၢတ်ႈထႅင်ႈဝႃႈ – “ၵူၼ်းဝၢၼ်ႈတႄႉ ဢွၼ်ၵၼ်တူၵ်းၸႂ်ၶႃႈဢေႃႈ မၢၵ်ႇတူၵ်း 4 လုၵ်ႈၵမ်း လဵဝ်လူး၊ မိူဝ်ႈႁၢင်လိူၼ်ပူၼ်ႉမႃးတႄႉ ယွၼ်ႉသိုၵ်းၵဝ်ႈၵၢင်ႉၶဝ်မီးဝႆႉလႄႈ သိုၵ်းမၢၼ်ႈ မႃးပွႆႇမၢၵ်ႇၼေႃႈ၊ တေႃႈလဵဝ် သိုၵ်းၸုမ်းလႂ်ၵေႃႈ ဢမ်ႇမီး မႃးပွႆႇမၢၵ်ႇ တီႈႁူင်းၸၢၵ်ႈဢွႆႈ ၸိူင်ႉၼႆ ၵူၼ်းဝၢၼ်ႈမႆႈၸႂ် ၵူဝ်ဢမ်ႇ လႆႈၶၢႆဢွႆႈ” – ဝႃႈၼႆ။
ဝၢၼ်ႈသႅၼ်တေႃၼႆႉ မီးၸဵင်ႇႁွင်ႇဝၼ်းတူၵ်း ဝဵင်းမိူင်းယႆ။ ႁူင်းၸၢၵ်ႈၵိူဝ်ဝၢၼ်ၼႆႉ ယၢၼ်ၵႆၵၼ်တင်းဝဵင်း မွၵ်ႈ 6 လၵ်း။
မိူဝ်ႈၽွင်း တေမႃးတင်ႈႁူင်းၸၢၵ်ႈၵိူဝ်ဝၢၼ် ၼၼ်ႉၵေႃႈ ၸုမ်းၾၢႆႇၵဵဝ်ႇၶွင်ႈ၊ ၸဝ်ႈၶွင်ႁူင်းၸၢၵ်ႈၵိူဝ်ဝၢၼ် လႄႈ တင်းသိုၵ်းမၢၼ်ႈ ၼႂ်းတိူင်းသိုၵ်းယၶမ ႁူမ်ႈၵၼ်သေ ၵေႃႇတင်ႈမႃး။ ယၢမ်းလဵဝ် သိုၵ်းမၢၼ်ႈသမ်ႉ ၶိုၼ်းမႃးပွႆႇမၢၵ်ႇသႂ်ႇ ႁူင်း ၸၢၵ်ႈဢၼ်ၶဝ်ၵမ်ႉယၼ်ပၼ်ႁႅင်း ၼၼ်ႉၶိုၼ်းၼႆလႄႈ ႁဵတ်းႁႂ်ႈၵူၼ်းမိူင်း တူၵ်းၸႂ်လႄႈ ဢမ်ႇၸၢင်ႈယုမ်ႇ လွင်ႈႁဵတ်းသၢင်ႈသိုၵ်းမၢၼ်ႈယဝ်ႉ – ၵူၼ်းမိူင်းဝဵင်းမိူင်းယႆ လၢတ်ႈၼင်ႇၼႆ။
ၵူၼ်းၸၢႆးဝဵင်းမိူင်းယႆ လၢတ်ႈထႅင်ႈဝႃႈ မိူၼ်မီးၵူၼ်းပၼ်ၶၢဝ်ႇသိုၵ်းမၢၼ်ႈ ႁႂ်ႈပွႆႇမၢၵ်ႇတီႈၼၼ်ႈတီႈၼႆႈ၊ ၵူၼ်းပၼ်ၶၢဝ်ႇ လႅပ်ႈတေထၢင်ႇဝႃႈ သိုၵ်းၵဝ်ႈၵၢင်ႉ တိုၵ်ႉမီးတိုၵ်ႉလိုဝ်ႈယူႇ တီႈႁူင်းၸၢၵ်ႈၵိူဝ်ဝၢၼ်ၼၼ်ႉ။ တီႈတႄႉ တီႈႁူင်းၸၢၵ်ႈ ၼၼ်ႉ မီးၵူၼ်းမိူင်း ဢၼ်မႃးႁဵတ်းၵၢၼ်သေယူႇသဝ်းဝႆႉၵူၺ်း – ဝႃႈၼႆ။
“မၢင်ၸိူဝ်းၵေႃႈဝႃႈ ၽွင်းသိုၵ်းမၢၼ်ႈ ဢဝ်ၶိူင်ႈမိၼ်မႃးပၼ်ႇၼႆႉ မီးၵူၼ်းဢဝ်ၾႆးထၢတ်ႈထွင်ႇသႂ်ႇၶိူင်ႈမိၼ်။ ၶႂ်ႈမိူၼ် ၵူၼ်းပၼ်ၶၢဝ်ႇဝႆႉ။ ၵွပ်ႈၼႆ သိုၵ်းမၢၼ်ႈၵေႃႈ ၵႂႃႇပွႆႇမၢၵ်ႇသႂ်ႇတီႈၼၼ်ႉ”- ဝႃႈၼႆ။
ယၢမ်းလဵဝ် သိုၵ်းၵဝ်ႈၵၢင်ႉထွၼ်ဢွၵ်ႇ တင်းဝၢၼ်ႈၸၢင်ႉ။ မိူဝ်ႈဝၼ်းတီႈ 29/09/2024 သိုၵ်းၵဝ်ႈၵၢင်ႉ ထႅမ် ႁႅင်းသိုၵ်းမႃးလႄႈ သိုၵ်းမၢၼ်ႈ မႃးပွႆႇမၢၵ်ႇ ဝဵင်းမိူင်းယႆ 7 လုၵ်ႈ၊ မၢတ်ႇၸဵပ်း 4 ၵေႃႉ၊ ႁိူၼ်းယေး လူႉၵွႆ 3 လင်၊ မိူဝ်ႈဝၼ်းတီႈ 26/09/2024 သိုၵ်းမၢၼ်ႈ မႃးပွႆႇမၢၵ်ႇလႄႈ ၸဝ်ႈသၢင်ႇ မၢတ်ႇၸဵပ်း 7 တူၼ်၊ တူၵ်းသႂ်ႇ ႁိူၼ်းၵူၼ်းဝၢၼ်ႈၼမ်ႉတူၵ်း လင်ၼိုင်ႈ၊ ၸဝ်ႈႁိူၼ်း 3 ၵေႃႉ တၢႆထင်တီႈ။
တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ