လိူၼ်သႅပ်ႊထႅမ်ႊပိူဝ်ႊ ပူၼ်ႉမႃးၶၢဝ်းတၢင်းၼိုင်ႈလိူၼ် သိုၵ်းမၢၼ်ႈ ယိုဝ်းသိုၵ်းတေႃႇ သိုၵ်းၸၢဝ်းၶိူဝ်းလႄႈ ၸုမ်းၵႅတ်ႇ ၶႄၵူၼ်းမိူင်း ပတ်းပိုၼ်ႉမိူင်းႁူမ်ႈတုမ် ၼၢင်းယိင်းလူႉတၢႆ ယွၼ်ႉပၢင်တိုၵ်းမီး 60 ပၢႆ – BWU ပိုၼ်ၽၢဝ်ႇဝႆႉ ၼင်ၼႆ။

ၼၢင်းယိင်း ဢၼ်လႆႈလူႉတၢႆ ယွၼ်ႉပၢင်တိုၵ်းၼၼ်ႉ ပဵၼ်ၼၢင်းယိင်း ၼႂ်းမိူင်းတႆး တၢႆၼမ်သုတ်း 21 ၵေႃႉ၊ ၼၢင်းယိင်း ၼႂ်းတိူင်းတႃႈလိူဝ်ႇတၢႆ 15 ၵေႃႉ၊ တိူင်းၸႄႈၵႅင်း 8 ၵေႃႉ၊ တိူင်းမၵူၺ်း 4 ၵေႃႉ၊ တိူင်းပႃႇၵိူဝ် 6 ၵေႃႉ၊ တိူင်းတၼၢဝ်းသီ 3 ၵေႃႉ၊ ၸႄႈမိူင်းရၶႅင်ႇ 3 ၵေႃႉ၊ ၸႄႈမိူင်းမွၼ်း 2 ၵေႃႉ၊ ၸႄႈမိူင်းၶၢင် 1 ၵေႃႉ။

ၼၢင်းယိင်းၸွႆႈထႅမ် တူင်ႉၼိုင် သုၼ်ႇလႆႈသုၼ်ႇပဵၼ်ၼၢင်းယိင်း လၢတ်ႈၽူႈတွႆႇႁွၵ်ႈဝႃႈ -“လွင်ႈၶဵင်ႇတႃႉ တႃႇၼၢင်းယိင်းႁဝ်းၶႃႈ ၼႂ်းပၢင်တိုၵ်းတႄႉ ပဵၼ်လွင်ႈႁူမ်ႇလူမ်ႈ၊ လႆႈမႆႈၸႂ်ႁႅင်း။ ပေႃးပဵၼ်ပၢင်တိုၵ်းမႃး ၵၢၼ်ႁဵတ်းႁၢႆႉၸႃႉ ၼိူဝ်ၼၢင်းယိင်းၼႆႉ ပဵၼ်ၶိူင်ႈလၢၵ်ႈၼၢၵ်ႈ ဢၼ်ၼိုင်ႈ ဢၼ်တီႈသိုၵ်းၶဝ် ၸႂ်ႉၼႂ်းပၢင်တိုၵ်း ယွၼ်ႉၼၼ် လွင်ႈႁူမ်ႇလူမ်ႈၼႆႉ ပဵၼ်လွင်ႈၶဵင်ႇတႃႉ ဢၼ်ၼိုင်ႈ တီႈဢၼ်ၼၢင်းယိင်းႁဝ်းလႆႈထူပ်း”- ဝႃႈၼႆ။

သိုၵ်းမၢၼ်ႈ ဢဝ်ၶိူင်ႈမိၼ်ပွႆႇမၢၵ်ႇလႄႈ ၼၢင်းယိင်း လူႉတၢႆ 44 ၵေႃႉ၊ ယွၼ်ႉမၢၵ်ႇလူင်သေတၢႆ 8 ၵေႃႉ၊ ထုၵ်ႇၶႃႈႁႅမ် 6 ၵေႃႉ၊ ယွၼ်ႉၻရူၼ်ႊ (Drone) ပွႆႇမၢၵ်ႇသေတၢႆ 2 ၵေႃႉ၊ ၾႆးၽဝ်ၶႃႈႁႅမ် 2 ၵေႃႉသေ မၢင် ၸိူဝ်းၺးၸၢၵ်ႇမၢၵ်ႇ/ ပဵၼ်တၢင်း ပဵၼ်ၽွင်းပၢင်တိုၵ်းသေ ဢမ်ႇလႆႈယူတ်းယႃတူဝ်လႄႈ လူႉတၢႆၵေႃႈမီး ဝႃႈၼႆ။

မၼ်းၼၢင်း လၢတ်ႈထႅင်ႈဝႃႈ – “ယွၼ်ႉပၢင်တိုၵ်းလႄႈ ၵူၼ်းမိူင်းထူပ်းတင်းယၢပ်ႇၽိုတ်ႇ တင်းၼမ်တင်းလၢႆ။ ပေႃးပဵၼ်ပၢင်တိုၵ်းမႃး ဢၼ်တီႈဢမ်ႇပၢႆႈလႆႈၼႆႉပဵၼ် ၵူၼ်းထဝ်ႈလႄႈ ၼၢင်းယိင်း။ ၵမ်ႈၼမ် တေပဵၼ်ၼၢင်းယိင်း။ ပေႃးပဵၼ်ပၢင်တိုၵ်းမႃး လႆႈၶၢမ်ႇၸၢၵ်ႇပၢင်တိုၵ်း ယဵပ်ႇၺႃးမၢၵ်ႇ၊ မၢၵ်ႇတူၵ်းတႅၵ်ႇသေတၢႆ၊ လူလၢႆၵၼ်ႉၸၼ်သေတၢႆ ၼၢင်းယိင်းတၢႆ ၼႂ်းၵႄႈပၢင်တိုၵ်း တင်းၼမ်။ ၼႆႉပဵၼ်ၽွၼ်းတုမ်ႉယွၼ်ႈ ယႂ်ႇလူင်တႃႇၵူၼ်းဝၢၼ်ႈၵူၼ်းမိူင်းႁဝ်းၶႃႈ”- ဝႃႈၼႆ။

လိူဝ်ၼၼ်ႉ ယွၼ်ႉပၢင်တိုၵ်းသေ ၼၢင်းယိင်းမၢတ်ႇၸဵပ်းမီးထႅင်ႈ 60 ။ သိုၵ်းမၢၼ်ႈ ဢဝ်ၶိူင်ႈမိၼ် မႃးပွႆႇမၢၵ်ႇလႄႈ မၢတ်ႇၸဵပ်းမီး 34 ၵေႃႉ၊ တုမ်ႉတိူဝ်ႉယွၼ်ႉမၢၵ်ႇၵွင်ႈလူင် 11 ၵေႃႉ၊ မၢတ်ႇၸဵပ်း ယွၼ်ႉ Drone မီး 5 ၵေႃႉ၊ ယွၼ်ႉမၢၵ်ႇ ဢၼ်မူၵ်းဝႆႉၼႂ်းထိူၼ်ႇၼႂ်းသူၼ်သေ တၢႆ 5 ၵေႃႉ၊ ယွၼ်ႉမၢၵ်ႇတႅၵ်ႇ 1 ၵေႃႉ၊ ႁဵတ်းႁၢႆႉၸႃႉတင်းၵႃႇမ ထုၵ်ႇၵၼ်ႉၸၼ် 6 ၵေႃႉ။

“ၼႂ်းပၢင်တိုၵ်းၼႆႉ လွင်ႈပူၼ်ႉပႅၼ် သုၼ်ႇလႆႈသုၼ်ပဵၼ်ၵူၼ်းၵေႃႈ မီးတင်းၼမ်။ လွင်ႈႁဵတ်းႁၢႆႉၸႃႉၵေႃႈ မီးတင်းၼမ်၊ ၼႂ်းလွင်ႈႁဵတ်းႁၢႆႉၸႃႉတင်းၼမ်ၼႆႉ၊ ၼၢင်းယိင်း လႆႈၶၢမ်ႇတၢမ်ႇသိုၵ်းၼမ်။ မၼ်းမီးဢၼ် ၼိုင်ႈ လွင်ႈႁဵတ်းႁၢႆႉၸႃႉတင်းၵႃႇမ ၵၼ်ႉၸၼ်လူလၢႆၼၢင်းယိင်း၊ ၵၢၼ်ၵၼ်ႉၸၼ် လူလၢႆၼၢင်းယိင်းယဝ်ႉ ႁႅမ်ပႅတ်ႈ ၼႂ်းပၢင်တိုၵ်းၵေႃႈမီး လႆႈ ႁၼ်မီးတင်းၼမ်။ ဢၼ်ၼႆႉ မၼ်းပဵၼ်လွင်ႈႁဵတ်းႁၢႆႉၸႃႉႁၢဝ်ႈႁႅင်း ႁုၵ်ႉႁၢႆႉသေပိူၼ်ႈ တိုၼ်းဢမ်ႇၶႂၢင်ႉပၼ်လႆႈ” – ဝႃႈ ၼႆ။

တႄႇပီ 2021 လိူၼ်ၾႅပ်ႊပိဝ်ႊရီႊ တေႃႇထိုင် 2024 ၼႂ်းၶၢဝ်းတၢင်း သိုၵ်းမၢၼ်ႈ ယိုတ်းမိူင်းမႃး 3 ပီၼႆႉ ၼၢင်းယိင်း ထုၵ်ႇၶႃႈႁႅမ် 806 ၵေႃႉ၊ ထုၵ်ႇၺွပ်း 3 ႁဵင်ပၢႆ – BWU ပိုၼ်ၽၢဝ်ႇဝႆႉၼင်ၼႆ။

တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)