ဝၼ်းတီႈ 08/10/2024 ယၢမ်းၵၢင်ၼႂ် ၸုမ်းၵႅတ်ႇၶႄၵူၼ်းမိူင်း ၼႂ်းၼႃႈတီႈ မၢႆၼိုင်ႈ PDF ၊ တပ်ႉသိုၵ်းၶၢင် KIA လႄႈ ၸုမ်းဢူၺ်းလီႁူမ်ႈႁွမ်း ယိုဝ်းတိုၵ်းၵုမ်းလႆႈ ဝဵင်းပိၼ်ႇလႄႇဢူး (ပင်လည်ဘူး) ၼႂ်းတိူင်းၸႄႈၵႅင်း လီငၢမ်းယဝ်ႉ။  

တႄႇမိူဝ်ႈၵၢင်လိူၼ်ဢေႃႊၵတ်ႊသ်ပူၼ်ႉမႃး ၸုမ်းၵႅတ်ႇၶႄၵူၼ်းမိူင်း PDF ႁူမ်ႈတင်း ၸုမ်းဢူၺ်းလီသေ ထူဝ်းသိုၵ်းလေႃႇတိုၵ်း တပ်ႉသိုၵ်းမၢၼ်ႈ တီႈဝဵင်းပိၼ်ႇလႄႇပူး၊ ဢိၼ်းတေႃႇ၊ ထီးၶျၢင်ႉ ၸိူဝ်းၼႆႉ။

ၽွင်းပၢင်တိုၵ်းၼၼ်ႉ ၾၢႆႇသိုၵ်းမၢၼ်ႈ ၸႂ်ႉၶိူင်ႈမိၼ်ပွႆႇမၢၵ်ႇယိုဝ်းၸွႆႈႁၢဝ်ႈႁႅင်း ပၢင်တိုၵ်းႁိုင်ၶၢဝ်းတၢင်းသွင်လိူၼ် ၸင်ႇယိုတ်းလႆႈဝဵင်းပိၼ်ႇလႄႇပူးၼႆ ၽူႈတူင်ႉၼိုင်ၵၢၼ်သိုၵ်း ၼႂ်းပိုၼ်ႉတီႈ ယိုၼ်ယၼ်တွပ်ႇ ဝႆႉတီႈသိုဝ်ႇၶၢဝ်ႇ People’s Spring ၼင်ႇၼႆ။

ၶၢဝ်းတၢင်းပၢင်တိုၵ်း တီႈဝဵင်းပိၼ်ႇလႄႇပူး၊ ဢိၼ်းတေႃႇ၊ ထီးၶျၢင်း ဢၼ်ပႃးၼႂ်းၼႃႈတီႈသိုၵ်း မၢႆၼိုင်ႈၼၼ်ႉ ယူႇတီႈ ႁွင်ႈၵၢၼ်ၽွင်းလူင် ၾၢႆႇၵႅတ်ႇၶႄ လူင်ပွင်ၸိုင်ႈၽွမ်ႉႁူမ်ႈၸိူဝ်ႉၸၢတ်ႈ NUG ၼႆႉ လုၵ်ႈၸုမ်း PDF ၶဝ်ႈပႃး ယိုဝ်းတိုၵ်း ၼပ်ႉႁူဝ်ႁဵင်ၵေႃႉၼႆ – NUG ပိုၼ်ၽၢဝ်ႇပဵၼ်တၢင်းၵၢၼ်ဝႆႉ ၼင်ႇၼႆ။