သဵၼ်ႈတၢင်းလူင် ၼႂ်းၵႄႈမိူင်းတူၼ် – မိူင်းပၼ်ႇ ၺႃးလိၼ်လွႆၵူၼ်ႇတဵင်သႂ်ႇ လူႉၵွႆ ဢမ်ႇယွမ်း 2 ပွၵ်ႈ ယဝ်ႉ ပွၵ်ႈၼႆႉ လူႉၵွႆႁိုင် 7 ဝၼ်းယဝ်ႉ ဢမ်ႇၸၢင်ႈၵႂႃႇမႃး ႁဵတ်းႁႂ်ႈၸဝ်ႈၵႃး ၵူၼ်းမိူင်းထူပ်းတၢင်းယၢပ်ႇ။

မိူဝ်ႈလိၼ်လွႆ ၵူၼ်ႇတဵင်သဵၼ်ႈတၢင်း ပွၵ်ႈၵမ်းၼိုင်ႈၼၼ်ႉ ပဵၼ်ၼႂ်းလိူၼ်သႅပ်ႊထႅပ်ႊထိူဝ်ႊ ၼၼ်ႉ ၵေႃႈ ႁိုင်ၶၢဝ်းတၢင်း 20 ဝၼ်းပၢႆ ရူတ်ႉၵႃး ဢမ်ႇၸၢင်ႈၵႂႃႇမႃး ၵိုတ်းၶမ်ဝႆႉ ၸွမ်းတၢင်း ဢမ်ႇယွမ်း 30 လမ်း။ ပွၵ်ႈၼႆႉသမ်ႉ တၢင်းပိၵ်ႉတၼ်ထႅင်ႈ ႁိုင် 7 ဝၼ်းယဝ်ႉ ပႆႇၸၢင်ႈၵႂႃႇမႃး။

ၵူၼ်းမိူင်းတူၼ် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ  – “သဵၼ်ႈတၢင်းၵွႆမႃးၼႆႉ လႆႈ 7 ဝၼ်းယဝ်ႉ။ မိူဝ်ႈတၢင်းၵွႆ ၵမ်း ဢွၼ်တၢင်းၼၼ်ႉ သိုၵ်း RCSS ၶဝ် မႃးၸွႆႈၶုတ်းလိၼ်တဵင်တၢင်း ၸိူဝ်းၼၼ်ႉ ဢွၵ်ႇပၼ်ဢေႃႈ။ ၾၢႆႇသိုၵ်းမၢၼ်ႈတႄႉ ဢမ်ႇႁၼ်မႃးၸွႆႈသင်။ ယၢမ်းလဵဝ် သဵၼ်ႈတၢင်းဢၼ်ၵွႆၼၼ်ႉ ပဵၼ်ၼႂ်းၵႄႈမိူင်းပၼ်ႇ – ၶူဝ်တႃႈသၢင်း (ၶူဝ်တႃႈၸၢင်ႉ) ၼၼ်ႉဢေႃႈ”- ဝႃႈၼႆ။

သိုၵ်းမၢၼ်ႈ ယိုတ်းမိူင်းၼႆႉ ဢမ်ႇသႂ်ႇၸႂ် တူၺ်းထိုင်ၼိူဝ်ၵူၼ်းမိူင်းသင် သဵၼ်ႈတၢင်းလူႉၵွႆၵူၼ်ႇပင်း ပဵၼ်လၢႆတီႈၵေႃႈ ဢမ်ႇမႄးၵုမ်းၸတ်းၵၢၼ်ပၼ်။ မိူၼ်ၼင်ႇ လႅင်းၾူၼ်းၼႆႉ မီးပဵၼ်လၢႆသႅၼ်းၵေႃႈ ထိုင်ယၢမ်းလဵဝ် ပႆႇၸႂ်ႉလႆႈ။

ၵူၼ်းပိုၼ်ႉတီႈ မိူင်းတူၼ် ၽူႈယိင်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ် လႆႈသိုဝ်ႉၸႂ်ႉ သိမ်း MEC 800 မိူဝ်ႈၵူႈပွၵ်ႈၼၼ်ႉၼေႈ။ လႆႈသိုဝ်ႉၵႃႈၼႃႇ ၼပ်ႉငိုၼ်းထႆးၵေႃႈ 1,000 ဝၢတ်ႇ ၸိူဝ်းၼႆႉ တူၵ်းငိုၼ်းမၢၼ်ႈသႅၼ်ပၢႆ လူးၵွၼ်ႇ။ ယွၼ်ႉၼၼ် ၵူၼ်းမိူင်းတႄႉ တေသိုဝ်ႉၵေႃႈ သမ်ႉၵူဝ်လႆႈသဵင်ႈ ငိုၼ်းၼမ်။ တေဢမ်ႇသိုဝ်ႉၵေႃႈ ဢမ်ႇၸၢင်ႈၵပ်းသိုပ်ႇႁႃၵၼ်လႆႈ ၵိၼ်းၸႂ်တႄႉဢေႃႈ” – ဝႃႈၼႆ။

ယၢမ်းလဵဝ် ၸဝ်ႈႁၢၼ်ႉၶၢႆၵုၼ်ႇၵေႃႈ တူၵ်းၵိၼ်းၽႂ်မၼ်း ယွၼ်ႉဝႃႈ ဢမ်ႇၸၢင်ႈတေႃႉၶူဝ်းၵုၼ်ႇ တၢင်ႇတီႈၶဝ်ႈမႃး ၼႂ်းမိူင်းတူၼ်။ ၵုၼ်ႇၶွင်ၵိၼ်ယႅမ်ႉ ၵူႈသႅၼ်းသႅၼ်းၵေႃႈ ၸမ်ၶၢတ်ႇမူတ်းယဝ်ႉလႄႈ ၵူၼ်းမိူင်း ဢွၼ်ၵၼ်တူၵ်းၵိၼ်းႁႅင်းဝႆႉ။

ဝၢႆးၼမ်ႉထူမ်ႈႁႅင်းယဝ်ႉ ၵူၼ်းမိူင်းတူၼ်သမ်ႉ ဢွၼ်ၵၼ်ၸပ်းတၢင်းပဵၼ်ၶႆဝတ်းယႂ်ႇထႅင်ႈ ယွၼ်ႉၵပ်း သိုပ်ႇတေႃႇၵၼ်ယၢပ်ႇ၊ သဵၼ်ႈတၢင်းၶၢတ်ႇ ၵႂႃႇမႃးယၢပ်ႇလႄႈ ၸိူဝ်းဢမ်ႇလႆႈယူတ်းယႃတူဝ်ၶိုတ်းတၼ်းသေ လူႉတၢႆပႅတ်ႈၵေႃႈ မီးမႃးယဝ်ႉ။