ၶၢဝ်းတၢင်း သိုၵ်းမၢၼ်ႈ ယိုတ်းဢႃႇၼႃႇၸိုင်ႈမိူင်းမႃး 3 ပီပၢႆၼႆႉ ၵၢၼ်ဝၢၼ်ႈၵၢၼ်မိူင်းဢမ်ႇၼိမ်သဝ်း ႁဵတ်းႁႂ်ႈၵူၼ်းၼႂ်းမိူင်းမၢၼ်ႈ ပတ်းပိုၼ်ႉ ႁႃၵိၼ်လဵင်ႉတွင်ႉယၢပ်ႇ ႁဵတ်းႁႂ်ႈၽူႈလၵ်ႉၸၵ်ႉၶုတ်ႈ လိူင်ႇၼမ်မႃး။

ၼႂ်းၶၢဝ်းတၢင်း လိူၼ်သွင်လိူၼ်မႃးၼႆႉ တီႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇ ၾူၼ်တူၵ်းထပ်းၵၼ် ႁႅင်းၼမ်ႉသၢႆ ၼွင်းလူၼ်ႉၾင်ႇ လုပ်ႇၼွင်းထူမ်ႈ ၼႂ်းဝဵင်းတႃႈၶီႈလဵၵ်း ၵူၼ်းပိုၼ်ႉတီႈ ပဵၼ်ဢၼ်ယၢပ်ႇၸႂ် တႃႇႁႃၵိၼ်လဵင်ႉတွင်ႉ ၵူၺ်းဢမ်ႇၵႃး ယၢမ်းလဵဝ် ၽူႈလၵ်ႉၸၵ်ႉၶုတ်ႈ လိူင်ႇၼမ်မႃးလႄႈ ၵူၼ်းမိူင်း မႆႈၸႂ် ၵူဝ်ဢမ်ႇမီးလွင်ႈႁူမ်ႇလူမ်ႈ။  

ၵူၼ်းပိုၼ်ႉတီႈ ဝဵင်းတႃႈၶီႈလဵၵ်း ၽူႈယိင်း ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ -“ၼမ်ႉထူမ်ႈႁိူၼ်းယေးလႄႈ ႁၢၼ်ႉတၢင်းၶၢႆ၊ ရူတ်ႉၵႃးရူတ်ႉၶိူင်ႈ ၸိူဝ်းၼႆႉ ၵွႆၼမ်။ ၵမ်းၵမ်းလႆႈမႄး။ ၽဵဝ်ႈလၢင်ႉႁိူၼ်းယေးပႆႇတၼ်းယဝ်ႉ ၼမ်ႉပေႃးထူမ်ႈယူႇထႅင်ႈယဝ်ႉ။ ဢမ်ႇတၼ်းႁႃၵိၼ်ႁႃယႅမ်ႉသင်။ ၵမ်းၼႆႉ ၵူၼ်းလၵ်ႉၵေႃႈ လိူင်ႇၼမ်။ ၵႂႃႇတၢင်းလႂ်ပႆတၢင်းလႂ်ၵေႃႈ ပေႃးလႆႈၾၢင်ႉယူႇတႃႇသေႇယဝ်ႉ”- ဝႃႈၼႆ။

ဝဵင်းတႃႈၶီႈလဵၵ်းၼႆႉ မိူဝ်ႈၽွင်းဝၢၼ်ႈမိူင်းလီၼၼ်ႉ ၵၢၼ်ငၢၼ်းၵေႃႈလိူင်ႇ ငိုၼ်းၵေႃႈလႆႈလီ။ သမ်ႉပဵၼ် ဝဵင်းဢၼ်တိတ်းၸပ်းလႅၼ်လိၼ်လႄႈ ၶဝ်ႈပႃးၼႂ်းဝဵင်း ဢၼ်ၵူၼ်းၵိုၼ်းငိုၼ်းၶွၼ်ႈ ဝဵင်းၼိုင်ႈ။ ယၢမ်းလဵဝ် ၼႂ်းပီၼႆႉ ပၢႆလိူဝ်ၵၢၼ် ႁႃၵိၼ်လဵင်ႉတွင်ႉယၢပ်ႇ ၽူႈလၵ်ႉၸၵ်ႉၶုတ်ႈသမ်ႉ လိူင်ႇၼမ်ႁႅင်း။  

“မိူဝ်ႈဢွၼ်တၢင်းတႄႉ တီႈတႃႇၶီႈလဵၵ်းၼႆႉ ၵၢၼ်လိူင်ႇၼႃႇ၊ ၵူၼ်းလၵ်ႉၵေႃႈ ဢမ်ႇလိူင်ႇမိူၼ်ၼႆ၊ တေႃႈလဵဝ်တႄႉ ဢမ်ႇ ၵႃးလၵ်ႉၵူၺ်း – ၸူၼ်ဢဝ်လူးၵွၼ်ႇဢိူဝ်ႈ။ ပေႃးၶီႇရူတ်ႉၵႂႃႇၸွမ်းတၢင်းၵေႃႈ လႆႈၾၢင်ႉ ႁူလႅတ်းတႃလႅတ်း။ ပေႃးယူႇၼိူဝ်တၢင်းၼႆႉ ဢမ်ႇႁတ်းဢဝ်ၾူၼ်းဢွၵ်ႇမႃးလၢတ်ႈ မႃးၸႂ်ႉမႃးလဵၼ်ႈသေ ဢိတ်း။ ၵမ်ႈၽွင်ႈ တိုၵ်ႉလၢတ်ႈၾူၼ်းယူႇ ၵေႃႈ မႃးၸၵ်ႉႁိမ်ဢဝ်ၼႂ်းမိုဝ်းသေလႅၼ်ႈပၢႆႈ ၵေႃႈမီး။ ၵူၼ်းမိူင်းၼႆႉ ဢမ်ႇမီးလွင်ႈႁူမ်ႇလူမ်ႈသေဢိတ်းယဝ်ႉ”- ၵူၼ်းပိုၼ်ႉတီႈ ဝဵင်းတႃႈၶီႈလဵၵ်း သိုပ်ႇလၢတ်ႈၼႄၼင်ႇၼႆ။

ယဝ်ႉၵေႃႈ တီႈဝဵင်းတႃႈၶီႈလဵၵ်းၼႆႉ ၵူၼ်းမိူင်းၼႂ်းၸိုင်ႈတႆးပွတ်းႁွင်ႇၵေႃႈ ပၢႆႈၽေးသိုၵ်းမႃးယူႇသဝ်းဝႆႉ။ ၽွင်းၼႆႉ ၼမ်ႉသမ်ႉၼွင်းထူမ်ႈတိၵ်းတိၵ်း။ ၵူၼ်းပိုၼ်ႉတီႈပႃးၸဵမ်ၶႅၵ်ႇ ဢွၼ်ၵၼ်ႁႃၵၢၼ်ယၢပ်ႇ။  

ယၢမ်းလဵဝ် တီႈဝဵင်းတႃႈၶီႈလဵၵ်းၼႆႉ ၽူႈလၵ်ႉၸၵ်ႉၶုတ်ႈ လိူင်ႇၼမ်ၵူၺ်းဢမ်ႇၵႃး ၵူၼ်းယွၼ်းၵေႃႈၼမ် မႃးႁႅင်း။

မိူဝ်ႈဝၼ်းတီႈ 05/09/2024 ယၢမ်းၵၢင်ဝၼ်း ၵူၼ်းပိုၼ်ႉတီႈ၊ ၸုမ်းတူင်ႉၼိုင်တူင်ႇဝူင်းၵူၼ်းလႄႈ ၸဝ်ႈၼႃႈ တီႈၽူႈမီးပုၼ်ႈၽွၼ်း ၾၢႆႇႁူမ်ႇလူမ်ႈ ႁူမ်ႈၵၼ် ႁွင်ႉဢဝ်ၵူၼ်းယွၼ်း ၸိူဝ်းမီးၼႂ်းဝဵင်းတႃႈၶီႈလဵၵ်း ၸိူဝ်းၼၼ်ႉ မႃးတွင်ႈထၢမ် ၵဵပ်းၶေႃႈမုလ်းသေ ၸွႆႈဢဝ်တၢင်ႇၵႃး သူင်ႇပွၵ်ႈၶိုၼ်းဝၢၼ်ႈၽႂ်မိူင်းမၼ်း။ လွင်ႈၽဵဝ်ႈလၢင်ႉၵူၼ်းယွၼ်း တီႈဝဵင်းတႃႈၶီႈလဵၵ်းၼႆႉ မီးပွၵ်ႈၵမ်း 3 ယဝ်ႉ – ၵူၼ်းပိုၼ်ႉတီႈလၢတ်ႈ။ 

ၸူဝ်ႈမိူင်းလူႉမႃးၼႆႉ တီႈဝဵင်းတႃႈၶီႈလဵၵ်းၼႆႉ ၵူၼ်းဢၼ်ၽွတ်ႈဝႆႉပဵၼ်ၸုမ်းသေ ဢႅဝ်ႇႁႃ လၵ်ႉၸူၼ်ၶူဝ်းၶွင်ပိူၼ်ႈ၊ ႁႄႉၸူၼ်ရူတ်ႉၶိူင်ႈ၊ ရူတ်ႉၵႃးပိူၼ်ႈ ၸိူဝ်းၼႆႉၵေႃႈ လိူင်ႇၼမ်မႃးယဝ်ႉ။ ၼိုင်ႈလိူၼ်လႂ် ၺႃးလၵ်ႉ/ ၸူၼ် ဢမ်ႇယွမ်း 20 လမ်း။ ထိုင်မိူဝ်ႈလဵဝ်ၵေႃႈ ဢမ်ႇမီးၸုမ်းလႂ် ဢဝ်ပုၼ်ႈၽွၼ်းၽဵဝ်ႈလၢင်ႉပၼ်။

ၼွၵ်ႈလိူဝ်ၼၼ်ႉ ၽေးၶဵၼ်ယႃႈမဝ်းၵမ်ၵေႃႈ လိူင်ႇၼမ်။ သိုဝ်ႉငၢႆႈၶၢႆလိူင်ႇ။ ဢၼ်လီၵူဝ်သုတ်းသမ်ႉ ယၢမ်းလဵဝ် ပဵၼ် ၸုမ်းၵျႃးၽႅၼ်ႉ လွၵ်ႇလႅၼ်ၵိၼ်ငိုၼ်းတၢင်းဢွၼ်ႊလၢႆႊၼၼ်ႉ ႁၼ်ပလိၵ်ႈမၢၼ်ႈသိုၵ်းမၢၼ်ႈ ဢႅဝ်ႇသွၵ်ႈလိုပ်ႈလမ်း တီႉၺွပ်းယူႇၶိူဝ်းယႂ်းၵေႃႈ ၶိုၼ်းပွႆႇတူဝ်လွတ်ႈမႃး ပၼ်ႇၵၢၼ်ၶိုၼ်း ဢမ်ႇတီႉၺွပ်း ဢဝ်လိူင်ႈပၼ်တူတ်ႈတၢမ်ႇထိုင်တီႈ – ၵူၼ်းပိုၼ်ႉတီႈလၢတ်ႈ။

တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)