ႁၢင်လိူၼ်သႅပ်ႊထႅမ်ႊပိူဝ်ႊ ပူၼ်ႉမႃးၼႆႉ ဢိင်ၼိူဝ် ၾူၼ်တူၵ်းႁႅင်းၼမ်ႉပႃႇလႆဢီးထွင်းပႃး တေႃႈၼမ်ႉၵိၼ်ၼမ်ႉၸႂ်ႉလႄႈ ႁိူၼ်းယေးၵူၼ်းမိူင်း တီႈဝဵင်းယႂႃႇငၢၼ်ႇ ၸိုင်ႈတႆးပွတ်းၸၢၼ်း။

ႁဵတ်းႁႂ်ႈတေႃႈလွတ်ႇသူင်ႇၼမ်ႉၵိၼ် “ပတူင်းၵၢႆး (ပိတုန်းကိုင်း)” ပုတ်းၶၢတ်ႇလူႉၵႂႆၵႂႃႇ မွၵ်ႈ 70 ထတ်း (ပေႇ)။ ယၢမ်းလဵဝ် ၵူၼ်းမိူင်းယႂႃႇငၢၼ်ႇ ဢမ်ႇမီးၼမ်ႉၵိၼ်ၼမ်ႉၸႂ်ႉ။ လႆႈတုင်းၼမ်ႉၾူၼ်ဝႆႉၸႂ်ႉ၊ ၵမ်ႈၽွင်ႈသမ်ႉ ဢဝ်လွတ်ႇသုၼ်ႇတူဝ်ၵႂႃႇတေႃႇဢဝ်ၼမ်ႉမႃးၸႂ်ႉလၢႆးၽႂ်မၼ်း။

“သင်ဢမ်ႇမႄးပၼ် ႁႂ်ႈယဝ်ႉတူဝ်ႈဝႆးဝႆးတႄႉ ၵူၼ်းဝၢၼ်ႈ တေယၢပ်ႇၼမ်ႉၵိၼ်ၼမ်ႉၸႂ်ႉတႄႉၶႃႈဢေႃႈ။ ပေႃးၾူၼ်ႁိူတ်ႇယဝ်ႉ တေဢမ်ႇမီးၼမ်ႉၸႂ်ႉယဝ်ႉ။ တၢင်းႁဝ်းၶႃႈၼႆႉ ၼမ်ႉၶႂ်ႈယၢပ်ႇဝႆႉဢေႃႈ”- ၵူၼ်းမိူင်းဝဵင်းယႂႃႇငၢၼ်ႇ ၵေႃႉၼိုင်ႈ ၵေႃႉလၢတ်ႈၽူႈတွႆႇႁွၵ်ႈၼင်ႇၼႆ။

ၽူႈမီးပုၼ်ႈၽွၼ်း ႁွင်ႈၵၢၼ် ၾၢႆႇၵဵဝ်ႇၶွင်ႈဢွၼ်ၵၼ်ၶပ်းၶိုင် တႃႇၶိုၼ်းမႄးတေႃႈလွတ်ႇၼမ်ႉယူႇသေတႃႉ ပႆႇယဝ်ႉတူဝ်ႈတေႃႇထိုင်ဝၼ်းတီႈ 4 ပူၼ်ႉမႃးၼႆႉ။

“တေႃႇထိုင်မိူဝ်ႈၼႆႉ တိုၵ်ႉမႄးယူႇ။ ၵူၼ်းဝၢၼ်ႈပႆႇမီးၼမ်ႉၸႂ်ႉ။ ၵူၼ်းဝၢၼ်ႈသမ်ႉ ၸႂ်ယႂ်ႇတီႈၼမ်ႉတူၵ်းတၢတ်ႇ ပတူင်းၵၢႆး ၼၼ်ႉၵူၺ်းၶႃႈၼႃႇ”- ၵူဝ်ႇထုၼ်း ၵူၼ်းႁဵတ်းၵၢၼ် တီႈလုမ်းၾၢႆႇလိူမ်ႈလႆႇ ဝဵင်းယႂႃႇငၢၼ်ႇ လၢတ်ႈတီႈၽူႈတွႆႇ ႁွၵ်ႈၼင်ႇၼႆ။

တေႃႈလွတ်ႇသူင်ႇၼမ်ႉ ပတူင်းၵၢႆး – ဢၼ်လူင်ပွင်ၸိုင်ႈႁဵတ်းဝႆႉပၼ်ၼႆႉ မီးၾၢႆႇဢွၵ်ႇဝဵင်းယႂႃႇငၢၼ်ႇ ယၢၼ်ၵႆဝဵင်းမွၵ်ႈ 10 လၵ်း။ ပေႃးဢဝ်ရူတ်ႉၶိူင်ႈၵႂႃႇၼႆ ၵႂႃႇလႆႈထိုင်ပွတ်းတၢင်းၵူၺ်း။ ထႅင်ႈပွတ်ႈတၢင်းသမ်ႉ လႆႈပႆလတ်းႁူၺ်ႈလွႆထိူၼ်ႇၶိူဝ်းဢဝ်- ၵူၼ်းမိူင်းဝဵင်းယႂႃႇငၢၼ်ႇ လၢတ်ႈၼင်ႇၼႆ။

ယွၼ်ႉပိူဝ်ႈၾူၼ်တူၵ်းႁႅင်းသေ သဵၼ်ႈတၢင်းရူတ်ႉၵႃးၵေႃႈ ၵိုတ်းၶၢတ်ႇလူႉၵွႆ။ သဵၼ်ႈတၢင်းဢုမ်ႇပဝ်း၊ ဝဵင်းလိူဝ်ႇ၊ သဵၼ်ႈတၢင်းၵၢတ်ႇလေႃႉ ဢုမ်ႇပဝ်း ၸိူဝ်းၼႆႉ လူႉၵွႆ ရူတ်ႉၵႃးလဵၵ်ႉယႂ်ႇ ဢမ်ႇၵႂႃႇမႃးလႆႈ။

ၵူၼ်းမိူင်းဝဵင်းယႂႃႇငၢၼ်ႇ လၢတ်ႈၽူႈတွႆႇႁွၵ်ႈဝႃႈ – “သဵၼ်ႈတၢင်းၶၢတ်ႇဝႆႉလႄႈ ၶူဝ်းၵုၼ်ႇၵိၼ်ယႅမ်ႉၵႃႈၶၼ်သုင်။ ၶဝ်ႈ ၼိုင်ႈထူင်လႆႈသိုဝ်ႉၵိၼ် 1 သႅၼ်ၶိုင်ႈ။ ငိုၼ်းသမ်ႉႁႃယၢပ်ႇ။ ၶၼ်ၵုၼ်ႇသမ်ႉၶိုၼ်ႈၼေႃႈ။ ၵူၼ်းမိူင်းတႄႉ ယၢပ်ႇယူႇတိၵ်းတိၵ်းယဝ်ႉၶႃႈ”- ဝႃႈၼႆ။

ပီၼႆႉ တၢင်းထုင်ႉပူင်း ယွင်ၶဝ်လူင်မိူင်းတႆးပွတ်းၸၢၼ်းၵေႃႈ ၼမ်ႉသမ်ႉထူမ်ႈ ႁၢဝ်ႈႁႅင်းထႅင်ႈလႄႈ ၶဝ်ႈၸိူဝ်းၽုၵ်ႇဝႆႉလူႉတၢႆမူတ်း။ တႃႇပီတေမႃး ပီၼႃႈတႄႉ ပဵၼ်ဢၼ်လီမႆႈၸႂ် ဝႃႈၼႆ။

တႅမ်ႈ – ၼၢင်းငဝ်းလိူၼ် (ၽူႈသိုဝ်ႇၶၢဝ်ႇၾိုၵ်းၵၢၼ်)