ၵူၼ်းမိူင်းၶႄႇ – မိူင်းထႆး ၸိူဝ်းပဵၼ်ၸုမ်းၵျႃးၽႅၼ်ႉ ဢွၼ်ၵၼ်ပၢႆႈမႃးမူၵ်းသွၼ်ႈယူႇဝႆႉ တၢင်းပွတ်းၼႃးၵွင်းမူး ၸႄႈဝဵင်းမိူင်းတူၼ်ၼႆႉ တင်းၼမ်လၢႆ လူၺ်ႈဢမ်ႇပဵၼ်တၢင်းၵၢၼ်။

တႄႇႁၢင်ပီ 2023 ဝၢႆးၽႅၼ်ၵၢၼ်ယၼ်ႇသိုၵ်း 1027 ၼၼ်ႉမႃးသေ ၸုမ်းၵျႃးၽႅၼ်ႉ လွၵ်ႇလႅၼ်ၵိၼ် ငိုၼ်းဢွၼ်ႊလၢႆႊ ၸိူဝ်းယူႇဝႆႉ ၼႂ်းၸိုင်ႈတႆးပွတ်းႁွင်ႇၼၼ်ႉ ဢွၼ်ၵၼ်ၶၢႆႉပၢႆႈမႃး တၢင်းၼႃးၵွင်းမူး ၸႄႈဝဵင်းမိူင်းတူၼ် ၸႄႈတွၼ်ႈမိူင်းသၢတ်ႇ ၸိုင်ႈတႆးပွတ်းဢွၵ်ႇၼႆႉ တင်းၼမ်လၢႆ သိုၵ်းမၢၼ်ႈပလိၵ်ႈမၢၼ်ႈ ႁူႉယူႇၵေႃႈ ဢမ်ႇဢဝ်လိူင်ႈသင်။

ၵူၼ်းမိူင်းတူၼ် လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ် တီႈၼႃးၵွင်းမူး – မိူင်းတူၼ်ၼႆႉ မီးၸၢဝ်းၶႄႇ၊ ၸၢဝ်းထႆး မႃးယူႇၼမ်ၼႃႇ။ မိူၼ်ၼင်ႇ တီႈၼႃးၵွင်းမူးၼႆႉ ၶႄႇၶဝ်မႃးပၵ်းသဝ်းယူႇဝႆႉ ၼမ်ဝႃႈၼမ် လူၺ်ႈဢမ်ႇၸႂ်ႈတၢင်းၵၢၼ်။ ပလိၵ်ႈမၢၼ်ႈၵေႃႈ ပေႃးၶဝ်ၶႂ်ႈလႆႈငိုၼ်းၵူၺ်း ၸင်ႇတီႉၺွပ်း။ ပေႃးလႆႈငိုၼ်းယဝ်ႉ ပွႆႇတူဝ်ၶိုၼ်းႁဵတ်းၼၼ်ဢေႃႈ”- ဝႃႈ ၼႆ။

သိုပ်ႇလၢတ်ႈဝႃႈ – “မိူဝ်ႈဝႃး ဝၼ်းတီႈ 6 ၼႆႉ သိုၵ်းမၢၼ်ႈၶဝ် တီႉၺွပ်း ၵူၼ်းၸၢဝ်းထႆး ၵေႃႉၼိုင်ႈ ၼၼ်ႉၵေႃႈ ယွၼ်းငိုၼ်းထႆး 7 သႅၼ်ဝၢတ်ႇသေ ပွႆႇလွတ်ႈၶိုၼ်းဢေႃႈ”- ဝႃႈၼႆ။

ဝဵင်းမိူင်းတူၼ်ၼႆႉ ပဵၼ်ဝဵင်းတိတ်းၸပ်းလႅၼ်လိၼ်တႆး – ထႆး ဝဵင်းၼိုင်ႈၵေႃႈၸႂ်ႈ ၸုမ်းယိပ်းၵွင်ႈၵၢင်ႉၵေႃႈ တူင်ႉၼိုင်ယူႇဝႆႉ လၢႆမူႇၸုမ်း။ မိူၼ်ၼင်ႇ ၸုမ်းၵျႃးၽႅၼ်ႉ တူင်ႉၼိုင်ၵႂႃႇမႃး ၸိူင်ႉၼႆၼႆႉ ပလိၵ်ႈမၢၼ်ႈသိုၵ်းမၢၼ်ႈၶဝ် ဢမ်ႇႁၼ်သႂ်ႇၸႂ်ႁႄႉႁၢမ်ႈသင်။ ယၢမ်းလဵဝ် ၸဝ်ႈႁၢၼ်ႉတၢင်းၶၢႆၶဝ် လႆႈငိုၼ်းၶဝ်ႈ လီ ၶိုၼ်ႈၵႃႈၶူဝ်းၵုၼ်ႇသေ ၶၢႆပၼ်ၸုမ်းၵျႃး ၽႅၼ်ႉလႄႈ ႁဵတ်းႁႂ်ႈတုမ်ႉတိူဝ်ႉ ၵူၼ်းပိုၼ်ႉတီႈ လႆႈသိုဝ်ႉၵႃႈယႂ်ႇၶၼ်သုင်ၸွမ်း။

မိူၼ်ၼႆၼင်ႇၵဝ်ႇ တီႈဝဵင်းလၢႆးၶႃႈ ၸိုင်ႈတႆးပွတ်းၸၢၼ်း ၼၼ်ႉၵေႃႈ ႁူဝ်ပီ 2024 ၼႆႉ ဢွၼ်ၵၼ် မႃးယူႇသဝ်းဝႆႉတၢင်းဝၢၼ်ႈႁႆး၊ မၢၼ်ႈပၢင်ႇ၊ ႁူဝ်ၼမ်ႉလႄႈ ၼႂ်းပိုၼ်ႉတီႈပျီႇတူႉၸိတ်ႉ 758 ၸိူဝ်းၼႆႉထႅင်ႈ တင်းၼမ် – ၵူၼ်းပိုၼ်ႉတီႈလၢတ်ႈ။

မိူဝ်ႈႁၢင်လိူၼ်သႅပ်ႊထႅမ်ႊပိူဝ်ႊ ၼၼ်ႉၵေႃႈ မိူင်းၶႄႇ မိပ်ႇဢီး သိုၵ်းမၢၼ်ႈ ႁႂ်ႈတီႉၺွပ်းၸုမ်းၵျႃးၽႅၼ်ႉ ပၼ်တီႈဝဵင်းမူႇ ၸေႊ ၸိုင်းတႆးပွတ်းႁွင်ႇ ၼၼ်ႉၵေႃႈ တီႉၺွပ်းလႆႈ ၼပ်ႉႁူဝ်ပၢၵ်ႇသေ သူင်ႇၸူးတၢင်း မိူင်းၶႄႇ။ ပေႃးပဵၼ်ၵူၼ်းမိူင်းႁူမ်ႈတုမ်သမ်ႉ သိုၵ်းမၢၼ်ႈ ၸႂ်ႉဢဝ်ငိုၼ်းၶႄႇ တေႃႇၵေႃႉ 20,000 ယႂၼ်ႊ ၵႂႃႇထုတ်ႇတူဝ်ဢွၵ်ႇ – ၵူၼ်းပိုၼ်ႉတီႈ မူႇၸေႊလၢတ်ႈ။