ဝၼ်းတီႈ 06/10/2024 ယၢမ်းၵၢင်ဝၼ်း 1 မူင်းၶိုင်ႈ သိုၵ်းမၢၼ်ႈ ဢဝ်ၶိူင်ႈမိၼ် မႃးပွႆႇမၢၵ်ႇတီႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။
မၢၵ်ႇတူၵ်းသႂ်ႇ တီႈပွၵ်ႉ 5 ၊ မၢၼ်ႈဢၢႆႇၼိူဝ် ႁိူၼ်းႁူဝ်ပဝ်ႈ ပျီႇတူႉၸိတ်ႉ ဢူးၸေႃႇမျိၼ်ႉ (ဉီးဇော်မြင်ႉ) ႁဵတ်းႁႂ်ႈၾႆးမႆႈ ႁိူၼ်းလႄႈ သိုင်ႇဝႆႉရူတ်ႉၵႃး၊ ၵူၼ်းမၢတ်ႇၸဵပ်း ၵေႃႉၼိုင်ႈ။
ၼၢင်းယိင်း ၵူၼ်းဝဵင်းလႃႈသဵဝ်ႈ ပၢႆႈၽေးသိုၵ်း ယူႇဝႆႉတီႈဝဵင်းၵေးသီး လၢတ်ႈၽူႈတွႆႇႁွၵ်ႈဝႃႈ – “လႅင်းၾူၼ်း တၢင်းလႃႈသဵဝ်ႈၵေႃႈ ဢမ်ႇလႆႈ၊ လႆႈႁူႉၶၢဝ်ႇငၢဝ်းၸွမ်းၸဝ်ႈၵႃး ဢၼ်ၵႂႃႇမႃးၼႆႉ၊ မိူဝ်ႈဝႃး သိုၵ်းမၢၼ်ႈပွႆႇမၢၵ်ႇတူၵ်း တိူဝ်ႉႁိူၼ်းပျီႇတူႉၸိတ်ႉ ဢူးၸေႃႇမျိၼ်ႉ”- ဝႃႈၼႆ။
မၼ်းၼၢင်း သိုပ်ႇလၢတ်ႈထႅင်ႈဝႃႈ တေႃႈလဵဝ် ၵပ်းၾူၼ်းၸူးတၢင်းလႃႈသဵဝ်ႈ ဢမ်ႇလႆႈ။ ၵူၼ်းမၢတ်ႇၸဵပ်း တုမ်ႉတိူဝ်ႉၼႆႉ ပဵၼ်ၵူၼ်းၸုမ်းသိုၵ်းၵဝ်ႈၵၢင်ႉ၊ လႆႈငိၼ်းဝႃႈ သိုၵ်းၵဝ်ႈၵၢင်ႉၶဝ် ယူႇသဝ်းတူင်ႉၼိုင်ဝႆႉတင်းၼၼ်ႉ ဝႃႈၼႆ။
မိူၼ်ၼႆ ၼင်ႇၵဝ်ႇ မိူဝ်ႈဝၼ်းတီႈ 05/10/2024 ယၢမ်းၵၢင်ၼႂ် 10:50 မူင်း ၼၼ်ႉၵေႃႈ သိုၵ်းမၢၼ်ႈ ဢဝ်ၶိူင်ႈမိၼ်မႃးပွႆႇမၢၵ်ႇ 3 လုၵ်ႈ တုမ်ႉတိူဝ်ႉႁူင်းႁဵၼ်း၊ ၸၼ်ႉၸွမ်ဝဵင်းလႃႈသဵဝ်ႈလႄႈ ႁိူၼ်းယေး ၵူၼ်းပိုၼ်ႉတီႈလူႉၵွႆ။
တႄႇႁၢင် လိူၼ်သႅပ်ႊထႅမ်ႊပိူဝ်ႊၼၼ်ႉမႃး ဢမ်ႇပဵၼ်ပၢင်တိုၵ်းသင်သေ သိုၵ်းမၢၼ်ႈ ပွႆႇမၢၵ်ႇၾၢႆႇလဵဝ် တီႈဝဵင်းလႃႈသဵဝ်ႈ ၵူႈဝၼ်းလႄႈ ၵူၼ်းပိုၼ်ႉတီႈ ပဵၼ်ဢၼ်မႆႈၸႂ် တုမ်ႉတိူဝ်ႉပၢႆးတူဝ်ပၢႆးၸႂ်။
ၼၢင်းယိင်း ပၢႆႈၽေးသိုၵ်း လၢတ်ႈထႅင်ႈဝႃႈ -“ၵူၼ်းၼႂ်းဝဵင်းၵေႃႈ ဢမ်ႇၸၢင်ႈပၢႆႈမႃး။ ပိူၼ်ႈဢမ်ႇမီးငိုၼ်းပၢႆႈ ထႅင်ႈပွၵ်ႈ ၼိုင်ႈ၊ ၵႃႈၵႃးၵေႃႈ ၵႃႈၼႃႇ”- ဝႃႈၼႆ။
လိူၼ်သႅပ်ႊထႅမ်ႊပိူဝ်ႊ ၼႂ်းၶၢဝ်းတၢင်းၼိုင်ႈလိူၼ်ၼၼ်ႉ သိုၵ်းမၢၼ်ႈ ပွႆႇမၢၵ်ႇတီႈဝဵင်းလႃႈသဵဝ်ႈလႄႈ ၵူၼ်းပိုၼ်ႉတီႈ လူႉတၢႆၸမ် 10 ၊ မၢတ်ႇၸဵပ်း 40 ပၢႆ – ၵူၼ်းပိုၼ်ႉတီႈ လၢတ်ႈၼင်ႇၼႆ။
တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ