မိူဝ်ႈၼႆႉ ဝၼ်းတီႈ 06/10/2024 ယၢမ်းဝၢႆးဝၼ်း 2 မူင်း လုၵ်ႈဢွၼ်ႇသွင်ၵေႃႉ သွၼ်ႉရူတ်ႉၶိူင်ႈ မႃးၸွမ်းၵၼ် လမ်းၼိုင်ႈ ၺႃးၸူၼ် တီႈၼႃႈလုမ်းၾၢႆႇၶႄၾႆး ပွၵ်ႉၵၢတ်ႇ ဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ် လိၼ်တႆး – ၶႄႇ သုမ်းၵႂႃႇရူတ်ႉၶိူင်ႈ လမ်းၼိုင်ႈ။

ၵူၼ်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ၺႃးၸူၼ်တႄႉၶႃႈ။ လုၵ်ႈဢွၼ်ႇသွင်ၵေႃႉ ႁေႃႈရူတ်ႉၶိူင်ႈ သွၼ်ႉမႃးၸွမ်းၵၼ်သေ ၺႃးၸူၼ် တီႈၼႃႈလုမ်းၾၢႆႇၶႄၾႆး ပွၵ်ႉၵၢတ်ႇ။ ၵူၼ်းႁၢႆႉၼၼ်ႉ ဢဝ်ၽႃႉငႃၶဝ်သေ ၸူၼ်ရူတ်ႉၶိူင်ႈ ၶဝ်ၵႂႃႇၸိူင်ႉၼၼ်။ ၵူၼ်းႁၢႆႉၼၼ်ႉ မႃးႁဵတ်းႁိုဝ်လႄႈ ၸူၼ်ရူတ်ႉၶိူင်ႈၶဝ်ၵႂႃႇတႄႉ ပႆႇလႆႈႁူႉႁူဝ်ယွႆႈမၼ်းလီလီ ”- ဝႃႈၼႆ။

ယၢမ်းလဵဝ် တီႈဝဵင်းမူႇၸေႊၼႆႉ လႆႈဝႃႈၵူၼ်းမိူင်းၺႃးၸူၼ်ႁိမ်ဢဝ် ရူတ်ႉၶိူင်ႈ ၸွမ်းသဵၼ်ႈတၢင်း ၸိူင်ႉၼႆၼႆႉ ၶႂ်ႈမီးမႃးၵူႈဝၼ်းယဝ်ႉ။ ၵမ်ႈၼမ် ၵူၼ်းၸူၼ်ၼၼ်ႉ တေသွၼ်ႉရူတ်ႉၶိူင်ႈမႃးၸွမ်းၵၼ် 2 – 3 ၵေႃႉ သႂ်ႇ မၢၵ်ႇႁူဝ် ပႃးမိတ်ႈ/ လႅဝ်း ဢမ်ႇၼၼ် ပႃးၵွင်ႈပွတ်း ၸပ်းတူဝ်ဝႆႉ။ သင်ဝႃႈ တီႈလႂ်သင်ထုၵ်ႇတႃႇၶဝ်ၼႆ တေ ဢဝ်မိတ်ႈလႅဝ်း၊ ၵွင်ႈငႃသေ ၸူၼ်ႁိမ်ၵႂႃႇ ၼႆယဝ်ႉ။

“ပူၼ်ႉမႃး ပႆႇႁိုင်သင် တီႈပွၵ်ႉၶရိတ်ႉယၢၼ်ႇ ဢၼ်ၸၢပ်ႈၵၼ်တင်းပွၵ်ႉၵၢတ်ႇၼႆႉ ၼၼ်ႉၵေႃႈ ၵူၼ်းမိူင်း ၺႃးၸူၼ်။ မိူဝ်ႈႁၢင်လိူၼ်ပူၼ်ႉမႃးၼႆႉ လုၵ်ႈႁဵၼ်းၶႄႇ သွင်ပီႈၼွင်ႉၼၼ်ႉၵေႃႈ ၺႃးၸူၼ် တီႈပွၵ်ႉၼိူဝ် သုမ်းၵႂႃႇရူတ်ႉၶိူင်ႈလႄႈ ၾူၼ်းလုၵ်ႈၼိုင်ႈ။ ၼႂ်းၵႄႈၽူၺ်းႁုင်း – မူႇၸေႊ ၸိူဝ်းၼၼ်ႉၵေႃႈ ၵႆႉၺႃးၼႃႇ။ တီႈႁူဝ်ၼႃႈၵၢတ်ႇ ၸိူဝ်းၼၼ်ႉသေ လွင်ႈၵၢၼ်ၸူၼ်ၸိူင်ႉၼႆၼႆႉ ၶႂ်ႈဝႃႈမီးၵူႈဝၼ်းယဝ်ႉ ဢၼ်ႁဝ်းၶႃႈ ဢမ်ႇႁူႉၵေႃႈ တေမီးထႅင်ႈတင်းၼမ်”- ၵူၼ်းမူႇ ၸေႊ သိုပ်ႇလၢတ်ႈၼႄၼင်ႇၼႆ။

ၸူဝ်ႈသိုၵ်းမၢၼ်ႈ ယိုတ်းမိူင်းမႃး ၶၢဝ်းတၢင်း 3 ပီပၢႆၼႆႉ ယိင်ႈၶႅၼ်းႁဵတ်းႁႂ်ႈၽူႈလၵ်ႉၸၵ်ႉၶုတ်ႈ လိူင်ႇၼမ်ႁႅင်း။ ယၢမ်းလဵဝ် တီႈဝဵင်းမူႇၸေႊၼႆႉ ၵူၼ်းမိူင်းၵႆႉၺႃးၸူၼ်မႃး ၶိူဝ်းယႂ်း ဢမ်ႇဝႃႈၶၢဝ်းယၢမ်းလၢႆ။

ပူၼ်ႉမႃး မိူဝ်ႈဝၼ်းတီႈ 26/09/2024 ယၢမ်းၵၢင်ဝၼ်း 11 မူင်းပၢႆ ဢွၼ်ႇႁဵၼ်းသွင်ပီႈၼွင်ႉ ၺႃးၸူၼ်ၸွမ်း တၢင်း တီႈၾၢႆႇၼႃႈ ယေးငိုၼ်းၵမ်ႇပေႃးၸ မၢႆ (1) ပွၵ်ႉၼိူဝ် သုမ်းၵႂႃႇ ၾူၼ်းလုၵ်ႈၼိုင်ႈလႄႈ ရူတ်ႉၶိူင်ႈလမ်းၼိုင်ႈ။  

မိူဝ်ႈဝၼ်းတီႈ 14/09/2024 ယၢမ်းၵၢင်ၶမ်ႈ 6 မူင်း ၼုမ်ႇၸၢႆးဢွၼ်ႇ ဢႃယု 15 ပီ ၵေႃႉၼိုင်ႈ ၺႃးၸုမ်းဢမ်ႇႁူႉၾၢႆႇ ၸူၼ်ဢဝ်ရူတ်ႉၶိူင်ႈမၼ်းၸၢႆးၵႂႃႇသေဢမ်ႇၵႃး ပၢႆယိုဝ်းတၢႆပႅတ်ႈထႅင်ႈ တီႈၵွင်းၼၢမ်ႇသႃႇ ပွၵ်ႉၵၢတ်ႇ။

ၵွပ်ႈၼႆလႄႈ သင်ပဵၼ်လႆႈ ႁႂ်ႈဢွၼ်ၵၼ်ၾၢင်ႉ (သတိ) သင်မီးၵူၼ်းသွၼ်ႉရူတ်ႉၶိူင်ႈမႃးၸွမ်းၵၼ် 2-3 ၵေႃႉ ပဵၼ်ၽူႈ ၸၢႆး သႂ်ႇမၢၵ်ႇႁူဝ် ၸိူဝ်းၼႆႉ။ ယဝ်ႉၵေႃႈ တၢင်းၼႃႈႁိူၼ်း ၸွင်ႇမီးၵႃးမႃးၵိုတ်းဝႆႉ ပေႃးမႃးၵိုတ်း ၼႂ်းၵႃးၼၼ်ႉ ၸွင်ႇမီးၵူၼ်း။ ယဝ်ႉၵေႃႈ ၵႃးၵိုတ်းဝႆႉ ဢၼ်ဢမ်ႇၸမ်ဢမ်ႇၵႆႁိူၼ်း ၸိူဝ်းၼႆႉထႅင်ႈ။ သင်ဝႃႈ တေဢွၵ်ႇႁိူၼ်းၸိုင် ႁႂ်ႈတူၺ်းသၢႆႉတူၺ်းၶႂႃႇသေၵႂႃႇ။ ယၢမ်းႁူဝ်ၼႂ်ႁူဝ်ၶမ်း ၸိူဝ်းၼႆႉ သင်ပဵၼ်လႆႈ ဢမ်ႇထုၵ်ႇလီဢွၵ်ႇႁိူၼ်း၊ လုၵ်ႈဢွၼ်ႇ ၸိူဝ်းၼႆႉၵေႃႈ ဢမ်ႇထုၵ်ႇလီပၼ်ႁေႃႈရူတ်ႉၶိူင်ႈၵႂႃႇမႃးႁင်းၵူၺ်း။ ဢွင်ႈတီႈ ၼႂ်းၵိဝ်ႇသဵၼ်ႈတၢင်း လပ်းသိင်ႇ တီႈၵူၼ်းဢမ်ႇပေႃးၵႂႃႇမႃးၼမ်ၼၼ်ႉ ယႃႇပေၵႂႃႇမႃးလႃးလႃး။ ၸိူဝ်းမီးရူတ်ႉၶိူင်ႈ ဢၼ်ၶႅမ်ႉ(ဢၼ်လီ) ၸိူဝ်းၼႆႉ ႁႂ်ႈၾၢင်ႉၵၼ် – ၵူၼ်းပိုၼ်ႉတီႈ ဝဵင်းမူႇၸေႊလၢတ်ႈ။