ဝၼ်းတီႈ 05/10/2024 ယၢမ်းၵၢင်ၶမ်ႈ 9:45 သိုၵ်းမၢၼ်ႈ ယိုတ်းမိူင်း ဢဝ်ၶိူင်ႈမိၼ် မႃးပွႆႇမၢၵ်ႇတီႈဝဵင်းသီႇပေႃႉ တူၵ်းသႂ်ႇႁိူၼ်းယေးၵူၼ်းမိူင်း ၺႃးၾႆးမႆႈလူႉၵွႆ 3 လင် ၵူၼ်းႁၢႆဝႆႉ ၵေႃႉၼိုင်ႈ။
မၢၵ်ႇသိုၵ်းမၢၼ်ႈ တူၵ်းသႂ်ႇႁၢၼ်ႉၶၢႆၶဝ်ႈမုၼ်းသၢၼ်ႇပျုႉ (စံပြမုန်ႉဆိုင်)လႄႈ ႁၢၼ်ႉၶၢႆၶဝ်ႈၽၵ်း မေႉပႃႇၼၢႆႇ (မေႉပါနိုင် ထမင်းဆိုင်) ၺႃးၾႆးမႆႈလူႉၵွႆသေ ၵူဝ်ႇၼၢႆႇတဵင်း (ကိုနိုင်သိန်း) ၽူႈၸၢႆးဢႃယု သႅၼ်းပၢၼ်ၶၢဝ်ႉ ႁၢႆဝႆႉ ယူႇတီႈ ၸုမ်း ၸွႆႈထႅမ်ပရႁိတ တႅမ်ႈတၢင်ႇဝႆႉၼင်ႇၼႆ။
“ယၢမ်းလဵဝ် တီႈဝဵင်းသီႇပေႃႉၼၼ်ႉ လႅင်းၾူၼ်းၶၢတ်ႇဝႆႉ။ ၵပ်းသိုပ်ႇၸူး ၵူၼ်းတင်းႁိူၼ်းၵေႃႈ ဢမ်ႇလႆႈ ပဵၼ်ဢၼ်မႆႈၸႂ်ဝႆႉဢေႃႈ”- ၼၢင်းယိင်း ဢႃယု 28 ပီ ဢၼ်ပၢႆႈၽေးသိုၵ်း ႁွတ်ႈၽႅဝ်ဝႆႉတီႈ ဝဵင်းၶူဝ်လမ် လၢတ်ႈတီႈၽူႈတွႆႇႁွၵ်ႈဝႆႉၼင်ႇၼႆ။
တႄႇဢဝ် ဝၼ်းတီႈ 28-30/09/2024 ၶၢဝ်းတၢင်း 3 ဝၼ်းၼႆႉ သိုၵ်းမၢၼ်ႈ မႃးပွႆႇမၢၵ်ႇ တီႈဝဵင်းသီႇပေႃႉ ၵူၼ်းမိူင်းလူႉတၢႆ 4 ၵေႃႉ၊ မၢတ်ႇၸဵပ်း 11 ၵေႃႉ – ယူႇတီႈ တပ်ႉသိုၵ်းတဢၢင်း TNLA ပိုၼ်ၽၢဝ်ႇ ဢွၵ်ႇဝႆႉၼင်ႇၼႆ။
မိူဝ်ႈႁၢင်လိူၼ်သႅပ်ႊထႅမ်ႊပိူဝ်ႊၼၼ်ႉ သိုၵ်းတဢၢင်းႁူမ်ႈတင်း ၸုမ်းဢူၺ်းလီသေ ယိုဝ်းတိုၵ်းလႆႈတပ်ႉ ၶမယ 503 ၊ 504 ။ ယၢမ်းလဵဝ် တင်းသွင်ၾၢႆႇ တိုၵ်ႉသိုပ်ႇပဵၼ်ပၢင်တိုၵ်းၵၼ်ဝႆႉ ႁၢဝ်ႈႁႅင်းယူႇ ဝႃႈၼႆ။
တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ