မိူဝ်ႈၼႆႉ ဝၼ်းတီႈ 06/10/2024 ယၢမ်းၵၢင်ၼႂ် 10 မူင်းပၢႆ ၾႆးမႆႈႁိူၼ်းယေးၵူၼ်းမိူင်း တီႈၵွင်းလွႆသူၺ်ႇၵျွင်း ပွၵ်ႉၼိူဝ် ဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ သွင်လင်တိတ်းၵၼ် ၶူဝ်းႁိူၼ်းယေး ဢမ်ႇတၼ်းလႆႈသင် ထုၵ်ႇ ၾႆးမႆႈမူတ်း ဝႃႈၼႆ။
ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “လႆႈငိၼ်းဝႃႈ ၾႆးတႄႇမႆႈ တီႈမေႃႈၾႆးၾႃႉ တူမ်ႈၼိူဝ်ႉၵႆႇဝႆႉသေ လိုမ်းပိၵ်ႉၾႆး ယွၼ်ႉပဵၼ်ဝၼ်းၵိူတ်ႇလုၵ်ႈၸၢႆးၼႆသေ ၵႂႃႇၵၢပ်ႇသွမ်းဝၼ်း(သွမ်းပဵၼ်း) တီႈဝတ်ႉပီႇတေႃႇတႃႇ။ ၾႆးၼႆႉ တႄႇမႆႈမႃးတီႈႁိူၼ်းၽႃ (ႁိူၼ်းမႆႉ) မႃးဢွၼ်တၢင်းသေ လၢမ်းမႆႈပႃးႁိူၼ်းဢုတ်ႇဢၼ်တိတ်းၸပ်း ၵၼ်ဝႆႉ ၼၼ်ႉထႅင်ႈ လင်ၼိုင်ႈ။ ၾႆးၼႆႉ မႆႈဝႆးၼႃႇၶႃႈ”- ဝႃႈၼႆ။
ဢိင်ၼိူဝ် လွင်ႈၼႆႉသေ လွင်ႈတုမ်ႉတိူဝ်ႉ ၵူၼ်းမၢတ်ႇၸဵပ်းလူႉတၢႆတႄႉ ဢမ်ႇမီး။ ၵူၺ်းၵႃႈ လွင်ႈလူႉသုမ်း တင်းမူတ်း မီးၵႃႈႁိုဝ်တႄႉ ပႆႇလႆႈႁူႉႁူဝ်ယွႆႈမၼ်း ဝႃႈၼႆ။
“ႁိူၼ်းၵူၼ်းမိူင်းသွင်လင် ဢၼ်ၺႃးၾႆးမႆႈၵႂႃႇၼၼ်ႉ မၼ်းယူႇတိတ်းၸပ်းၵၼ် ၶႅၼ်ႈႁူဝ်ႉၵၼ်ဝႆႉၸိူင်ႉ ၼၼ်ၵူၺ်း။ ၸဝ်ႈၶွင်ႁိူၼ်းသွင်လင်ၼၼ်ႉပဵၼ် ၸၢႆးဢၢႆႈဢူးလႄႈ ၼၢင်းၸၢမ် ယဝ်ႉၵေႃႈ ၸၢႆးဢႃးသျႅင်ႇလႄႈ ၼၢင်းဢွင်ႇၶိၼ်ႇ”- ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈၼင်ႇၼႆ။
ၵဵဝ်ႇလူၺ်ႈ လွင်ႈၾႆးမႆႈၼႆႉသေ ယူႇတီႈ ၵူၼ်းၼႂ်းပွၵ်ႉၼႂ်းယွမ်ႇလႄႈ ရူတ်ႉၵႃးၶႄၾႆး ၸိူဝ်းၼႆႉ ႁူမ်ႈၵၼ် ၸွႆႈၶႄၾႆးမွတ်ႇၵႂႃႇ ဝႃႈၼႆ။
ပူၼ်ႉမႃး မိူဝ်ႈဝၼ်းတီႈ 12/07/2024 ယၢမ်းႁူဝ်ၶမ်ႈ 6:20 မူင်း ၼၼ်ႉၵေႃႈ ၾႆးမႆႈႁိူၼ်းယေး ၵူၼ်းဝၢၼ်ႈသေးတၢၼ်း ပွၵ်ႉ 5 ဝဵင်းၵဵင်းတွင်း ၸိုင်ႈတႆးပွတ်းၸၢၼ်း လင်ၼိုင်ႈ ယွၼ်ႉၾႆးၾႃႉသျွတ်ႉသေ ထုၵ်ႇမႆႈ ပႅတ်ႈတင်းလင် လူႉသုမ်းဢမ်ႇယွမ်း 300 သႅၼ်ပျႃး၊ လွင်ႈတုမ်ႉတိူဝ်ႉၵူၼ်းႁိူၼ်းယေး လူႉတၢႆမၢတ်ႇၸဵပ်း ဢမ်ႇမီး။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ