ႁူဝ်လိူၼ်ဢွၵ်ႊထူဝ်ႊပိူဝ်ႊၼႆႉ ၾူၼ်တူၵ်းႁႃႇယႂ်ႇထႅင်ႈ ၼမ်ႉလၢတ်ႈ ၼွင်းထူမ်ႈ ပွၵ်ႉ 1 ဝဵင်းၼမ်ႉၸၢင် ၸိုင်ႈတႆး ပွတ်း ၸၢၼ်း ထႅင်ႈပွၵ်ႈၵမ်း 2 ။

ဝၼ်းတီႈ 04 – 05/10/2024 ၼႆႉ ၼမ်ႉလၢတ်ႈၼွင်းယႂ်ႇထႅင်ႈ ၵမ်းၼိုင်ႈသေ ထူမ်ႈၶဝ်ႈၼႂ်းပွၵ်ႉၼႂ်းယွမ်ႇ ၸိူဝ်းယူႇႁိမ်း ၾင်ႇလႄႈ တီႈတႅမ်ႇတီႈယၢၼ်း ၼႂ်းဝဵင်းၼမ်ႉၸၢင်။

ၼၢင်းယိင်း ဢႃယု 40 ပီ ၵူၼ်းပိုၼ်ႉတီႈ ယူႇဝဵင်းၼမ်ႉၸၢင် လၢတ်ႈၽူႈတွႆႇႁွၵ်ႈဝႃႈ -“ၼမ်ႉထူမ်ႈၵၢင်လိူၼ် ပူၼ်ႉမႃးမွၵ်ႈ 2 ဝူင်ႈသေ ၼမ်ႉယွမ်းလူင်းၵႂႃႇ။ ႁဝ်းမိူဝ်းၽဵဝ်ႈႁိူၼ်းႁဝ်း ယင်းပႆႇယဝ်ႉ ၼမ်ႉပေႃးၶိုၼ်ႈမႃး ထႅင်ႈယူႇယဝ်ႉ။ ပွၵ်ႈၵမ်းၼႆႉၵေႃႈ ၼမ်ႉထူမ်ႈသုင်မိူၼ်မိူဝ်ႈၵမ်းဢွၼ်တၢင်း”- ဝႃႈၼႆ။

ၼမ်ႉထူမ်ႈ ၵမ်းပူၼ်ႉမႃးၼႆႉ ၽႂ်ၵေႃႈ ဢမ်ႇတၼ်းလႆႈၾင်ႉတူဝ် ဢမ်ႇတၼ်းလႆႈဢဝ်ၶူဝ်းၶွင်သင်။ ပွၵ်ႈၵမ်းၼႆႉတႄႉ ပေႃးၾႃႉၵမ်ႇလမ် ၾူၼ်တေတူၵ်းၵေႃႈ ၼႅတ်ႈဢွၼ်ၵၼ်ၶၢႆႉၶူဝ်းဝႆႉတီႈသုင်လႄႈ ဢမ်ႇပေႃး လူႉသုမ်းၼမ် မၼ်းၼၢင်းလၢတ်ႈၼႄၼင်ႇၼႆ။

“မိူဝ်ႈၵမ်းပူၼ်ႉ ဢမ်ႇထၢင်ႇၼမ်ႉတေထူမ်ႈႁႅင်းလႄႈ ဢမ်ႇတၼ်းလႆႈဢဝ်ၶူဝ်းၶွင်သင်။ ၶူဝ်းၼုင်ႈတၢင်းဝႆ၊ တၢင်းၵိၼ်တင်းယႅမ်ႉ၊ TV ၊ တူႈယဵၼ် – ၶူဝ်းဢၼ်ဝႆႉတႂ်ႈလၢင်ႈႁိူၼ်းတင်းမူတ်း ၵွႆႇမူတ်း၊ ၼမ်ႉၵေႃႈမဵၼ် ၵူမ်ၼႃ၊ ဢမ်ႇလီဢဝ်သင်။ ႁဝ်းၶႃႈသမ်ႉ ၵႃႉၶၢႆၽႃႈႁူမ်ႇၶူဝ်းၼွၼ်း၊ ပေႃးၼမ်ႉထူမ်ႈၺႃးၶူဝ်းၶၢႆၵေႃႈ ဢမ်ႇၸၢင်ႈဢဝ်ၶၢႆၶိုၼ်းလႄႈ သုမ်းမူတ်းဢေႃႈ၊ ပွၵ်ႈၼႆႉတႄႉ ပေႃးၼႃႈၾႃႉတႃၾူၼ်လမ်ၵမ်ႇမႃး  ၵူၼ်းၼႂ်းပွၵ်ႉ ဢွၼ်ၵၼ် တေႃႉၶူဝ်းတေႃႉလဵင်း ၵႂႃႇဝႆႉတီႈလွတ်ႈၽေး”- ဝႃႈၼႆ။

ဝူင်ႈပူၼ်ႉမႃးၼႆႉ ၽူႈလူင်ႉလႅၼ်ႇ ၾၢႆႇလၢမ်းၶၢတ်ႈ ၾိင်ႈၾႃႉရႃႇသီႇ ၶဝ်ၵေႃႈ တႅမ်ႈတၢင်ႇပိုၼ်ၽၢဝ်ႇပၼ် ၾၢင်ႉဝႆႉယူႇဝႃႈ – 30/09/2024 တေႃႇထိုင် 05/10/2024 ၼႆႉ ၾူၼ်တေတူၵ်းႁႅင်းလႄႈ ၼမ်ႉတေထူမ်ႈၼႂ်း မိူင်းတႆးပွတ်းၸၢၼ်း ႁၢဝ်ႈႁႅင်းထႅင်ႈ ၵမ်းၼိုင်ႈ။ ၵွပ်ႈၼႆ ၸိူဝ်းယူႇႁိမ်းၸမ်ၾင်ႇၼမ်ႉလႄႈ တီႈတႅမ်ႇတီႈ ယၢၼ်း ႁႂ်ႈၶၢႆႉၶူဝ်းဝႆႉတီႈသုင် ဝႃႈၼႆ။

ၵူၺ်းၵႃႈ ယွၼ်ႉပိူဝ်ႈၼမ်ႉထူမ်ႈသေလႄႈ ၾၢႆႇၾႆးၾႃႉၼႂ်းမိူင်းတႆးပွတ်းၸၢၼ်း တတ်းသၢႆၾူၼ်း သၢႆၾႆးဝႆႉ။ တေႃႇထိုင်ယၢမ်းလဵဝ် မၢင်ဝဵင်းယင်းပႆႇၸၢင်ႈၸႂ်ႉၾူၼ်းၶိုၼ်းလႆႈလီ။   

ယၢမ်းလဵဝ် ႁူဝ်လိူၼ်ဢွၵ်ႊထူဝ်ႊပိူဝ်ႊၼႆႉ ၾူၼ်တူၵ်းလႄႈ ၼမ်ႉၶိုၼ်းထူမ်ႈ တီႈဝဵင်းယွင်ႁူၺ်ႈ၊ ထုင်ႉပူင်း ၊ ၼွင်ႁၢႆးယႃႈ၊ ၵၢတ်ႇလေႃႉ၊ ၼမ်ႉၸၢင်၊ မိူင်းၵိုင်၊ လၢင်းၶိူဝ်း ၸိူဝ်းယူႇၸွမ်းသၢႆၼမ်ႉၵေးၼမ်ႉ။

ဢိင်ၼိူဝ် ႁႅင်းလူမ်းမႆႈ ဢၼ်ပႃးဢၢႆၾူၼ် လူင်းတႅမ်ႇ လုၵ်ႉတၢင်းမိူင်းၶႄႇလူင်းမႃး သုမ်ႇထိုင်မိူင်းတႆး ပွတ်းဢွၵ်ႇ – ပွတ်းၸၢၼ်း ဢိၵ်ႇပႃးတၢင်းတွၼ်ႈဝၼ်းႁွင်ႇ မိူင်းထႆး (ၽၢၵ်ႈၼိူဝ်) ၾူၼ်တူၵ်းႁႅင်း။ ႁဵတ်းႁႂ်ႈမႄႈၼမ်ႉ – ၵေးၼမ်ႉ ၼႂ်း ၸႄႈတွၼ်ႈၵဵင်းႁၢႆး – ၵဵင်းမႂ်ႇ ၼွင်းလူၼ်ႉၾင်ႇ၊ ၼမ်ႉပႃႇၼမ်ႉလွႆ ၼွင်းထူမ်ႈၶဝ်ႈဝၢၼ်ႈၶဝ်ႈဝဵင်းသေ ဝၼ်းတီႈ 04-05/10/2024 ၼႆႉ ၼမ်ႉပိင်းၼွင်းထူမ်ႈ ဝဵင်းၵဵင်းမႂ်ႇ ႁၢဝ်ႈႁႅင်း။

 ၸုၸုၸၢၼ်ႇ ၽူႈလူင်ႉလႅၼ်ႇၾၢႆႇၾိင်ႈၾႃႉရႃႇသီႇ ပိုၼ်ၽၢဝ်ႇပၼ်ၾၢင်ႉဝႆႉထႅင်ႈဝႃႈ –  ဝၼ်းတီႈ 08 – 11/10/2024 ၼႆႉ တီႈၼႃႈၼမ်ႉပၢင်ႇလၢႆႇ ပင်းၵလႃး ၸၢင်ႈမီးလူမ်းလႅင်ႉဢွၼ်ႇထႅင်ႈလုၵ်ႈၼိုင်ႈ – ဝႃႈၼႆဝႆႉ။ ၵူၺ်းၵႃႈ သင်ၸိူဝ်ႉဝႃႈ မီးလူမ်းလႅင်ႉတၢင်းၼၼ်ႉၶဝ်ႈမႃးတႄႉ ဢၼ်ၸၢင်ႈတုမ်ႉတိူဝ်ႉလႆႈ တေပဵၼ်မိူင်းရၶႅင်ႇ၊ မိူင်းၶျၢင်း ၸိူဝ်းၼႆႉၵူၺ်းၼင်ႇ ၵဝ်ႇ ဝႃႈၼႆ။

တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)