မိူဝ်ႈၼႆႉ ဝၼ်းတီႈ 05/10/2024 ယၢမ်းၵၢင်ၼႂ် 10:50 မူင်း သိုၵ်းမၢၼ်ႈ ယိုတ်းမိူင်း ၸႂ်ႉၶိူင်ႈမိၼ်တိုၵ်း မႃးပွႆႇမၢၵ်ႇထႅင်ႈ တီႈၸၼ်ႉၸွမ်ၶွမ်ႊပိဝ်ႊတိူဝ်ႊ ဢိူင်ႇမႄႈႁၢၼ်ႇ ဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ၸၢၵ်ႇမၢၵ်ႇတိူဝ်ႉၺႃး ၸၼ်ႉၸွမ်လူႉၵွႆတင်းၼမ်လၢႆ လွင်ႈတုမ်ႉတိူဝ်ႉၵူၼ်းမၢတ်ႇၸဵပ်းလူႉတၢႆ ဢမ်ႇမီး။

ၵူၼ်းဝဵင်းလႃႈသဵဝ်ႈ ၽူႈယိင်း ဢႃယု 40 ပၢႆ ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ပဵၼ်ၶိူင်ႈ မိၼ်သိုၵ်းမၢၼ်ႈ မႃးပွႆႇမၢၵ်ႇထႅင်ႈ တီႈၸၼ်ႉၸွမ်ၶွမ်ႊပိဝ်ႊတိူဝ်ႊ 3 လုၵ်ႈဢေႃႈ။ မၢၵ်ႇၼၼ်ႉ မႃးတူၵ်းတိူဝ်ႉသႂ်ႇ တီႈၸၼ်ႉၸွမ်ၼၼ်ႉ လူႉၵွႆတင်းၼမ်ၶႃႈယဝ်ႉ လွင်ႈၵူၼ်းလူႉတၢႆ မၢတ်ႇၸဵပ်းတႄႉ ဢမ်ႇမီးၶႃႈ။ ၶၢဝ်းတၢင်း 2 ဝၼ်းမႃးၼႆႉ သိုၵ်းမၢၼ်ႈၶဝ်မႃးပွႆႇမၢၵ်ႇသႂ်ႇ တီႈဝဵင်းလႃႈသဵဝ်ႈ ဢမ်ႇယွမ်း 7 လုၵ်ႈယဝ်ႉ”- ဝႃႈၼႆ။

ၸၼ်ႉၸွမ်ၶွမ်ႊပိဝ်ႊတိူဝ်ႊ ဝဵင်းလႃႈသဵဝ်ႈၼႆႉ မီးဝႆႉတၢင်းၶဝ်ႈဢွၵ်ႇဝဵင်း ယဝ်ႉၵေႃႈ မီးၾၢႆႇၸၢၼ်းဝဵင်းလႃႈ သဵဝ်ႈလႄႈ မီးၼိူဝ်သဵၼ်ႈတၢင်းလူင် လႃႈသဵဝ်ႈ – ဝဵင်းလိူဝ်ႇ ဝႃႈၼႆ။

မိူဝ်ႈဝႃး ဝၼ်းတီႈ 4 ယၢမ်းၵၢင်ၼႂ် 2 မူင်းပၢႆ မၢၵ်ႇၶိူင်ႈမိၼ်သိုၵ်းမၢၼ်ႈ မႃးပွႆႇတီႈပွၵ်ႉ 5 တင်း ပွၵ်ႉ 8 ၼႂ်းဝဵင်းလႃႈသဵဝ်ႈ တင်းမူတ်း 4 လုၵ်ႈ။ ၼႂ်းၼၼ်ႉ တိူဝ်ႉၺႃးၵျွင်းၽြႃးၶႄႇ (တရုတ်ဘုံကျောင်း) လူႉၵွႆလႅဝ်ၽႅဝ်ႉ တင်းမူတ်း ယဝ်ႉၵေႃႈ တိူဝ်ႉၺႃးႁူင်းသဝ်း၊ ႁိူၼ်းယေး ၵူၼ်းမိူင်းလူႉၵွႆၸွမ်းထႅင်ႈၼမ်၊ ၸၢၵ်ႇမၢၵ်ႇတိူဝ်ႉ ၺႃးၵူၼ်းမိူင်းမၢတ်ႇၸဵပ်းၼိုင်ႈၵေႃႉ ၼႆယဝ်ႉ။

တီႈဝဵင်းလႃႈသဵဝ်ႈၼႆႉ တႄႇဢဝ်လိူၼ်သႅပ်ႊထႅမ်ႊပိူဝ်ႊၼၼ်ႉမႃး ႁၢၼ်ႉတေႃႇထိုင် ႁူဝ်လိူၼ်ဢွၵ်ႊထူဝ်ႊပိူဝ်ႊ ဝူင်ႈထီႉ ၼိုင်ႈၼႆႉ သိုၵ်းမၢၼ်ႈ ၸႂ်ႉၶိူင်ႈမိၼ်မႃးပွႆႇမၢၵ်ႇသႂ်ႇ ဢမ်ႇယွမ်း 10 ၵမ်း တိူဝ်ႉၺႃး ၵူၼ်းမိူင်းလူႉတၢႆမွၵ်ႈ 10 မၢတ်ႇၸဵပ်းထႅင်ႈတင်းၼမ် – ၵူၼ်းပိုၼ်ႉတီႈလၢတ်ႈ။

တႄႇဢဝ် လိူၼ်ၵျူႊလၢႆႊၼၼ်ႉမႃး တေႃႇထိုင်လိူၼ်သႅပ်ႊထႅမ်ႊပိူဝ်ႊၼႆႉ သိုၵ်းမၢၼ်ႈ ၸႂ်ႉၶိူင်ႈမိၼ်တိုၵ်း မႃးပွႆႇမၢၵ်ႇ ၼႂ်းၼႃႈလိၼ်ၽွင်းငမ်းတူဝ်ၵဝ်ႇ ၶိုၵ်ႉတွၼ်းမၢႆ 1 ၵဝ်ႈၵၢင်ႉ (MNDAA) တင်းမူတ်း 25 ၵမ်း တိူဝ်ႉၺႃး ၵူၼ်းမိူင်းလူႉတၢႆ ဢမ်ႇယွမ်း 30 ၵေႃႉ မၢတ်ႇၸဵပ်း 90 ၵေႃႉ – The Kokang ဢွၵ်ႇဝႆႉၼင်ႇၼႆ။