သိုၵ်းမၢၼ်ႈ ၸႂ်ႉဢဵၼ်ႁႅင်း ၵူၼ်း 4 မိုၼ်ႇပၢႆ (42,000) သေ ၵဵပ်းသဵၼ်ႈမၢႆႁူဝ်ၵူၼ်း တူဝ်ႈမိူင်းမၢၼ်ႈ ပတ်းပိုၼ်ႉ။ တေၵဵပ်းဢဝ် တႄႇဝၼ်းတီႈ 1 တေႃႇထိုင် 15 လိူၼ်ဢွၵ်ႊထူဝ်ႊပိူဝ်ႊၼႆႉ – ဝႃႈၼႆ။
ၽူႈမီးပုၼ်ႈၽွၼ်း ၾၢႆႇထတ်းသဵၼ်ႈမၢႆလႄႈ ၾၢႆႇၵဵပ်းသဵၼ်ႈမၢႆႁူဝ်ၵူၼ်း ၼႂ်းတိူင်းၼေႇပျီႇတေႃႇ မီး (23) ၵေႃႉ၊ မိူင်းၶၢင် (800) ၵေႃႉ၊ တိူင်းၸႄႈၵႅင်း ၼႂ်း 27 ၸႄဝဵင်းမီး 1,026 ၵေႃႉ၊ တိူင်းတၼၢဝ်းသီ (1,045) ၵေႃႉ၊ တိူင်းပႃႇၵိူဝ် (4,259) ၵေႃႉ၊ မိူင်းမွၼ်း (1,202) ၵေႃႉ၊ တိူင်းတႃႈၵုင်ႈ (7,077) ၵေႃႉ၊ မိူင်းတႆး (2,909) ၵေႃႉ၊ တိူင်းဢေႇရႃႇဝတီႇ (5478) ၵေႃႉ – ဝႃႈၼႆ။
ၼႂ်းၼႆႉ သိုၵ်းမၢၼ်ႈ ဢမ်ႇပိုၼ်ၽၢဝ်ႇပႃး ၽူႈမီးပုၼ်ႈၽွၼ်း ၸိူဝ်းၵဵပ်းသဵၼ်ႈမၢႆ ၼႂ်းမိူင်းရၶႅင်ႇ၊ မိူင်းယၢင်းလႅင်၊ မိူင်းယၢင်းၽိူၵ်ႇ၊ မိူင်းၶျၢင်း၊ တိူင်းမၵူၺ်း ၊ တိူင်းမၼ်းတလေး ၸိူဝ်းၼႆႉ။
ၶေႃႈထၢမ် တႃႇမုင်ႉႁေႃႁိူၼ်းၼႆႉ မီး 68 ၶေႃႈ၊ ၶေႃႈထၢမ် တႃႇမုၵ်ႉၸုမ်းသမ်ႉ မီးဝႆႉ 18 ၶေႃႈ။ သဵၼ်ႈမၢႆႁူဝ် ၵူၼ်းၵမ်း ႁႅၵ်ႈ တႃႇပီ 2024 ၼႆႉ တေပိုၼ်ၽၢဝ်ႇဢွၵ်ႇပၼ် ၼႂ်းလိူၼ်ၻီႊသႅမ်ႊပိူဝ်ႊသဵင်ႈၼႆႉ သိုၵ်းမၢၼ်ႈ ပိုၼ်ၽၢဝ်ႇပႃးၼင်ႇ ၼႆ။
ၵဵဝ်ႇလူၺ်ႈသိုၵ်းမၢၼ်ႈ ၵဵပ်းသဵၼ်ႈမၢႆႁူဝ်ၵူၼ်းၼႆႉသေ လူင်ပွင်ၸိုင်ႈၽွမ်ႉႁူမ်ႈၸိူဝ်ႉၸၢတ်ႈ(NUG)၊ ၸုမ်း ၵႅတ်ႇၶႄ ၵူၼ်းမိူင်း (PDF)၊ ၸုမ်းယိပ်းၵွင်ႈၵၢင်ႇၸၢဝ်းၶိူဝ်းၶဝ် ဢွၼ်ၵၼ်သၢၼ်ၶတ်းလႄႈ ၵူၼ်းၸိူဝ်းၶဝ်ႈ ပႃးၼႂ်းၶၵ်ႉတွၼ်ႈၵဵပ်းသဵၼ်ႈမၢႆႁူဝ်ၵူၼ်း ၼၼ်ႉၵေႃႈ တေဢဝ်လိူင်ႈၵႂႃႇၼႆ ပၼ်ၾၢင်ႉဝႆႉ ၼင်ႇၼႆ။
ၽွင်းသိုၵ်းမၢၼ်ႈလႄႈ ၽူႈမီးပုၼ်ႈၽွၼ်းၶဝ် ႁူမ်ႈၵၼ် တႄႇလူင်းၵဵပ်းသဵၼ်ႈမၢႆႁူဝ်ၵူၼ်း ၼႂ်းဝဵင်းႁႃးၶႃး မိူင်းၶျၢင်း မိူဝ်ႈဝၼ်းတီႈ 1 လိူၼ်ဢွၵ်ႊထူဝ်ႊပိူဝ်ႊၼၼ်ႉ ၺႃးၸုမ်းယိပ်းၵွင်ႈ ယိုဝ်းတိုၵ်းတေႃႇ – သိုဝ်ႇၶၢဝ်ႇ RFA ဢွၵ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ