ၼႂ်းၵႄႈၸႄႈဝဵင်းပၢင်လွင်း – ၸႄႈဝဵင်းၾၢႆၶုၼ်ၼႆႉ သိုၵ်းမၢၼ်ႈတင်း ၸုမ်းၵႅတ်ႇၶႄၵူၼ်းမိူင်း PDF ယၢင်းလႅင် ၵႆႉပိုတ်းယိုဝ်းၵၼ် ႁၢဝ်ႈႁႅင်း တင်ႈတႄႇ သိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်းၼၼ်ႉမႃး ႁၢၼ်ႉတေႃႇထိုင်ယၢမ်းလဵဝ်။

ဢိင်ၼိူဝ် လွင်ႈၼႆႉသေ ၾၢႆႇသိုၵ်းမၢၼ်ႈ ယိုတ်းမိူင်း ၸႂ်ႉၶိူင်ႈမိၼ်မႃးပွႆႇမၢၵ်ႇသႂ်ႇ ၼႂ်းမူႇဝၢၼ်ႈၼႂ်းဢိူင်ႇလႄႈ ႁဵတ်းႁႂ်ႈ ၵူၼ်းမိူင်း လႆႈပၢႆႈဢွၵ်ႇပိုၼ်ႉတီႈၼမ်။ ၼႂ်းႁူဝ်လိူၼ်ဢွၵ်ႊထူဝ်ႊပိူဝ်ႊၼႆႉ သိုၵ်းမၢၼ်ႈ မႃးပွႆႇမၢၵ်ႇသႂ်ႇၵူႈဝၼ်း ၸၢၵ်ႇမၢၵ်ႇတိူဝ်ႉၺႃးၵူၼ်းမိူင်းၼပ်ႉႁူဝ်ပၢၵ်ႇ။

ဝၢႆးသိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်းမႃး မိူဝ်ႈႁူဝ်ပီ 2021 ၼၼ်ႉ ယူႇတီႈ PDF ယၢင်းလႅင် လၢႆမူႇၸုမ်းႁူမ်ႈၵၼ် လေႃႇတိုၵ်း တပ်ႉသိုၵ်းမၢၼ်ႈ ၸိူဝ်းမီးယူႇၼႂ်းၵႄႈဝဵင်းပၢင်လွင်း – ၾၢႆၶုၼ် ၸိူဝ်းၼၼ်ႉ မႃးႁၢဝ်ႈႁႅင်း ႁၢၼ်ႉတေႃႇထိုင် ယၢမ်းလဵဝ် ၾၢႆႇသိုၵ်းမၢၼ်ႈ တူၺ်းငဝ်းလၢႆးသေ ထႅမ်ႁႅင်းသိုၵ်းမႃးထႅင်ႈ ၶိူဝ်းယႂ်း။ မိူၼ်ၼင်ႇ တပ်ႉၶမယ 336 ၼႂ်းဝဵင်းၾၢႆၶုၼ်ၼႆႉ တိုၵ်ႉပၵ်းသဝ်းဝႆႉယူႇ ထိုင်ယၢမ်းလဵဝ်။ ၸုမ်း PDF ယၢင်းလႅင် ပႆႇၵႂၢတ်ႇလၢင်ႉလႆႈ ဝႃႈၼႆ။

လွင်ႈသိုၵ်းမၢၼ်ႈ ထႅမ်ႁႅင်းသိုၵ်းယူႇၶိူဝ်းယႂ်း တီႈဝဵင်းပၢင်လွင်း – ၾၢႆၶုၼ် ၸိူဝ်းၼႆႉ ၵူၼ်းပိုၼ်ႉတီႈတႄႉ ႁၼ်ထိုင်ဝႃႈ သိုၵ်းမၢၼ်ႈ ႁွင်ႉဢဝ်ၸုမ်းပျီႇတူႉၸိတ်ႉပဢူဝ်း PNO ၶဝ်ႈႁူမ်ႈၸွမ်းထႅင်ႈ ဝႃႈၼႆ။

ယၢမ်းလဵဝ် ၸုမ်းပျီႇတူႉၸိတ်ႉပဢူဝ်းၵေႃႈ ထႅမ်ႁႅင်းသိုၵ်းၵႂႃႇယူႇဝႆႉၸွမ်း ဝၢၼ်ႈလွႆၵဵင်ႈ၊ ဝၢၼ်ႈႁူဝ်ဝူဝ်း၊ ဝၢၼ်ႈသွင်းပျွင်း၊ ဝၢၼ်ႈၼွၵ်ႇဝူဝ်း၊ ဝၢၼ်ႈသေႃလမ်၊ ဝၢၼ်ႈၼမ်ႉၽႃမူလႄႈ ဝၢၼ်ႈမႂ်ႇ ၸိူဝ်းဢၼ်ယူႇ ၸွမ်းလႅၼ်လိၼ်တႆး – ယၢင်းလႅင် ၸိူဝ်းၼၼ်ႉလႄႈ ႁဵတ်းႁႂ်ႈၵူၼ်းမိူင်း ထူပ်းတၢင်းယၢပ်ႇၽိုတ်ႇ။

ၼႂ်းႁူဝ်လိူၼ်ၼႆႉၵူၺ်း သိုၵ်းမၢၼ်ႈ ၸႂ်ႉၶိူင်ႈမိၼ် မႃးပွႆႇမၢၵ်ႇသႂ်ႇ ပဵၼ်လၢႆၵမ်း၊ ၵမ်ႈၼမ် ဢဝ်ဢွင်ႈတီႈ ၵူၼ်းမိူင်း ပဵၼ်ပဝ်ႉမၢႆသေ ပွႆႇမၢၵ်ႇလူင်သႂ်ႇ။ သိုၵ်းမၢၼ်ႈ လၢမ်းၶၢတ်ႈဝႃႈ သိုၵ်း PDF လၢႆၸုမ်း မႃးယူႇဝႆႉၼႆသေ တင်ႈၸႂ် ယိူင်းၸူးဢွင်ႈတီႈ ၸိူဝ်းၼၼ်ႉ ပွႆႇမၢၵ်ႇသႂ်ႇ၊ ဢၼ်တုမ်ႉတိူဝ်ႉႁႅင်းတႄႉ ပဵၼ်ၵူၼ်းမိူင်း ၸိူဝ်းယူႇၸွမ်းလႅၼ်လိၼ်တႆး – ယၢင်းလႅင် ၸိူဝ်းၼၼ်ႉ – ၽူႈၸမ်ၸႂ် ၵူၼ်းပၢႆႈၽေး ၾၢႆၶုၼ် ၵေႃႉၼိုင်ႈ လၢတ်ႈၼႄဝႆႉၼင်ႇၼႆ –

“တၢင်းၾၢႆၶုၼ်ၼႆႉ ပဵၼ်ယူႇၵူႈဝၼ်းၵူႈဝၼ်း၊ သိုၵ်းမၢၼ်ႈ မႃးပွႆႇမၢၵ်ႇသႂ်ႇ ဢွင်ႈတီႈၵူၼ်းမိူင်း ၵူႈဝၼ်းလႄႈ လႅဝ်ၽႅဝ်ႉမူတ်းယဝ်ႉၶႃႈယူဝ်ႉ။ ၸုမ်း PDF ယၢင်းလႅင်ၶဝ်သမ်ႉ မႃးဢဝ်တီႈယူႇဝႆႉ ၸွမ်းဝၢၼ်ႈ ၼမ်ႉၽႃမူ၊ ဝၢၼ်ႈမႂ်ႇ ၸိူဝ်းၼၼ်ႉဝႆႉ ဢေႃႈ။ လုၵ်ႉတီႈဝၢၼ်ႈ ၸိူဝ်းၼၼ်ႉသေ ၵႂႃႇတၢင်းၸၢၼ်းထႅင်ႈ ဢိတ်ႉၵေႃႈ ႁွတ်ႈၾၢႆၶုၼ်ယဝ်ႉလူး။ ယွၼ်ႉၼၼ်လႄႈ သိုၵ်းမၢၼ်ႈ ၸင်ႇမႃးပွႆႇမၢၵ်ႇလူင်သႂ်ႇယူႇတိၵ်း တိၵ်းယဝ်ႉ”- ဝႃႈၼႆ။

တႄႇမိူဝ်ႈႁၢင် လိူၼ်သႅပ်ႊထႅမ်ႊပိူဝ်ႊ တေႃႇပေႃးထိုင်လိူၼ်ၼႆႉ ၶၢဝ်းယၢမ်းၵၢင်ၶမ်ႈၵၢင်ၶိုၼ်းၵေႃႈ ၶိူင်ႈမိၼ်သိုၵ်းမၢၼ်ႈ မိၼ်လတ်းၵႂႃႇတၢင်းၼိူဝ်ဝဵင်းပၢင်လွင်းၼႆႉ မွၵ်ႈ 2 – 3 လမ်း ၵူႈၶိုၼ်းယဝ်ႉၼႆ ၵူၼ်းပၢင်လွင်း ၵေႃႉၼိုင်ႈ သိုပ်ႇလၢတ်ႈတီႈၽူႈတွႆႇႁွၵ်ႈၼင်ႇၼႆ။

ဝၼ်းတီႈ 02/10/2024 ၼႆႉၵေႃႈ သိုၵ်းၵႅတ်ႇၶႄၸိူဝ်ႉၸၢတ်ႈ ယၢင်းလႅင် KNDF ႁူမ်ႈတင်း ၸုမ်း PDF လၢႆၸုမ်း တိုၵ်းတေႃးသိုၵ်းမၢၼ်ႈ ႁၢဝ်ႈႁႅင်း တီႈဝၢၼ်ႈလွႆႁွႆႉ ၸႄႈဝဵင်းၾၢႆၶုၼ် ႁိုင်ၶၢဝ်းတၢင်း 3 ၸူဝ်ႈ မူင်း တင်းသွင်ၾၢႆႇ မီးလွင်ႈမၢတ်ႇတိူဝ်ႉလူႉတၢႆ၊ ၵူၼ်းမိူင်းၵေႃႈ လႆႈဢွၵ်ႇပၢႆႈယၢၼ် ဢွင်ႈတီႈယူႇတၼ်း သဝ်းထႅင်ႈ 300 ပၢႆ။ ၼႂ်းဝၼ်းတီႈ 03/10/2024 ၼႆႉၵေႃႈ သိုၵ်းမၢၼ်ႈ တိုၵ်ႉဢဝ်ၾႆးၽဝ်ႁိူၼ်းၵူၼ်း ဝၢၼ်ႈထႅင်ႈၼႆ – ၽူႈၶၢၼ်ပၢၵ်ႇ PDF ၾၢႆၶုၼ် လၢတ်ႈတီႈသိုဝ်ႇ Myanmar Now ဝႆႉၼင်ႇၼႆ။

ဝဵင်းၸိူဝ်းယူႇပွတ်းတွၼ်ႈလႅၼ်လိၼ်တႆး – ယၢင်းလႅင်ၼႆႉ ၵမ်ႈၼမ် ဢမ်ႇၵတ်းယဵၼ် ၵူၼ်းမိူင်းယူႇ လူၺ်ႈလွင်ႈၵူဝ်ႁႄ မိူၼ်ၼင်ႇ – ဝဵင်းၵဝ်ႇၸၢမ်ၵႃးၼႆႉၵေႃႈ သိုၵ်းမၢၼ်ႈတင်း ၸုမ်းလုၵ်ႉၽိုၼ်ႉ PDF လၢႆမူႇၸုမ်း ၵႆႉၽႃႇၺႃးၵၼ်သေ ပိုတ်းယိုဝ်းၵၼ်တႃႇသေႇ။ တီႈၼႂ်းၵၢတ်ႇၸၢမ်ၵႃးၼႆႉ မၢင်ပွၵ်ႈ ၵူၼ်း မိူင်းလႆႈႁၼ်ပႃး ၸုမ်းပျီႇတူႉၸိတ်ႉပဢူဝ်း၊ မၢင်ပွၵ်ႈၵေႃႈ လႆႈႁၼ်ၸုမ်း PDF မႃးၸၢႆႇၵၢတ်ႇလႄႈ ဢွၼ်ၵၼ်မႆႈၸႂ် ၵူဝ်ၶဝ်ပိုၼ်ႉယိုဝ်းၵၼ် ၵူၼ်းပိုၼ်ႉတီႈ ၵေႃႉၼိုင်ႈလၢတ်ႈၼႄၼင်ႇၼႆ –

“တၢင်းဝဵင်းၵဝ်ႇၸၢမ်ၵႃး ၼၼ်ႉၵေႃႈ မိူၼ်ၼၼ်ယဝ်ႉ တပ်ႉသိုၵ်းယၢင်းလႅင်ၶဝ် မႃးတူင်ႉၼိုင်ဝႆႉၼမ်လႄႈ ၵူၼ်းမိူင်းၵေႃႈ ဢမ်ႇထၢင်ႇႁၢင်ႈလႆႈယူႇသဝ်းလီလီ။ တေႃႈၼင်ႇ ဝၼ်းၵၢတ်ႇတႄႉတႄႉၵေႃႈ လႆႈပိၵ်ႉဢိုတ်းပႅတ်ႈၸဝ်ႉဝႃႈၸဝ်ႉယဝ်ႉ။ ၵၢတ်ႇၸၢမ်ၵႃးၼႆႉသမ်ႉ ၸုမ်းပျီႇတူႉၸိတ်ႉပဢူဝ်းၵေႃႈ ၵႂႃႇၶဝ်ႈ၊ သိုၵ်းယၢင်းလႅင်ၶဝ်ၵေႃႈ သမ်ႉၵႂႃႇၶဝ်ႈႁဵတ်းၼႆလႄႈ ၵူၼ်းမိူင်းတႄႉ မႆႈၸႂ်ၵူဝ်ၶဝ်ယိုဝ်းၵၼ် ၼၼ်ႉယဝ်ႉ ”- ဝႃႈၼႆ။

ပၢင်တိုၵ်း ဢၼ်ပဵၼ်ယူႇၸွမ်းၼႂ်းၵႄႈ လႅၼ်လိၼ်တႆး – ယၢင်းလႅင်ၼႆႉ ၶဝ်ႈၸိုဝ်ႈဝႃႈ သိုၵ်းမၢၼ်ႈလႄႈ သိုၵ်းၵႅတ်ႇၶႄ ၵူၼ်းမိူင်း ယၢင်းလႅင် ပိုတ်းယိုဝ်းၵၼ် ဝႃႈၼႆသေတႃႉ ဢၼ်ယူႇ ၾၢႆႇသိုၵ်းမၢၼ်ႈသေ ၶဝ်ႈၼႂ်းပၢင်တိုၵ်းတႄႉ ၵမ်ႈၼမ် ပဵၼ်ၸုမ်းပျီႇတူႉၸိတ်ႉ ပဢူဝ်း PNO ဢၼ်လုၵ်ႉတၢင်းမိူင်းတႆး ပွတ်းၸၢၼ်းၼႆႉ ထႅမ်ႁႅင်းၵႂႃႇၼႆ – ၵူၼ်းပၢင်လွင်း ၵေႃႉၼိုင်ႈ ထတ်းသၢင်ႁၼ်ထိုင်ဝႆႉ ၼင်ႇၼႆ ။

ၸွမ်းသၢပ်ႇဝဵင်းပၢင်လွင်း – မိူင်းပၢႆး – ၾၢႆၶုၼ် ၸိူဝ်းၼႆႉ ပၢင်တိုၵ်း တိုၵ်ႉသိုပ်ႇပဵၼ်ၶိူဝ်းယႂ်း ၵူၼ်းမိူင်းၼပ်ႉႁူဝ်ႁဵင် လႆႈပၢႆႈၽေးသိုၵ်း။ မၢင်ၸိူဝ်း ဢမ်ႇၸၢင်ႈပၢႆႈၵႂႃႇၵႆလႄႈ ပၢႆႈယူႇၸွမ်း ၾင်ႇၼမ်ႉၽီလူးသေ ၽုၵ်ႇၶဝ်ႈ၊ ၽုၵ်ႇသူၼ် ႁႃၵိၼ်လဵင်ႉတွင်ႉဝႆႉၵေႃႈမီး။

ယၢမ်းလဵဝ်သမ်ႉ လႆႈထူပ်းၽေးၼမ်ႉထူမ်ႈထႅင်ႈလႄႈ လႆႈဢွၼ်ၵၼ်ပၢႆႈထႅင်ႈ ၵူၼ်းမိူင်းဢမ်ႇမီးတီႈယူႇ တီႈၵိၼ် ၸိူဝ်းထူပ်းၽေး ဢိုပ်းယၢၵ်ႈၵေႃႈ မီးၼမ် ၼႆယဝ်ႉ။