မိူဝ်ႈၼႆႉ ဝၼ်းတီႈ 04/10/2024 ယၢမ်းၵၢင်ၼႂ် 2 မူင်းပၢႆ သိုၵ်းမၢၼ်ႈ ယိုတ်းမိူင်း ၸႂ်ႉၶိူင်ႈမိၼ်တိုၵ်း မႃးပွႆႇမၢၵ်ႇ တီႈပွၵ်ႉ 5 တင်း ပွၵ်ႉ 8 ၼႂ်းဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ တိူဝ်ႉၺႃး ၵျွင်းၽြႃးၶႄႇ၊ ႁူင်းသဝ်းလႄႈ ႁိူၼ်းယေးၵူၼ်းမိူင်း ၸိူဝ်းၼႆႉ လူႉၵွႆၼမ်။

သိုဝ်ႇၶၢဝ်ႇ ၵဝ်ႈၵၢင်ႉ (The Kokang) ဢွၵ်ႇဝႆႉဝႃႈ – “မိူဝ်ႈၼႆႉ ယၢမ်းၵၢင်ၼႂ် 2:13 မူင်းထိုင် 5:20 မူင်း ၶၢဝ်းယၢမ်း 3 ၸူဝ်ႈမူင်းၼႆႉ သိုၵ်းမၢၼ်ႈ ၸႂ်ႉၶိူင်ႈမိၼ်တိုၵ်း မႃးပွႆႇမၢၵ်ႇ တီႈပွၵ်ႉ 5 သွင်လုၵ်ႈ တိူဝ်ႉၺႃးၵျွင်း ၽြႃးၶႄႇ ၵွၼ်းယိင် (ဂွမ်ယင် ဘုရားကျောင်း) လူႉၵွႆလႅဝ်ၽႅဝ်ႉ။ ယဝ်ႉၵေႃႈ တီႈပွၵ်ႉ 8 ထႅင်ႈသွင်လုၵ်ႈ တီႈၼၼ်ႉၵေႃႈ တိူဝ်ႉၺႃးႁူင်းသဝ်း၊ ႁိူၼ်းယေး ၵူၼ်းမိူင်း လူႉၵွႆထႅင်ႈတင်းၼမ်။ ယွၼ်ႉမၢၵ်ႇၶိူင်ႈမိၼ် သိုၵ်းမၢၼ်ႈၼႆႉသေ တိူဝ်ႉၺႃး ၵူၼ်းမိူင်းမၢတ်ႇၸဵပ်း ၵေႃႉၼိုင်ႈ”- ဝႃႈၼႆ။

ၼႂ်းလိူၼ်ဢွၵ်ႊထူဝ်ႊပိူဝ်ႊၼႆႉ သိုၵ်းမၢၼ်ႈ ၸႂ်ႉၶိူင်ႈမိၼ်တိုၵ်း မႃးပွႆႇမၢၵ်ႇ တီႈဝဵင်းလႃႈသဵဝ်ႈၼႆႉ ပဵၼ်ပွၵ်ႈ ၵမ်းႁႅၵ်ႈဝႃႈ ၼႆသေတႃႉ တႄႇဢဝ် ႁၢင်လိူၼ်ဢေႃႊၵတ်ႊသ်ၼၼ်ႉမႃး ႁၢၼ်ႉတေႃႇထိုင်ယၢမ်းလဵဝ်ၼႆႉ ဢမ်ႇယွမ်း 10 ပွၵ်ႈယဝ်ႉ။ ဢၼ်မႃးပွႆႇၼမ်တီႈသုတ်းတႄႉ ပဵၼ်ၼႂ်းလိူၼ်သႅပ်ႊထႅမ်ႊပိူဝ်ႊ ပူၼ်ႉမႃးၼႆႉ ဝႃႈၼႆ။

ၵူၼ်းပိုၼ်ႉတီႈ ဝဵင်းလႃႈသဵဝ်ႈ ၽူႈယိင်း ဢႃယု မွၵ်ႈ 40 ပီ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ပေႃးပဵၼ်လႆႈတႄႉ ၶႂ်ႈႁႂ်ႈၵိုတ်းပၼ် လွင်ႈႁိူဝ်းမိၼ် ယႃႇႁႂ်ႈမႃးပွႆႇမၢၵ်ႇထႅင်ႈၶႃႈယဝ်ႉ။ ႁႂ်ႈတင်းသွင်ၾၢႆႇ ဢုပ်ႇဢူဝ်းၵၼ်လီလီ။ ယွၼ်ႉဝႃႈ ၵူၼ်းမိူင်းၼႆႉ ႁႃၵိၼ်ယၢပ်ႇ ယူႇယၢပ်ႇမႃးၵူႈမိုဝ်ႉၵူႈဝၼ်းယဝ်ႉလႄႈ လွင်ႈသိုၵ်းမၢၼ်ႈ မႃးပွႆႇမၢၵ်ႇ ၸိူင်ႉၼႆၼႆႉ ၶႂ်ႈဝႃႈႁၢႆႉ ၸႃႉမႃးၵူႈဝၼ်းယဝ်ႉ။ ပေႃးၵၢင်ၶမ်ႈၵၢင်ၶိုၼ်းမႃး ၵူဝ်မၢၵ်ႇၶိူင်ႈမိၼ် မႃးတူၵ်းသႂ်ႇသေ ၼွၼ်းပေႃးဢမ်ႇလပ်းၶႃႈယဝ်ႉ”- ဝႃႈၼႆ။

ပူၼ်ႉမႃး မိူဝ်ႈဝၼ်းတီႈ 30/09/2024 ယၢမ်းၵၢင်ၶိုၼ်း သိုၵ်းမၢၼ်ႈ ၸႂ်ႉၶိူင်ႈမိၼ် မႃးပွႆႇမၢၵ်ႇ 3 လုၵ်ႈ တီႈပွၵ်ႉ 11 ဝဵင်းလႃႈသဵဝ်ႈ တိူဝ်ႉၺႃးႁိူၼ်းယေး ၵူၼ်းမိူင်းလူႉၵွႆလႅဝ်ၽႅဝ်ႉ 2 လင်လႄႈ ၵူၼ်းမိူင်း မၢတ်ႇၸဵပ်းၸွမ်း ထႅင်ႈၵေႃႉၼိုင်ႈ – ၸုမ်းၸွႆႈထႅမ် ၵူၼ်းမၢတ်ႇၸဵပ်း FYV တႅမ်ႈတၢင်ႇဝႆႉၼင်ႇၼႆ။

တႄႇဢဝ် လိူၼ်ၵျူႊလၢႆႊၼၼ်ႉမႃး တေႃႇထိုင်လိူၼ်သႅပ်ႊထႅမ်ႊပိူဝ်ႊၼႆႉ သိုၵ်းမၢၼ်ႈ ၸႂ်ႉၶိူင်ႈမိၼ်တိုၵ်း မႃးပွႆႇမၢၵ်ႇ ၼႂ်းၼႃႈလိၼ်ၽွင်းငမ်းတူဝ်ၵဝ်ႇ ၶိုၵ်ႉတွၼ်းမၢႆ 1 ၵဝ်ႈၵၢင်ႉ (MNDAA) တင်းမူတ်း 25 ၵမ်း တိူဝ်ႉၺႃး ၵူၼ်းမိူင်းလူႉတၢႆ ဢမ်ႇယွမ်း 31 ၵေႃႉ မၢတ်ႇၸဵပ်း 90 ၵေႃႉ – The Kokang ဢွၵ်ႇဝႆႉၼင်ႇၼႆ။