သိုၵ်းမၢၼ်ႈလႄႈ PDF သိုပ်ႇပဵၼ်ပၢင်တိုၵ်းၵၼ်ထႅင်ႈ ၼႂ်းၸႄႈဝဵင်းပၢင်လွင်း ၸိုင်ႈတႆးပွတ်းၸၢၼ်း ၵူၼ်းပၢႆႈၽေးသိုၵ်း ပႆႇၸၢင်ႈပွၵ်ႈၶိုၼ်းႁိူၼ်းယေး တိုၵ်ႉလႆႈသွၼ်ႈယူႇသဝ်းဝႆႉၼႂ်းထိူၼ်ႇ။

ပၢင်တိုၵ်း ၼႂ်းၵႄႈသိုၵ်းမၢၼ်ႈလႄႈ PDF ၼႆႉ တႄႇပဵၼ်မႃးႁၢဝ်ႈႁႅင်း တၢင်းဝၢၼ်ႈမွၵ်ႇ၊ ၼမ်ႉၽႃမူ၊ ဝၢၼ်ႈၼွင်ဝူဝ်း ၸိူဝ်းမီးၾၢႆႇၸၢၼ်း ဝဵင်းပၢင်လွင်း တင်ႈတႄႇႁၢင်လိူၼ်သႅပ်ႊထႅမ်ႊပိူဝ်ႊ တေႃႇထိုင်ဝၼ်းတီႈ 01/10/2024 ။

ၵွၼ်ႇၼႃႈ ပၢင်တိုၵ်းတေပဵၼ်ၶိုၼ်း ႁၢင်လိူၼ်သႅပ်ႊထႅမ်ႊပိူဝ်ႊၼႆႉ ငဝ်းလၢႆးပၢင်တိုၵ်း ယဵၼ်ဝႆႉလႄႈ ၵူၼ်းမိူင်း ၸိူဝ်းပၢႆႈ ၽေးသိုၵ်းဝႆႉ ဢွၼ်ၵၼ်ပွၵ်ႈၶိုၼ်းႁိူၼ်းယေး။ ဝၢႆးလင် သိုၵ်းမၢၼ်ႈ ပိုတ်းယိုဝ်းၵွင်ႈလူင် ၵႂႃႇသီႇႁူးႁႃႈတၢင်း ၾၢႆႇလဵဝ်။ ၵူၼ်းမိူင်းၸင်ႇဢွၼ်ၵၼ် ပၢႆႈၽေးသိုၵ်းထႅင်ႈ ပွၵ်ႈၵမ်း 2 ။

ၵဵဝ်ႇလူၺ်ႈလွင်ႈၼႆႉ ၼၢင်းယိင်း ဢၼ်လႆႈပၢႆႈၽေးသိုၵ်း လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈလဵဝ်ၼႆႉ ႁဝ်းၶႃႈ ပႆႇၸၢင်ႈပွၵ်ႈမိူဝ်း။ ပၢင်တိုၵ်းၼႆႉ တႄႇပဵၼ်မႃးမိူဝ်ႈလိူၼ်ထူၼ်ႈၵဝ်ႈ သဵင်ၵွင်ႈသဵင်မၢၵ်ႇၵေႃႈ လႆႈငိၼ်း။ မႆႈၸႂ်ၵူဝ်မၢၵ်ႇလူင် မႃးတူၵ်းတၢင်းဝၢၼ်ႈၶႃႈဢေႃႈ။ ၸွမ်းဝၢၼ်ႈဢၼ် ယၢၼ်ၵႆၵၼ်တင်း ပၢင်တိုၵ်းတႄႉ ၵူၼ်းဝၢၼ်ႈမိူဝ်းမိူဝ်းမႃးမႃး၊ ဢမ်ႇႁတ်းၼွၼ်းတီႈႁိူၼ်း လႆႈၵႂႃႇၼွၼ်းၸွမ်းၼႂ်းသူၼ် ၼႂ်းႁိူၵ်ႈၵူၺ်း”- ဝႃႈၼႆ။

ၵူၼ်းပိုၼ်ႉတီႈ ယင်းလၢတ်ႈထႅင်ႈဝႃႈ သဵင်ၵွင်ႈသဵင်မၢၵ်ႇ သဵင်ၶိူင်ႈမိၼ် ငိၼ်းတေႃႇထိုင်ဝၼ်းတီႈ 1 လိူၼ်ဢွၵ်ႊထူတ်ႊပိူဝ်ႊၼႆႉ။

“လႆႈငိၼ်းသဵင်မၢၵ်ႇၼႆႉ တေႃႇမိူဝ်ႈဝႃး ဝၢၼ်ႈႁဝ်းၶႃႈ ဝၢၼ်ႈမႆႉၶႂၢင် ၼႆႉတႄႉ တေယၢၼ်ၵႆၵၼ်တင်း တီႈၶဝ်ပဵၼ်ပၢင်တိုၵ်းၼၼ်ႉ မွၵ်ႈ 15 လၵ်း။ ပေႃးၶဝ်ယိုဝ်းၵၼ် တၢင်းၼၼ်ႉၼႆ တီႈၼႆႈၵေႃႈ လႆႈငိၼ်းၶႃႈ ဢေႃႈ။ ႁိူဝ်းမိၼ်ၵေႃႈ လႅပ်ႈမႃးပွႆႇမၢၵ်ႇၶႃႈဢေႃႈ သဵင်ႁိူဝ်းမိၼ်ၵေႃႈ လႆႈငိၼ်းဢေႃႈ” – ၽူႈၸၢႆး ၵေႃႉၼိုင်ႈ ၼႂ်းၸႄႈဝဵင်းပၢင်လွင်း လၢတ်ႈၼင်ႇၼႆ။

ယွၼ်ႉပၢင်တိုၵ်းၼႆႉသေ ႁဵတ်းႁႂ်ႈၵူၼ်းဝၢၼ်ႈ လႆႈပၢႆႈၵႂႃႇယူႇၸွမ်းႁိူၼ်းပီႈႁိူၼ်းၼွင်ႉ ၵျွင်းမုၼ်ၸဝ်ႈလႄႈ ပူၵ်းသုမ်ႉယူႇၸွမ်းၼႂ်းသူၼ်ၼႂ်းႁိူၵ်ႈ။ ၵမ်ႈၽွင်ႈၵေႃႈ လႆႈပၢႆႈၶဝ်ႈၼႂ်းဝဵင်းပၢင်လွင်းသေ ၼႂ်းဝၢၼ်ႈမႆႉၶႂၢင်သမ်ႉ ၵူၼ်းမိူင်း 300 မုင်ႉႁေႃႁိူၼ်းပၢႆ မႃးယူႇသဝ်းဝႆႉ။

လိူဝ်ၼၼ်ႉ တီႈဢၼ်ပဵၼ်ပၢင်တိုၵ်းၼႆႉ ယၢၼ်ၵႆၵၼ်တင်း ဝဵင်းပၢင်လွင်း မွၵ်ႈ 25 လၵ်း။ ပူၼ်ႉမႃး မိူဝ်ႈဝၼ်းတီႈ 17/09/2024 ၼၼ်ႉၵေႃႈ ဢမ်ႇမီးပၢင်တိုၵ်းသင်သေ သိုၵ်းမၢၼ်ႈ လၢမ်းလိမ်း ယိုဝ်းမၢၵ်ႇလူင်လႄႈ ႁဵတ်းႁႂ်ႈၵူၼ်းဝၢၼ်ႈပၢင်မွၵ်ႇ တၢႆၵေႃႉၼိုင်ႈသေ မၢတ်ႇၸဵပ်းႁၢဝ်ႈႁႅင်း ၵေႃႉၼိုင်ႈ။