တီႈဝဵင်းမိူင်းယႆ ၸိုင်ႈတႆးပွတ်းႁွင်ႇၼၼ်ႉ သိုၵ်းမၢၼ်ႈလႄႈ သိုၵ်းၵဝ်ႈၵၢင်ႉ ၶဵင်ႈၶႅင်ထႅမ်ႁႅင်းသိုၵ်း ၶဝ်ႈမႃး ၼင်ႇၵၼ် ႁဵတ်းႁႂ်ႈၵူၼ်းမိူင်း ဢမ်ႇႁတ်းၵႂႃႇႁဵတ်းၵၢၼ်သူၼ်ၵၢၼ်ႁႆႈ လႆႈပွႆႇပႅတ်ႈ မၢၵ်ႇၶဝ်ႈတဝ်ႈၼမ်ႉ ထိုင်ၶၢဝ်းၵဵပ်းၵေႃႈ ဢမ်ႇၸၢင်ႈၵႂႃႇဢဝ်။

ၽူႈၸၢႆး သႅၼ်းပၢၼ်ၶၢဝ်ႉ ၸဝ်ႈသူၼ်ဢွႆႈ တီႈဝဵင်းမိူင်းယႆ လၢတ်ႈၽူႈတွႆႇႁွၵ်ႈဝႃႈ – “သိုၵ်းၵဝ်ႈၵၢင်ႉၵေႃႈ ဢမ်ႇထွႆ၊ သိုၵ်းမၢၼ်ႈၵေႃႈ ထႅမ်ႁႅင်းသိုၵ်းမႃးယူႈ တိၵ်းတိၵ်း၊ ၸူဝ်ႈၵၢၼ်သိုၵ်းၶဵင်ႈၶႅင်ၵၼ်ၼႆႉ ဢမ်ႇလႆႈၵႂႃႇ လုမ်းလႃးသူၼ်ဢွႆႈ မီးၸမ် 2 လိူၼ်ယဝ်ႉ၊ ဢမ်ႇႁတ်းၵႂႃႇတူၺ်း၊ ၵူဝ်သိုၵ်းၵူဝ်သိူဝ်၊ ပိူင်လူင် ၵူဝ်ၵႂႃႇယဵပ်ႇ ၺႃးမၢၵ်ႇ၊ ပၢင်တိုၵ်း တေပဵၼ်မိူဝ်ႈလႂ်ၵေႃႈ ဢမ်ႇႁူႉ”- ဝႃႈၼႆ။

ယၢမ်းလဵဝ် တီႈဢိူင်ႇႁူဝ်ယ သိုၵ်းၵဝ်ႈၵၢင်ႉၶဝ်ႈမႃးယူႇၸွမ်းၵူၼ်းဝၢၼ်ႈၵူၼ်းသူၼ်။ သိုၵ်းမၢၼ်ႈၵႆႉဢဝ် ၶိူင်ႈမိၼ်မႃးလဵပ်ႈတူၺ်း။ သိုၵ်းၵဝ်ႈၵၢင်ႉ သင်ႇၵူၼ်းဝၢၼ်ႈၵုင်းၵေႃႇ၊ ႁူဝ်ယ၊ ၾႃႉၽႃႇ ၸိူဝ်းမီးၸမ်တပ်ႉ ၶလယ 67 ၸိူဝ်းၼၼ်ႉ ႁႂ်ႈငိူင်ႉဢွၵ်ႇဝၢၼ်ႈဝႆႉ။

ၵူၼ်းဝၢၼ်ႈပုင်ႇ ဢိူင်ႇႁူဝ်ယ လၢတ်ႈၽူႈတွႆႇႁွၵ်ႈဝႃႈ – “သိုၵ်းၵဝ်ႈၵၢင်ႉ သင်ႇႁႂ်ႈၵူၼ်းမိူင်းတၢင်းဢိူင်ႇႁူဝ်ယ  ငိူင်ႉပၢႆႈဝႆႉလႄႈ ၵူၼ်းမိူင်းဝႃႈ တေပဵၼ်ပၢင်တိုၵ်းယဝ်ႉႁိုဝ်ၼႆသေ ဢွၼ်ၵၼ်မႆႈၸႂ်။ ပၢင်တိုၵ်းၸၢင်ႈပဵၼ်ၵူႈ ၶၢဝ်းယၢမ်း၊ ၵူဝ်ဢမ်ႇတၼ်းပၢႆ။ ပေႃးတေပၢႆႈသမ်ႉ ဢမ်ႇသိူဝ်းပွႆႇသူၼ်ႁႆႈၼႃးပႅတ်ႈ။ ၵွပ်ႈၼႆ ၵမ်ႈၽွင်ႈ လႆႈ ၶၢႆသူၼ်ႁႆႈၼႃးသေ ပၢႆႈၵႂႃႇႁဵတ်းၵၢၼ်တၢင်ႇဝဵင်း။ ၵမ်ႈၽွင်ႈတႄႉ ၵႃႈလႆႈပွႆႇပႅတ်ႈသေပၢႆႈ၊ ၵမ်ႈၽွင်ႈၵေႃႈ ၵႂႃႇမိူင်းထႆး”- ဝႃႈၼႆ။

ၵူၼ်းမိူင်းမႆႈၸႂ် ၵူဝ်ပဵၼ်ပၢင်တိုၵ်းယႂ်ႇ၊ ၵူဝ်ဢမ်ႇတၼ်းတႅပ်းဢွႆႈၼႂ်းသူၼ်။ ယွၼ်ႉပိူဝ်ႈ ၵၢၼ်ၽုၵ်ႇသွမ်ႈ ပီၼႆႉ လႆႈဢဝ်ငိုၼ်းၶီႈငိုၼ်းတူဝ်းတီႈၶွမ်ႊပၼီႊ ၸဝ်ႈငိုၼ်းသႃးသေ ႁဵတ်းဝႆႉလႄႈ – ဝႃႈၼႆ။ 

ၵူၼ်းမိူင်း ဝဵင်းမိူင်းယႆၼႆႉ ႁဵတ်းၵၢၼ်ၽုၵ်ႇသွမ်ႈႁႃၵိၼ်လဵင်ႉတွင်ႉပဵၼ်ပိူင်လူင်။ ၵမ်ႈၼမ် ဢွၼ်ၵၼ်ၽုၵ်ႇ  ၶဝ်ႈ၊ ၶဝ်ႈၵၢပ်ႇ၊ ဢွႆႈ။ ၼႂ်းၸႄႈဝဵင်းမိူင်းယႆၼႆႉ သူၼ်ဢွႆႈ တင်းမူတ်းတေမီးမွၵ်ႈ  4 မိုၼ်ႇဢေႊၶိူဝ်ႊပၢႆ။  ဢၼ်ၽုၵ်ႇဢွႆႈၼႆႉ ပဵၼ်ပီႈၼွင်ႉဝၢၼ်ႈသႅၼ်တေႃ၊ ၵႃလၢင်ႇ၊ ပၢင်ႁႆႈ ၊ ၸဵင်ႇၶမ်း၊ တႃႇႁၢတ်ႈ ၸိူဝ်းၼႆႉ။

ဢၼ်သိုၵ်းၵဝ်ႈၵၢင်ႉၶဝ် ၶဝ်ႈယူႇသဝ်းတူင်ႉၼိုင်ၼႆႉ ပဵၼ်တၢင်းဝၢၼ်ႈလုၵ်းၶၢႆႉ၊ ၼွင်ပဵတ်း ၸိူဝ်းၼႆႉ။ သိုၵ်း မၢၼ်ႈသမ်ႉ မီးၼႂ်းတူဝ်ဝဵင်းမိူင်းယႆ သိုၵ်းတႆးၶူဝ်းၶဵဝ်သမ်ႉ တင်ႈလၢၼ်ႇတင်ႈၵဵတ်ႉ ၼႂ်းၵႄႈႁူဝ်ယ မိူင်းယႆ၊ တီႈႁိမ်းဝၢၼ်ႈၵဵင်းၼိမ်လႄႈ တီႈၶူဝ်ၼမ်ႉတွၵ်း ၸိူဝ်းၼႆႉ။ ၵူၼ်းမိူင်းသမ်ႉ တူၵ်းၼႂ်းၵႄႈၼႂ်းၵၢင်မၼ်း ဝႆႉလႄႈ ပေႃးပဵၼ်ပၢင်တိုၵ်းမႃး ၵူဝ်ငိူင်ႉဝႄႈယၢပ်ႇ ဝႃႈၼႆ။

ႁၢင်လိူၼ် သႅပ်ႊထႅမ်ႊပိူဝ်ႊၼႆႉ ဢမ်ႇပဵၼ်ပၢင်တိုၵ်းသေ တီႈဢၼ်သိုၵ်းမၢၼ်ႈ ထၢင်ႇထိူမ်ဝႃႈ မီးသိုၵ်းၵဝ်ႈၵၢင်ႉ တူင်ႉ ၼိုင်ၼၼ်ႉ ဢဝ်ၶိူင်ႈမိၼ်မႃး လၢမ်းလိမ်းပွႆႇမၢၵ်ႇတူၵ်းသႂ်ႇ ၵူၼ်းမိူင်းမၢတ်ႇၸဵပ်းလူႉတၢႆ။

မိူဝ်ႈဝၼ်းတီႈ 29/09/2024 ၵၢင်ၶမ်ႈ 8 မူင်း သိုၵ်းမၢၼ်ႈ ဢဝ်ၶိူင်ႈမိၼ်သိုၵ်း မႃးပွႆႇမၢၵ်ႇတီႈ ဝၢၼ်ႈၵွင်းမွင် ဢၼ်မီးၾၢႆႇ ၸၢၼ်း ဝဵင်းမိူင်းယႆ 7 လုၵ်ႈ၊ တူၵ်းၼႂ်းဝၢၼ်ႈ 3 လုၵ်ႈ၊ တူၵ်းၼွၵ်ႈဝၢၼ်ႈ 4 လုၵ်ႈ ၵူၼ်းပိုၼ်ႉတီႈ မၢတ်ႇၸဵပ်းၸၢၵ်ႇမၢၵ်ႇ 4 ၵေႃႉ၊ ႁိူၼ်းယေးလူႉၵွႆ 3 လင်။

မိူဝ်ႈဝၼ်းတီႈ 26/09/2024 ယၢမ်းတဵင်ႈၶိုၼ်းၼၼ်ႉၵေႃႈ သိုၵ်းမၢၼ်ႈ မႃးပွႆႇမၢၵ်ႇတီႈဝၢၼ်ႈၼမ်ႉတူၵ်း သိုၵ်းမၢၼ်ႈမႃးပွႆႇမၢၵ်ႇ ၸဝ်ႈသၢင်ႇ 7 တူၼ် မၢတ်ႇၸဵပ်း၊ ဝၼ်းၼၼ်ႉၵူၺ်း မၢၵ်ႇသိုၵ်းမၢၼ်ႈ တူၵ်းတိူဝ်ႉႁိူၼ်း ၵူၼ်းဝၢၼ်ႈၼမ်ႉတူၵ်း လင်ၼိုင်ႈ၊ ၸဝ်ႈႁိူၼ်း 3 ၵေႃႉ တၢႆထင်တီႈ။

တင်ႈတႄႇၼၼ်ႉမႃး ၵူၼ်းဝၢၼ်ႈၵွင်းမွင် ၵမ်ႈၽွင်ႈ ပၢႆႈၵႂႃႇတၢင်းၼႂ်းဝဵင်းမိူင်းယႆ၊ မိူင်းပၢတ်ႇ။ ၵူၼ်းဝၢၼ်ႈၵုင်းၵေႃႇ၊ ဝၢၼ်ႈၾႃႉၽႃႇ ဢွၼ်ၵၼ်ငိူင်ႉဝႄႈ ၵႂႃႇတၢင်းဝၢၼ်ႈပုင်ႇ ယူႇၵျွင်းမုၼ်ၸဝ်ႈ၊ ႁိူၼ်းပီႈႁိူၼ်းၼွင်ႉ ၵူၼ်းမီးၸမ် 30-40 ဝႃႈၼႆ။

တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)