မိူဝ်ႈၼႆႉ ဝၼ်းတီႈ 03/10/2024 ယၢမ်းၵၢင်ၼႂ် 1 မူင်းပၢႆ ၼမ်ႉသၢႆ တႄႇၼွင်းထူမ်ႈ တီႈပွၵ်ႉပုင်းထုၼ်၊ သၼ်သၢႆး၊ မႄႈ ၶၢဝ်လႄႈ ၸိူဝ်းပိုၼ်ႉတီႈ ၶူင်ႈယၢၼ်း ၼႂ်းဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း လႅၼ်လိၼ်တႆး – ထႆးထႅင်ႈ ၼႆယဝ်ႉ။  

ၵူၼ်းပိုၼ်ႉတီႈ ဝဵင်းတႃႈၶီႈလဵၵ်း ၽူႈယိင်း ဢႃယု 30 ပၢႆ ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ – “ပေႃးၾူၼ် တူၵ်းဢိတ်း ၼိုင်ႈၵေႃႈ ၼမ်ႉသၢႆၼႆႉ ယိုင်ႈၶိုၼ်ႈထႅင်ႈယဝ်ႉၶႃႈ။ ဢၼ်ထူမ်ႈဝႆႉၵမ်းဢွၼ်တၢင်းၼၼ်ႉ ႁဝ်းၶႃႈ ၽဵဝ်ႈၶီႈၵူမ်ႇမၼ်း ယင်းပႆႇယဝ်ႉ။ ၼမ်ႉပေႃးမႃးထူမ်ႈထႅင်ႈယဝ်ႉ။ ၵမ်းၼႆႉ ထူမ်ႈတၢင်း ပွၵ်ႉသၼ်သၢႆး၊ ပုင်းထုၼ်၊ ပုင်ႇလူဝ်ႇ၊ ၵၢတ်ႇတႃႈလေႃႉလႄႈ ၸိူဝ်းတီႈၶူင်ႈယၢၼ်း ၸိူဝ်းၼၼ်ႉဢေႃႈ”- ဝႃႈၼႆ။

သိုပ်ႇလၢတ်ႈဝႃႈ – “ႁဵတ်းသင်လႄႈ ၼမ်ႉၵႆႉထူမ်ႈၼႆ ယွၼ်ႉလိၼ်ၶမ်တေႃႈၼမ်ႉ မူတ်းယဝ်ႉလႄႈ ႁဵတ်းႁႂ်ႈၼမ်ႉဢမ်ႇ ၸၢင်ႈလႆ။ ၶႂ်ႈႁႂ်ႈၽူႈမီးပုၼ်ႈၽွၼ်းၶဝ် ႁဵတ်းၵၢၼ်ၼမ်လိူဝ်ၼႆႉဢေႃႈ။ တၢင်းၾင်ႇမိူင်းမၢၼ်ႈၼႆႉ ၶဝ်ဢမ်ႇၸွႆႈသင် တႃႇ ၵူၼ်းမိူင်း။ ႁၼ်ၶဝ်မႃးထၢႆႇႁၢင်ႈသေ ၵဵပ်းလၢႆးငၢၼ်း ၸိူင်ႉၼၼ်ၵူၺ်း။ ဢမ်ႇမိူၼ် တၢင်းၾင်ႇမိူင်းထႆး လူင်ပွင်ၸိုင်ႈပိူၼ်ႈ ၸွႆႈၵူၼ်းမိူင်းဢေႃႈ”- ဝႃႈၼႆ။

တႄႇဢဝ်လိူၼ်ဢေႃႊၵတ်ႊသ် ၼၼ်ႉမႃး ႁၢၼ်ႉတေႃႇထိုင် ယၢမ်းလဵဝ်ၼႆႉ ၼမ်ႉသၢႆလုပ်ႇထူမ်ႈ တီႈဝဵင်းတႃႈၶီႈလဵၵ်းၼႆႉ ဢမ်ႇယွမ်း 9 ပွၵ်ႈယဝ်ႉ။ ႁဵတ်းႁႂ်ႈႁိူၼ်းယေး၊ ႁၢၼ်ႉၶၢႆၵုၼ်ႇ၊ ရူတ်ႉၵႃး ၸိူဝ်းၼႆႉ လူႉသုမ်းတင်းၼမ်လၢႆ။

တႆးႁွတ်ႈမႄႈသၢႆ ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ – “မိူဝ်ႈလဵဝ် တီႈမႄႈသၢႆၼႆႉ လူင်ပွင်ၸိုင်ႈပိူၼ်ႈ တိုၵ်ႉတေႃႉလိၼ် ၶီႈၵူမ်ႇ ဢွၵ်ႇႁိူၼ်း ၸွမ်းၵိဝ်ႇဝၢၼ်ႈ ဢၼ်ၺႃးၼမ်ႉထူမ်ႈ မိူဝ်ႈလိူၼ်ပူၼ်ႉမႃးၼၼ်ႉယူႇ။ ထၢင်ႇတႄႉ 3 လိူၼ်ၵေႃႈ ၽဵဝ်ႈပႆႇယဝ်ႉ။ ရူတ်ႉၵႃးတၢင်ႇလိၼ် ၸိူဝ်းၼႆႉ တေႃႉဢွၵ်ႇတဵမ်တၢင်းလူင် ၵူႈဝၼ်းဢေႃႈ။ ပေႃးၼမ်ႉသၢႆ ထူမ်ႈထႅင်ႈတႄႉ တေယၢပ်ႇၽိုတ်ႇၵၼ်ႁႅင်းထႅင်ႈယဝ်ႉ”- ဝႃႈၼႆ။

မိူဝ်ႈႁၢင်လိူၼ်သႅပ်ႊထႅမ်ႊပိူဝ်ႊ ပူၼ်ႉမႃးၼႆႉ ၼမ်ႉသၢႆလုပ်ႇထူမ်ႈ ၼႂ်းဝဵင်းတႃႈၶီႈလဵၵ်း – မႄႈသၢႆ ႁၢဝ်ႈႁႅင်း ဝၢႆးၼမ်ႉထူမ်ႈယဝ်ႉ ယူႇတီႈ ၸုမ်းပရႁိတ ၼႂ်းပိုၼ်ႉတီႈ လူင်းၵူတ်ႇထတ်း ၸိူဝ်းလိၼ်ၵူၼ်ႇတဵင်ႁိူၼ်းယေးသေ ထူပ်းႁၼ် တူဝ်တၢႆ ဢမ်ႇယွမ်း 15 ၵေႃႉ တၢင်းၾင်ႇတႃႈၶီႈလဵၵ်း ဝႃႈၼႆ။