မိူင်းဢိင်းၵလဵတ်ႈ (UK) ပဵၼ်မိူင်းႁႅင်းပၢႆးမၢၵ်ႈမီးယႂ်ႇလိူဝ်ပိူၼ်ႈ မိူင်းၼိုင်ႈ ၼႂ်းလုမ်ႈၾႃႉ ဢၼ်ၽဝ်ထၢၼ်ႇႁိၼ်သေ ႁဵတ်းဢွၵ်ႇႁႅင်းၾႆးၾႃႉမႃး ၶၢဝ်းတၢင်း 142 ပီၼၼ်ႉ တေၵိုတ်းပႅတ်ႈယဝ်ႉၼႆ ပိုၼ်ၽၢဝ်ႇပဵၼ်တၢင်းၵၢၼ် မိူဝ်ႈဝၼ်းတီႈ 30/09/2024 ၼႆႉၼင်ႇၼႆ။
ႁူင်းၸၢၵ်ႈ ၸႂ်ႉထၢၼ်ႇႁိၼ်သေ ႁဵတ်းဢွၵ်ႇႁႅင်းၾႆးၾႃႉ Ratcliffe – on – Soar ၼႆႉ တႄႇမႃးမိူဝ်ႈပီ 1967 ၊ ပဵၼ်ႁူင်း ၸၢၵ်ႈ ၵိုတ်းဝႆႉလိုၼ်းသုတ်း တီႈၼႂ်းမိူင်းဢိင်းၵလဵတ်ႈ (United Kingdom – UK)။
ဢၢႆၵႂၼ်း ဢၼ်ဢွၵ်ႇမႃးတီႈ ၵၢၼ်ၸုတ်ႇၽဝ်ထၢၼ်ႇႁိၼ်ၼႆႉ ႁဵတ်းႁႂ်ႈလူမ်းဝူၺ်ႇႁင်ႈၼမ်လိူဝ်ပိူၼ်ႈ။ ၵွပ်ႈၼၼ် လွင်ႈ ၵိုတ်းလိုဝ်ႈ ၵၢၼ်ၸႂ်ႉႁႅင်းထၢတ်ႈ ဢၼ်လႆႈမႃးတီႈၵၢၼ်ၽဝ်ထၢၼ်ႇႁိၼ်ၼႆႉ မုင်ႈမွင်းဝႃႈ တေၸွႆႈလူတ်းယွမ်း လွင်ႈတုမ်ႉတိူဝ်ႉ ဢၼ်ႁဵတ်းႁႂ်ႈသၽႃႇဝသိင်ႇဝႅတ်ႉလွမ်ႉလႅၵ်ႈလၢႆႈၼႆ – ၽွင်းလူင်ၾၢႆႇႁႅင်းထၢတ်ႈ မိူင်း UK လၢတ်ႈၼင်ႇၼႆ။
မိူင်း UK ၼႆႉ ပဵၼ်မိူင်းဢၼ်တႄႇႁဵတ်းဢွၵ်ႇ ႁႅင်းထၢတ်ႈၾႆးၾႃႉ လူၺ်ႈၽဝ်ထၢၼ်ႇႁိၼ်လႄႈ ပဵၼ်မိူင်းဢဵၼ်ႁႅင်းယႂ်ႇ ဢၼ်တေၵိုတ်းလိုဝ်ႈ လွင်ႈၸႂ်ႉတိုဝ်းႁႅင်းထၢတ်ႈၾႆးၾႃႉ ထၢၼ်ႇႁိၼ်ဢွၼ်တၢင်းပိူၼ်ႈ။
ႁူင်းၸၢၵ်ႈႁႅင်းထၢတ်ႈၾႆးၾႃႉထၢၼ်ႇႁိၼ် ၵမ်းဢွၼ်တၢင်းသုတ်းပိူၼ်ႈ ၼႂ်းလုမ်ႈၾႃႉၼႆႉ ပဵၼ် Holborn Viaduct ။ တေႃးမႅတ်ႉဢႄႇတီႇၸိၼ်ႇ ၵူၼ်းၶိူဝ်းဢမေႊရိၵၼ်ႊ (American) ပဵၼ်ၵေႃႉ ဢွၼ်တႄႇသၢင်ႈမႃး။
တေႃႇထိုင်ပီ 2012 ၼႆႉ ႁႅင်းထၢတ်ႈၾႆးၾႃႉ တီႈမိူင်း UK တႃႇ 39% ၼႆႉ လႆႈမႃးတီႈထၢၼ်ႇႁိၼ်။ ယွၼ်ႉဝႃႈ ထၢၼ်ႇ ႁိၼ်ၼႆႉ ဢမ်ႇလႆႈပိုင်ႈဢိင်ၾိင်ႈၾႃႉၾူၼ်လူမ်း မိူၼ်ၼင်ႇ ႁႅင်းသႅင်လႅတ်ႇလႄႈ ႁႅင်းလူမ်း – သိုဝ်ႇၶၢဝ်ႇ DVB ဢွၵ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ