ၽွင်းမိူင်းတႆးပွတ်းႁွင်ႇထူပ်းၽေးသိုၵ်းသိူဝ် မိူင်းတႆးပွတ်းၸၢၼ်း ထူပ်းၽေးၼမ်ႉထူမ်ႈယူႇ ယၢမ်း လဵဝ်ၼႆႉ ၸုမ်းလွၵ်ႇလႅၼ်ၵိၼ်ငိုၼ်းတၢင်းဢွၼ်ႊလၢႆႊ (ၵျႃးၽႅၼ်ႉ) တူင်ႉၼိုင်ယူႇသဝ်း ၼႂ်းဝဵင်းလၢႆးၶႃႈသေ လွၵ်ႇလႅၼ်ၵိၼ်ၵူၼ်းမိူင်း ႁၢဝ်ႈႁႅင်း။

ၵူၼ်းမိူင်း ဝဵင်းလၢႆးၶႃႈ လၢတ်ႈဝႆႉတီႈသိုဝ်ႇၶၢဝ်ႇတီႊဝီႊပီႊဝႃႈ ၸုမ်းလွၵ်ႇလႅၼ်ၵိၼ်ငိုၼ်းၸိူဝ်းၼႆႉ လုၵ်ႉတၢင်းမိူင်းတႆးပွတ်းႁွင်ႇလူင်းမႃး။ ၸိူဝ်းၶဝ်ၸႂ်ႉတိုဝ်းငိုၼ်းၶႄႇ လၢတ်ႈၵႂၢမ်းၶႄႇ။ မႃးယူႇတၢင်းဝၢၼ်ႈ ဢၼ်မီးၸဵင်ႇႁွင်ႇဝၼ်းဢွၵ်ႇဝဵင်းလၢႆးၶႃႈ ဝႃႈၼႆ။

“ၸိူဝ်းၶဝ်မီးၵူၼ်းၼမ်။ ပေႃးၶဝ်မႃးၶဝ်ႈၵၢတ်ႇ ၶဝ်ႁိမ်ၵၼ်သိုဝ်ႉၶဝ်ႈၼမ်ႉတၢင်းၵိၼ်။ ၵႃႈၶၼ်ၽၵ်း ယိူဝ်ႈၼၢင်းၶဵဝ်ၼႂ်းၵၢတ်ႇၵေႃႈ ၶိုၼ်ႈသုင် 2-3 ပုၼ်ႈ။ ဢၼ်လႂ်ၵေႃႈ တုမ်ႉတိူဝ်ႉၵူၼ်းမိူင်း ပိုၼ်ႉတီႈ ဢွၼ်တၢင်းယူႇတိၵ်းတိၵ်းယဝ်ႉ”- ဝႃႈၼႆ။

ၸုမ်းလွၵ်ႇလႅၼ်ၵိၼ်ငိုၼ်းတၢင်းဢွၼ်ႊလၢႆႊၸိူဝ်းၼႆႉ တႄႇၶဝ်ႈမႃးထိုင် ဝဵင်းလၢႆးၶႃႈၼႆႉ ၸဵမ်မိူဝ်ႈ ႁူဝ်ပီ 2024 ၼႆႉသေ ဢွၼ်ၵၼ်မႃးယူႇသဝ်းဝႆႉတၢင်းဝၢၼ်ႈႁႆး၊ မၢၼ်ႈပၢင်ႇ၊ ႁူဝ်ၼမ်ႉ ၸိူဝ်းၼႆႉသေ ပိုၼ်ႉတီႈၼၼ်ႉ ပဵၼ်ပိုၼ်ႉတီႈ တပ်ႉၸုမ်း 758 ၸုမ်းသိုၵ်းၵႅတ်ႇၶႄၵူၼ်းမိူင်း (ပျီႇတူႉၸိတ်ႉ) တႂ်ႈသိုၵ်းမၢၼ်ႈ ဢဝ်ႁူမ်ႇလူမ်ႈဝႆႉ – ၵူၼ်းပိုၼ်ႉတီႈလၢတ်ႈ ၼႄထႅင်ႈၼင်ႇၼႆ။

“ၸုမ်းၵျႃးၽႅၼ်ႉ ၸိူဝ်းၼႆႉ ၶဝ်လွၵ်ႇႁူၺ်းဢဝ်ၵူၼ်းၼုမ်ႇတၢင်းဝၢၼ်ႈ ၸဵမ်ယိင်းလႄႈၸၢႆး ႁႂ်ႈမႃးႁဵတ်း ၵၢၼ်ၸွမ်းၶဝ်။ ၸဵမ်ယိင်းလႄႈၸၢႆး ပေႃးထိုင်ၼႂ်းမိုဝ်းၶဝ်တႄႉ ၸႂ်ႉႁဵတ်းၵူႈမဵဝ်း။ သုမ်းၸၢတ်ႈပၢၼ် တင်းတူဝ်လႄႈၸႂ်ယဝ်ႉ။ ၵူၼ်းၼုမ်ႇမိူဝ်ႈလဵဝ်ၼႆႉ ဢၼ်ၵႂႃႇမိူင်းထႆးၵေႃႈၵႂႃႇ ဢၼ်ဢမ်ႇၵႂႃႇၵေႃႈ ၵႂႃႇ ႁဵတ်းၵၢၼ် လႅၼ်ၵိၼ်ငိုၼ်းၵျႃးၽႅၼ်ႉၶႃႈဢေႃႈ။ တႃႇမိူဝ်းၼႃႈၼႆႉ လီၼၵ်းၸႂ်တႄႉတႄႉၶႃႈယဝ်ႉ”– ဝႃႈ ၼႆ။

ဝဵင်းလၢႆးၶႃႈၼႆႉ မိူဝ်ႈၵူႈပွၵ်ႈ ပဵၼ်ဝဵင်းဢၼ်မီးလွင်ႈၵတ်းယဵၼ်။ ၵူၼ်းမိူင်း ၵမ်ႈၼမ် ႁဵတ်းၵၢၼ်ၽုၵ်ႇ သွမ်ႈ ႁႃၵိၼ်လဵင်ႉတွင်ႉ။ ၵူၺ်းၵႃႈ ယၢမ်းလဵဝ် မီးသိုၵ်းမၢၼ်ႈ၊ ပျီႇတူႉၸိတ်ႉ၊ SSPP ၸိူဝ်းၼႆႉ ဝႃႈၼႆ သေတႃႉ ၸုမ်းလႂ်ၵေႃႈ ဢမ်ႇတီႉၺွပ်း ၽဵဝ်ႈမူၺ်ႉၸုမ်းၵျႃးၽႅၼ်ႉ ဢၼ်ပဵၼ်ၽေးၶဵၼ်လူင် တေႃႇ ၵူၼ်းမိူင်း ပၢႆႁဵတ်းၵႅင်ႈဢမ်ႇႁူႉဢမ်ႇႁၼ်ထႅင်ႈ ဝႃႈၼႆ။

ၸုမ်းလွၵ်ႇလႅၼ်ၵိၼ်ငိုၼ်း ၵျႃးၽႅၼ်ႉၸိူဝ်းၼႆႉ ဢိင်ၼိူဝ်လူင်ပွင်ၸိုင်ႈၶႄႇ လိုပ်ႈလမ်းတီႉၺွပ်း၊ ၸီႉသင်ႇ ႁႂ်ႈၸုမ်းယိပ်းၵွင်ႈၵၢင်ႇ ၼႂ်းမိူင်းတႆး လိုပ်ႈလမ်းတီႉၺွပ်းသေ ၸိူဝ်းၶဝ်လုၵ်ႉတၢင်းလႅၼ်လိၼ်ၶႄႇ ၶၢႆႉပၢႆႈလူင်းမႃးထိုင်ဝဵင်းလၢႆးၶႃႈ။ ဝၢႆးၼၼ်ႉ လွၵ်ႇလႅၼ်ၵိၼ်ငိုၼ်းပိူၼ်ႈတၢင်းဢွၼ်ႊလၢႆႊ။ လွၵ်ႇလႅၼ်ၵိၼ်ၵူၼ်းတင်းလုမ်ႈၾႃႉ ၵူၺ်းဢမ်ႇၵႃး ႁဵတ်း ႁႂ်ႈၵူၼ်းၼုမ်ႇပိုၼ်ႉတီႈ တၢင်းယၢမ်ႈလႄႈ ၸၢတ်ႈပၢၼ် လူႉသုမ်းၸွမ်းထႅင်ႈ – ၵူၼ်းမိူင်းဝဵင်းလၢႆးၶႃႈ လၢတ်ႈၼင်ႇၼႆ။