သိုၵ်းၶၢင် KIA ပိုၼ်ၽၢဝ်ႇဝႃႈ ပိုတ်းယိုဝ်းတိုၵ်းတေႃးသိုၵ်းမၢၼ်ႈ ဢၼ်မီးတီႈဝဵင်းၶျီႇၽူၺ်ႇ (ချီဖွေမြို့) တွၼ်ႈဝၼ်း ဢွၵ်ႇ မိူင်းၶၢင်သေ ၵုမ်းလႆႈဝႆႉပိုၼ်ႉတီႈၵမ်ႈၽွင်ႈယဝ်ႉ ဝႃႈၼႆ။

ပၢင်တိုၵ်းၼႆႉ ပဵၼ်မိူဝ်ႈဝၼ်းတီႈ 29/09/2024 သိုၵ်းၶၢင် လၢတ်ႈဝႃႈ – ၵုမ်းလႆႈဝႆႉတပ်ႉပလိၵ်ႈ၊ တပ်ႉႁူမ်ႇလူမ်ႈ ၸိူဝ်းၼႆႉသေ ၵုင်းပိဝ်ႇႁႃႇတႄႉ တိုၵ်ႉပိုတ်းယိုဝ်းဝႆႉယူႇၼႆ ၽူႈမီးပုၼ်ႈၽွၼ်း တီႈႁွင်ႈၵၢၼ်ၾၢႆႇပွင်ႇၶၢဝ်ႇ ၸဝ်ႈသိုၵ်းလူင်ၼေႃႇပူႇ လၢတ်ႈဝႆႉတီႈၶၢဝ်ႇ VOA ၼင်ႇၼႆ။

ၵူၼ်းမိူင်းဝဵင်းၶျီႇၽူၺ်ႇ ၵမ်ႈၽွင်ႈတႄႉ ပၢႆႈဢွၵ်ႇဝဵင်းယူႇယဝ်ႉ။ ပဵၼ်ၵူၼ်းဝၢၼ်ႈၼမ်ႉႁူး၊ ၼမ်ႉမေႃႇ ၸိူဝ်းၼႆႉ။

ယိုတ်းလႆႈ တပ်ႉပလိၵ်ႈမဵဝ်ႉမ၊ ၵဵတ်ႉ/လၢၼ်ႇ သိုၵ်းမၢၼ်ႈ တီႈ 4 လၵ်း ဢၼ်မီးၼိူဝ်သဵၼ်ႈတၢင်းၶျီႇၽူၺ်ႇ – ပၢင်ဝႃႈ၊ တပ်ႉပၢင်သဝ်းပျီႇတူႉၸိတ်ႉ ၼၢင်းဢူး တၢင်းၶဝ်ႈဝဵင်းၶျီႇၽူၺ်ႇ၊ တပ်ႉပၢင်သဝ်းႁူမ်ႇလူမ်ႈ ဢၼ်မီးႁိမ်းပၢင်ႇပိတ်ႉမၢၵ်ႇ ၼင် ဢေႊသျႃႊဝေႃႊလ် (အေးရှားဝေါ ဘောလုံးကွင်း) သဵၼ်ႈတၢင်းၵႂႃႇ ၵၢၼ်ႇပႆႇ ယၼ်ႇလႄႈ တပ်ႉပၢင်သဝ်း ပျီႇတူႉ ၸိတ်ႉ သျငေႃး ၸိူဝ်းၼႆႉ တပ်ႉသိုၵ်းၶၢင် KIA လႄႈ PDF ၶဝ်ပိုတ်းယိုဝ်း ယိုတ်းလႆႈ ၼႂ်းဝၼ်းတီႈ 29 သႅပ်ႊထႅမ်ႊပိူဝ်ႊယဝ်ႉ ဝႃႈၼႆ။ 

ဢိင်ၼိူဝ် လွင်ႈၼႆႉသေ ၶမ်ႈၶိုၼ်းဝၼ်းတီႈ 30 ၼၼ်ႉ သိုၵ်းမၢၼ်ႈ ဢဝ်ၶိူင်ႈမိၼ်မႃးပွႆႇမၢၵ်ႇ တီႈဝဵင်းၶျီႇၽူၺ်ႇ ႁၢဝ်ႈႁႅင်း။ ၵူၼ်းမိူင်း မီးလွင်ႈမၢတ်ႇၸဵပ်းလူႉတၢႆ။    

ဝဵင်းၶျီႇၽူၺ်ႇၼႆႉ ပဵၼ်ဝဵင်းဢၼ်သိုၵ်းမၢၼ်ႈ ပၵ်းလုမ်းၸႄႈတွၼ်ႈဝႆႉသေ မီးၸဵင်ႇႁွင်ႇဝၼ်းဢွၵ်ႇဝဵင်းၸေႈၼႃး ယၢၼ်ဝဵင်းမွၵ်ႈ 88 လၵ်း။ ယၢၼ်ၵႆတင်းဝဵင်းပၢင်ဝႃႈ ဢၼ်မီးတီႈလႅၼ်လိၼ် မိူင်းၶႄႇ မွၵ်ႈ 40 လၵ်း – ပဵၼ်ပိုၼ်ႉတီႈပျီႇတူႉၸိတ်ႉ သၶုမ်ႇတဵင်ႇယဵင်း ၵုမ်းဝႆႉသေ ပဵၼ်ပိုၼ်ႉတီႈ မီးႁႄႈလိၼ် ၶွမ်ႊပၼီႊ လၢႆလၢႆဢၼ် မႃးၶုတ်းႁႄႈလိၼ်ဝႆႉ – သိုဝ်ႇၶၢဝ်ႇ Kachinnews ဢွၵ်ႇဝႆႉၼင်ႇၼႆ။