ၵူၼ်းလႅၵ်ႈငိုၼ်း ထဝ်ႈၸၢႆး ဢႃယု 60 ပၢႆ ၵေႃႉၼိုင်ႈ တီႈဝဵင်းမူႇၸေႊ ၺႃးၸူၼ် တိူဝ်ႉၺႃးမၢၵ်ႇၵွင်ႈ တီႈတိၼ်မၼ်း ၸၢႆး လုၵ်ႈၼိုင်ႈ လႆႈမၢတ်ႇၸဵပ်း။
ဝၼ်းတီႈ 30/09/2024 ယၢမ်းၵၢင်ၼႂ် 6:30 မူင်း ထဝ်ႈၸၢႆး ဢႃယု 60 ပၢႆ ပဵၼ်ၵူၼ်းလႅၵ်ႈငိုၼ်းမၢၼ်ႈ – ၶႄႇ ၵေႃႉၼိုင်ႈ ၺႃးၸုမ်းဢမ်ႇႁူႉၾၢႆႇ 3 ၵေႃႉ ၸူၼ်မၼ်းၸၢႆး တီႈႁူဝ်ၼႃႈၵၢတ်ႇလူင် ပွၵ်ႉၵၢတ်ႇ ဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ။
ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “ၵူၼ်းႁၢႆႉၼၼ်ႉ သွၼ်ႉရူတ်ႉၶိူင်ႈမႃးၸွမ်းၵၼ် 3 ၵေႃႉ ၶဝ် ႁေႃႈရူတ်ႉၶိူင်ႈမႃးႁႄႉ ရူတ်ႉၶိူင်ႈထဝ်ႈၸၢႆးၼၼ်ႉသေ ထဝ်ႈၸၢႆးၼၼ်ႉ ႁေႃႈရူတ်ႉၶိူင်ႈၽႃႇသႂ်ႇၶဝ် ယဝ်ႉၵေႃႈ လူင်းမႃးမၢင်ႁူဝ်ၶဝ်။ ၵူၼ်းႁၢႆႉ 3 ၵေႃႉ လၢၵ်ႈၵွင်ႈယိုဝ်းသႂ်ႇ 2 ၵမ်း။ တိူဝ်ႉၺႃးတီႈႁူဝ်မႄႈတိၼ် ၾၢႆႇၶႂႃ မၼ်းၸၢႆး လုၵ်ႈၼိုင်ႈ။ ထႅင်ႈလုၵ်ႈၼိုင်ႈတႄႉ ဢမ်ႇတၼ်းတိူဝ်ႉၶႃႈ”- ဝႃႈၼႆ။
သိုပ်ႇလၢတ်ႈဝႃႈ – “ၵူၼ်းႁိမ်းႁွမ်းၼၼ်ႉ ၼႅတ်ႈဢွၵ်ႇမႃးၸွႆႈသေ ၵူၼ်းႁၢႆႉၼၼ်ႉ ႁေႃႈရူတ်ႉၶိူင်ႈပၢႆႈဢေႃႈ။ ၵူၺ်းၵႃႈ ဢမ်ႇတၼ်းသုမ်းၶူဝ်းၶွင်သင်ၶႃႈ။ လႆႈငိၼ်းဝႃႈ ထဝ်ႈၸၢႆးၼၼ်ႉ လႆႈၽႃႇတတ်း တီႈႁူင်းယႃ ၼႆ ဢေႃႈ”- ဝႃႈၼႆ။
ထဝ်ႈၸၢႆး ဢႃယု 60 ပၢႆ ဢၼ်ၺႃးၸူၼ်ၼၼ်ႉ ပဵၼ်ၵူၼ်းပွၵ်ႉၸၢၼ်း။ ၸုမ်းဢမ်ႇႁူႉၾၢႆႇ 3 ၵေႃႉၼၼ်ႉသမ်ႉ ပဵၼ် ဢွၼ်ႇၸၢႆးၼုမ်ႇ သႅၼ်းဢႃယု 20 ပၢႆ ဝႃႈၼႆ။
“မိူဝ်ႈႁၢင်ပီ 2023 ၼၼ်ႉၵေႃႈ ၵေႃႉပဵၼ်မေးၼၢင်း ထဝ်ႈၸၢႆး (ၵူၼ်းလႅၵ်ႈငိုၼ်း) ၼႆႉ ၺႃးၸူၼ်ယဝ်ႉ ၵမ်းၼိုင်ႈ။ ၼၼ်ႉၵေႃႈ ၺႃးၸူၼ် ယိုဝ်းၵွင်ႈလွၵ်ႇငိုတ်ႈသႂ်ႇတီႈလိၼ်သေ ႁဵတ်းႁႂ်ႈၸၢၵ်ႇမၢၵ်ႇ သဵၼ်တိူဝ်ႉသႂ်ႇ မၼ်းၼၢင်း လႆႈတိူဝ်ႉမၢတ်ႇၸဵပ်း တီႈၶႃဢေႃႈ။ ၼၼ်ႉၵေႃႈ ဢမ်ႇတၼ်းလႆႈသုမ်းသင်ၵႂႃႇၶႃႈ”- ၵူၼ်းပိုၼ်ႉ တီႈဝဵင်းမူႇၸေႊ သိုပ်ႇလၢတ်ႈ ၼႄၼင်ႇၼႆ။
ၼႂ်းလိူၼ်သႅပ်ႊထႅမ်ႊပိူဝ်ႊၼႆႉၵူၺ်း တီႈဝဵင်းမူႇၸေႊၼႆႉ ၵူၼ်းမိူင်းၺႃးၸူၼ် ထုၵ်ႇယိုဝ်း ၸိူင်ႉၼႆၼႆႉ ဢမ်ႇယွမ်း 3 ပွၵ်ႈယဝ်ႉ။ ယဝ်ႉၵေႃႈ ၺႃးတီႉၺွပ်း ဢဝ်ပဵၼ်တူဝ်ယိူဝ်ႇ (ပြန်ပေးဆွဲ) ၸိူင်ႉၼၼ်ထႅင်ႈ။
မိူဝ်ႈဝၼ်းတီႈ 26/09/2024 ယၢမ်းၵၢင်ဝၼ်း 11 မူင်းပၢႆ ဢွၼ်ႇႁဵၼ်း သွင်ပီႈၼွင်ႉ ၺႃးၸူၼ် ၸွမ်းတၢင်း တီႈပွၵ်ႉၼိူဝ် ၼၼ်ႉၵေႃႈ ဢွၼ်ႇႁဵၼ်း ၵေႃႉၼိုင်ႈ ၺႃးၵွင်ႈယိုဝ်းသႂ်ႇ တိူဝ်ႉၺႃးတီႈၶႃ ၾၢႆႇသၢႆႉလႄႈ သုမ်းၵႂႃႇ ရူတ်ႉၶိူင်ႈလမ်းၼိုင်ႈ၊ ၾူၼ်းၼိုင်ႈၶိူင်ႈ။
ဝၼ်းတီႈ 14/09/2024 ၼၼ်ႉၵေႃႈ ၼုမ်ႇၸၢႆးဢွၼ်ႇ ဢႃယု 15 ပီ ၵေႃႉၼိုင်ႈ ၺႃးၸူၼ်ယိုဝ်းတၢႆပႅတ်ႈ ၵၢင်တၢင်းသေ ဢဝ်ရူတ်ႉၶိူင်ႈၵႂႃႇ မၼ်းၸၢႆးၵႂႃႇ တီႈၵွင်းၼၢမ်ႇသႃႇ ပွၵ်ႉၵၢတ်ႇ။ မိူဝ်ႈဝၼ်းတီႈ 17 သမ်ႉ ၽူႈၸၢႆး ၵေႃႉၼိုင်ႈ ၺႃးၸုမ်း ဢမ်ႇႁူႉၾၢႆႇ 3 ၵေႃႉ ယိပ်းၵွင်ႈပွတ်းၸေးမိုဝ်းသေ ၶဝ်ႈတီႉၺွပ်းၵုမ်းတူဝ် မၼ်းၸၢႆးၵႂႃႇ တီႈၼႂ်းၵၢတ်ႇမင်ႇၵလႃႇ မူႇ ၸေႊ ၼႂ်းပွၵ်ႉၸွၼ်ႊၸူဝ်ႇ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ