တူၺ်းတေႃႇလွင်ႈလူႉသုမ်း တိူဝ်ႉသၢင်ႈၼႂ်းၸိုင်ႈမိူင်း ဢၼ်လႆႈပဵၼ်မႃး ယွၼ်ႉလၢႆးၵၢၼ်ယိပ်းၵွင်ႈၵၢင်ႇလႄႈ လၢႆးၵေႃႇ ၵၢၼ်ႁၢႆႉၼၼ်ႉသေ ယိုၼ်းမိုဝ်းၽိတ်ႈမွၵ်ႇထိုင် ၸိူဝ်းၸုမ်းၸၢဝ်းၶိူဝ်းယိပ်းၵွင်ႈတိုၵ်းတေႃး ယူႇၼၼ်ႉလႂ်၊ ၸိူဝ်းၸုမ်း ၸၢဝ်းၵေႃႇၵၢၼ်ႁုၵ်းႁၢႆႉၼၼ်ႉလႂ်၊ ၸိူဝ်း PDF ဢၼ်ပဵၼ်ၸုမ်းၵေႃႇၵၢၼ်ႁၢႆႉၼၼ်ႉ လႂ်ၼႆႉ ႁႂ်ႈလႆႈၾႃႈပွႆႇလၢႆးယိပ်းၵွင်ႈ ၵၢင်ႇ တိုၵ်းတေႃးႁဵတ်းႁၢႆႉသေ ၼင်ႇႁိုဝ် တေဢဝ်လၢႆးၵၢၼ်မိူင်း ၵႄႈလိတ်ႈ လႆႈပၼ်ႁႃၵၢၼ်မိူင်း လူၺ်ႈလၢႆးတၢင်း ပႃႇတီႇၵၢၼ်မိူင်းလႄႈသင်၊ လူၺ်ႈလၢႆးတၢင်းပၢင်လိူၵ်ႈတင်ႈလႄႈသင် ဢွၼ်ၵၼ်ၵပ်းသိုပ်ႇမႃးသေၵမ်းၼႆ လႆႈႁၼ်ႁွင်ႈ ၵၢၼ်ပိုၼ်ၽၢဝ်ႇ ၶွင်ႇသီႇသိုၵ်းမၢၼ်ႈ ဢွၵ်ႇၶၢဝ်ႇမႃးမိူဝ်ႈဝၼ်းတီႈ 26/09/2024 ယူႇယဝ်ႉ။
ၵဵဝ်ႇလွင်ႈယိုၼ်းမိုဝ်းဢၼ်ၼႆႉသေ ၽိုၼ်ၶၢဝ်ႇ THE STRAITS TIME လၢတ်ႈဝႃႈ ပဵၼ်ၶေႃႈယိုၼ်းမိုဝ်းဢၼ်ဢမ်ႇၾၢင်ႉဢမ်ႇထိူမ် ၼႆယဝ်ႉ။ ယဝ်ႉသမ်ႉၶိုၼ်းဢိင်ဢၢင်ႈ ၶေႃႈၵႂၢမ်း ၽတူဝ်ႇၸေႃးတေႃးၼီး တွပ်ႇလၢတ်ႈဝႆႉတီႈ AFP ၼၼ်ႉသေ ပိူင်းၼႄၶေႃႈၵၢင်ၸႂ် ၶွင်ၾၢႆႇလုၵ်ႉၽိုၼ်ႉယူႇယဝ်ႉ။
ၶေႃႈမၢႆၼိုင်ႈ – တပ်ႉသိုၵ်းၼႆႉ တေဢမ်ႇလႆႈၶဝ်ႈပႃးၼႂ်းၵၢၼ်မိူင်း။ မၢႆသွင် – တပ်ႉသိုၵ်းၼႆႉ တေလႆႈယွမ်းႁပ်ႉ ပိူင်ငဝ်ႈပိုင်းမိူင်း ၾႅတ်ႊတရႄႊ တီႊမူဝ်ႊၶရႅတ်ႊတိၵ်ႊ။ မၢႆသၢမ် – ၶဝ်တေလႆႈႁပ်ႉပုၼ်ႈၽွၼ်း ယွမ်းယိုၼ်တေႃႇ လွင်ႈပူၼ်ႉပႅၼ်ၾိင်ႈသိုၵ်း၊ လွင်ႈသၢၼ်ၶတ်း ပိူင်ပဵၼ်ၵူၼ်း ၸဵမ်ၸိူဝ်းၼႆႉ လူၺ်ႈဢမ်ႇလႆႈၺႃးတူတ်ႈတၢမ်ႇသင်။ ထႃႈၶဝ်ဢမ်ႇၽွမ်ႉတူၵ်းလူင်း ၸိူဝ်းၼႆႉ တေဢမ်ႇပဵၼ်သင်မႃး ဝႃႈၼႆယဝ်ႉ။
ၶေႃႈယိုၼ်းမိုဝ်း ဢၼ်ဝႃႈမႃးၼႆႉ လီႁိုဝ်ၸႃႉ ပႆႇဝႃႈလႆႈသေတႃႉ တၵ်းၸႂ်ႈၵၢင်ႈၶမ်ၶေႃး တႃႇၸုမ်းၸၢဝ်းလုၵ်ႉၽိုၼ်ႉ ဢၼ်ဢမ်ႇမီးဝႆႉၶေႃႈတူၵ်းလူင်းၵၢၼ်မိူင်း မၼ်ႈၵႅၼ်ႇၼႅၼ်ႈၼႃၼၼ်ႉ ဢမ်ႇႁၢင်ႉယဝ်ႉ။ တၢမ်ၼင်ႇၶွင်ႇသီႇသိုၵ်းမၢၼ်ႈ ပိုၼ်ၽၢဝ်ႇဝႆႉၸိုင် ၸုမ်းၸၢဝ်းလုၵ်ႉၽိုၼ်ႉၼႆႉ ပဵၼ်ဝႆႉယူႇသၢမ်သႅၼ်း။
ၸုမ်းၼိုင်ႈ – ၸုမ်းၸၢဝ်းၶိူဝ်းယိပ်းၵွင်ႈၵၢင်ႇ၊ ၼႂ်းၼၼ်ႉ တေၸၢင်ႈပႃး ၶၢင် KIA ၊ ယၢင်းလႅင် KNPP ၊ ယၢင်း ၽိူၵ်ႇ KNU ၊ ၶျၢင်း CNF ၊ လုၵ်ႈႁဵၼ်း 88 ABSDF ၸိူဝ်းဢၼ်တိုၵ်းတေႃးယူႇသေတႃႉ သမ်ႉဢမ်ႇပႃးၼႂ်း သဵၼ်ႈၸိုဝ်ႈၵေႃႇၵၢၼ်ႁၢႆႉ။
ၸုမ်းသွင် – ၸိူဝ်းၸုမ်းၸၢဝ်းၵေႃႇၵၢၼ်ႁုၵ်းႁၢႆႉ၊ ၼႂ်းၼၼ်ႉ ၵဝ်ႈၵၢင်ႉ MNDAA ၊ ရၶႅင်ႇ AA လႄႈ ပလွင်ႈ TNLA ၸိူဝ်း ၼႆႉ တိုၼ်းပႃးယဝ်ႉ။ တိုၵ်ႉထုၵ်ႇပိုၼ်ၽၢဝ်ႇပဵၼ် ၸုမ်းၵေႃႇၵၢၼ်ႁၢႆႉ မိူဝ်ႈဝၼ်းတီႈ 2 ၼႂ်းလိူၼ်သႅပ်ႊထႅမ်ႊပိူဝ်ႊၼႆႉ။ လိူဝ်ၼၼ်ႉ ၸၢင်ႈပႃးထႅင်ႈ CRPH ၊ NUG လႄႈ PDF ၸိူဝ်းဢၼ်ထုၵ်ႇပိုၼ်ၽၢဝ်ႇပဵၼ် ၸုမ်းၵေႃႇၵၢၼ်ႁၢႆႉဝႆႉ ၸဵမ်မိူဝ်ႈလိူၼ်မေႊ ထူၼ်ႈ 2 ဝၼ်း ၼႂ်းပီ 2021 ပုၼ်ႉယူႇယဝ်ႉ။
လိူဝ်ၼၼ်ႉ သမ်ႉပၢႆဝႃႈထႅင်ႈ ၸိူဝ်း PDF ဢၼ်ပဵၼ်ၸုမ်းၵေႃႇၵၢၼ်ႁၢႆႉၼႆ ႁင်းမၼ်းၶေႃၶေႃၵွၼ်ႇလႄႈ ဢၼ်ၼႆႉတႄႉ လႅပ်ႈတေယိူင်းၸူး PDF ၸိူဝ်းဢမ်ႇယူႇတႂ်ႈ ၵုမ်းၵမ် ၶွင် NUG ၼၼ်ႉႁိုဝ်ၼႆ လႆႈလၢမ်းဢဝ်ၵူၺ်းယဝ်ႉ။
ပိူင်ပဵၼ် ၵၢၼ်လုၵ်ႉၽိုၼ်ႉၼႂ်းဝၼ်းမိူဝ်ႈလဵဝ် ဢၼ်တႄႇမႃးလူၺ်ႈ ၸုမ်းသိုၵ်းမၢၼ်ႈ ဢထမ်ႇမ ႁိမ်ၸိင်းဢဝ်ဢႃႇၼႃႇပၼ်ႇပွင်ၸိုင်ႈမိူင်းၼႆႉ ၾၢႆႇလႂ်ပူၼ်ႉပႅၼ်လူၼ်ႉလိူဝ်၊ ၾၢႆႇလႂ်ႁုၵ်းႁၢႆႉတွၼ်းတိူဝ်းၼႆ တၢမ်တူဝ် ၽူႈၶွင်ႈမၢပ်ႇၶဝ် ႁူႉထိုင်ၵၼ်ယူႇ၊ ၵူၼ်းမိူင်းတင်းလၢႆ ဢၼ်လႆႈပဵၼ်ၸၢၵ်ႇသိုၵ်းသိူဝ်ၼႆႉ ယိုင်ႈၶႅၼ်း ႁူႉထိုင် လိုၵ်ႉၼႂ်းယဝ်ႉ။
ဢမ်ႇမီးလွင်ႈႁပ်ႉပုၼ်ႈၽွၼ်း လွင်ႈႁဵတ်းပုၼ်ႈၽွၼ်းတေႃႇ ၵူၼ်းမိူင်းၸိူဝ်းလႆႈလူႉႁၢႆတၢႆသုမ်း ဢသၢၵ်ႈသၢႆၸႂ်၊ ၶူဝ်းၶွင်ႁိူၼ်းယေး ၸဵမ်တင်းဢၼႃႇၵၢတ်ႈ မိူဝ်းၼႃႈတင်းပၢၼ်ၼၼ်ႉသေ တေဢုပ်ႇဢူဝ်းတူၵ်းလူင်း ၵၼ်ယဝ်ႉ ယိဝ်ႉၵႂႃႇငၢႆႈငၢႆႈငႅမ်ႈငႅမ်ႈ ၸွင်ႇတေလႆႈႁိုဝ်။ ၸူဝ်ႈၵႃႈ ပႆႇမီးၶေႃႈႁပ်ႉပၢၵ်ႇၼိူဝ် လွင်ႈတဵင်ႈထမ်းၵၼ် ၵူၼ်းၼႆႉ ဢုပ်ႇယူႇၵေႃႈ တေဢမ်ႇၸၢင်ႈတူၵ်းလူင်းၵိုတ်းတိုၵ်း ၵေႃႇသၢင်ႈၵၢၼ်ငမ်းယဵၼ်၊ တေဢမ်ႇၸၢင်ႈၵႄႈလိတ်ႈလႆႈပၼ်ႁႃၵၢၼ်မိူင်းၼႆ ၸိူဝ်းလႆႈယူႇၼုၵ်းထုၵ်းထူၸွမ်း ၵၢၼ်သိုၵ်းသိူဝ်မႃး တၵ်းတေဝႃႈ ၼႆယူႇ။
မၢင်ၸိူဝ်းသမ်ႉ ၸၢင်ႈဝႃႈ ၽွင်းလိၼ်ႉၸၢင်ႉမႅပ်ႈ ဢမ်ႇၼႅတ်ႈထိူဝ် ထိုင်ၵမ်းဝႅပ်ႈၶိုၼ်ႈတၢင်းၼိူဝ် တေႁၢမ်းပၢတ်ႇၼႆယူႇသႄႈ။ ႁူမ်ႈဝႃႈၶွင်ႇသီႇသိုၵ်းမၢၼ်ႈၼႆႉ ၺႃးမိပ်ႇငႅၼ်းၵိၼ်းၼႃႇၵေႃႈယႃႇ တႃႇတေၵူၼ်ႇပင်းလူမ်ႉ ယဵတ်ႇၵႂႃႇၼႆႉ ပႆႇငၢႆႈငၢႆႈ၊ ၸင်ႇၼၼ် ၸူဝ်ႈၸႃႈမၼ်းယိုၼ်းမိုဝ်းမႃးၼႆႉ လီဢဝ်ႁႅင်းၵူၼ်းမိူင်း၊ ႁႅင်းၸၢတ်ႈ ၸိုင်ႈလုမ်ႈၾႃႉ ဢိၵ်ႇပႃးႁႅင်းၵူႈမိူင်းမိူင်း ႁူမ်ႈမတ်ႉၼွင်ႇၵဵဝ်ႈၶဵၼ်း ၸဵၼ်းႁႂ်ႈဢွၵ်ႇမႃး ၶေႃႈတူၵ်းလူင်းၵၢၼ် မိူင်း ၼင်ႇၵူၼ်းမိူင်းၸၢဝ်းၶိူဝ်းတင်းလၢႆ ၶႂ်ႈလႆႈၶႂ်ႈပဵၼ်ၼၼ်ႉ ၵမ်းၶၵ်ႉၶၵ်ႉဢိူဝ်ႈ ၼႆယူႇဢေႃႈ။
တၢင်းႁၼ်တႄႉ တင်းသွင်ပႃႈသွင်ၾၢႆႇၼႆႉ မႅၼ်ႈၽႂ်မႅၼ်ႈမၼ်းယူႇ၊ ၵူၺ်းၵႃႈ ၸဝ်ႈတူၼ်ႈၼႆႉ ဢမ်ႇၸႂ်ႈၸိူဝ်းႁပ်ႉဢုပ်ႇတႅၵ်ႇယႅၵ်ႈၵၼ်ယူႇၼႆ၊ ၸဝ်ႈတူၼ်ႈၸမ်ႉ ပဵၼ်ၶွင်ႇသီႇသိုၵ်းမၢၼ်ႈ ဢၼ်တႄႇၵေႃႇသၢင်ႈ ပၼ်ႁႃမႃး လူၺ်ႈၸႂ်ႉလၢႆး ႁုၵ်းႁၢႆႉသေ ယိုတ်းဢႃႇၼႃႇပၼ်ႇပွင် ၸိုင်ႈမိူင်းမႃးၼၼ်ႉဢေႃႈ။
ၶေႃႈယိုၼ်းမိုဝ်း ႁွင့်ဢုပ်ႇၵၢၼ်မိူင်းၶွင်မၼ်းၼႆႉ ၸွင်ႇဢိင်ၼိူဝ် ၸႂ်ၾၢႆႇၶႂ်ႈၵၢၼ်မိူင်း political will ဢၼ်ၶႂ်ႈၵႄႈလိတ်ႈပၼ်ႁႃ ႁႂ်ႈယဝ်ႉတူဝ်ႈလီငၢမ်းသေ ဢၢၼ်းပွင်သၢင်ႈဝၢၼ်ႈမိူင်းၵတ်းယဵၼ် ၼိမ်တဵင်ႈတႄႉယူႇႁိုဝ်၊ ဢမ်ႇၼၼ် ၵူၺ်းပဵၼ်လၢႆး ၼမ်ႉလၢႆးတႃးယႃမူၼ်ႇ ဢၼ်တေႃႉတႄႉႁဵတ်းႁႂ်ႈပၼ်ႁႃ ၵိုတ်းယင်ႉၸူဝ်ႈၶၢဝ်းသေ တေၶိုၼ်းၶိုင်သၢင်ႈႁႅင်းသိုၵ်း ၶိုၼ်ႈၶီႇၸိၵ်းၵူၼ်းမိူင်းထႅင်ႈႁႃႉၼႆ တေလႆႈပႂ်ႉတူၺ်း ႁႂ်ႈႁူႉၸႅင်ႈလႅင်းတႅတ်ႈတေႃးၵွၼ်ႇယဝ်ႉ။ ႁၢၼ်ႉတေႃႇယၢမ်းလဵဝ်တႄႉ ပႆႇႁၼ်လွင်ႈႁပ်ႉပုၼ်ႈၽွၼ်းသင်၊ ပႆႇမီးလွင်ႈႁပ်ႉပၢၵ်ႇတေႃႇ လွင်ႈတဵင်ႈထမ်းသင်လႄႈ ၵႃႈတၵ်းတေလႆႈဝႃႈ ပဵၼ်ၶေႃႈယိုၼ်ႈယွၼ်းလႃႈလီႈႁဵတ်းၵႅင်ႈတေႃႇ ၵူၼ်းမိူင်း တင်းလၢႆလႄႈ ၵူႈမိူင်းမိူင်းတင်းၵမ်ႇၾႃႇ ၵူၺ်းၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ