ဝၼ်းတီႈ 26/09/2024 ယၢမ်းၵၢင်ၼႂ်မွၵ်ႈ 7မူင်းၶိုင်ႈ ၶိူင်ႈမိၼ်သိုၵ်းမၢၼ်ႈ ပွႆႇမၢၵ်ႇသႂ်ႇ တီႈဝဵင်းတၢၼ်ႇတွႆး မိူင်းရၶႅင်ႇ ၵူၼ်းပၢႆႈၽေးသိုၵ်းလူႉတၢႆ 13 ၵေႃႉ မၢတ်ႇၸဵပ်း 25 ၵေႃႉ ပႃးလုၵ်ႈဢွၼ်ႇလႄႈ ၵူၼ်းထဝ်ႈ တင်းၼမ်။

သိုၵ်းမၢၼ်ႈ ယိုတ်းမိူင်းၼႆႉ ၸႂ်ႉၶိူင်ႈမိၼ်သေ ပွႆႇမၢၵ်ႇသႂ်ႇ တီႈလုမ်းၾၢႆႇၵုမ်းသၽႃႇဝ သိင်ႇဝႅတ်ႉလွမ်ႉလႄႈ ႁူင်းႁေႃငဝ်ႈဝဵင်းတၢၼ်ႇတွႆး ပဵၼ်ဢွင်ႈတီႈၵူၼ်းပၢႆႈၽေးသိုၵ်း သွၼ်ႈယူႇဝႆႉ ၼႆယဝ်ႉ။

ဢိင်ၼိူဝ် လွင်ႈသိုၵ်းမၢၼ်ႈ ၸႂ်ႉၶိူင်ႈမိၼ်ပွႆႇမၢၵ်ႇသႂ်ႇ ဢွင်ႈတီႈၵူၼ်းပၢႆႈၽေးသိုၵ်းၼႆႉ ပဵၼ်လွင်ႈ တင်ႈၸႂ် ႁဵတ်ႈႁႂ်ႈၵူၼ်းမိူင်း မၢတ်ႇၸဵပ်းလူႉတၢႆ၊ ပဵၼ်လွင်ႈပူၼ်ႉပႅၼ်ပိူင်ၵၢၼ်သိုၵ်း ပိူင်ၵျႅၼ်ႊၼီႊဝႃႊ ၵွၼ်ႊဝႅၼ်ႊသျိၼ်ႊ တႅၵ်ႇတႅၵ်ႇလႅင်းလႅင်းယဝ်ႉၼႆ – ဢူးၶႅင်ႇတုၶ ၽူႈၶၢၼ်ပၢၵ်ႇ သိုၵ်းရၶႅင်ႇ လၢတ်ႈၼင်ႇၼႆ။

ႁူဝ်လိူၼ်သႅပ်ႊထႅမ်ႊပိူဝ်ႊၼႆႉ သိုၵ်းမၢၼ်ႈ ပိုၼ်ၽၢဝ်ႇဝႃႈ ၸုမ်းဢူၺ်းလီပွတ်းႁွင်ႇ သၢမ်ၸုမ်း ဢၼ်ပဵၼ်သိုၵ်းၵဝ်ႈၵၢင်ႉ MNDAA ၊ သိုၵ်းတဢၢင်း TNLA တင်း သိုၵ်းရၶႅင်ႇ AA ၸိူဝ်းၼႆႉ ပဵၼ်ၸုမ်းၵေႃႇၵၢၼ်ႁၢႆႉ ဝႃႈၼႆ။

လိူဝ်ၼၼ်ႉ မိူဝ်ႈဝၼ်းတီႈ 3 ပူၼ်ႉမႃးၼၼ်ႉၵေႃႈ ႁူဝ်ၼႃႈသိုၵ်း ယိုတ်းမိူင်း မိၼ်းဢွင်ႇလၢႆႇ လၢတ်ႈဝႃႈ တေထူဝ်းသိုၵ်း ဢဝ်ၶိုၼ်း ၼႃႈတီႈ ဢၼ်ၸုမ်းလုၵ်ႉၽိုၼ်ႉ ၸုမ်းယိင်းၵွင်ႈၵၢင်ႇ ယိုတ်းၵုမ်းလႆႈ ဝႆႉၸိူဝ်းၼၼ်ႉ။ ဝၢႆးၼၼ်ႉၵေႃႈ သိုၵ်းမၢၼ်ႈ ၸႂ်ႉၶိူင်ႈမိၼ် ပွႆႇမၢၵ်ႇမႃး ၼႂ်းမိူင်းတႆးပွတ်းႁွင်ႇ၊ မိူင်း ရၶႅင်ႇလႄႈ ၼႃႈတီႈၸုမ်းလုၵ်ႉၽိုၼ်ႉတူင်ႉၼိုင် ႁၢဝ်ႈႁႅင်း၊ ႁဵတ်းႁႂ်ႈၵူၼ်းမိူင်း မၢတ်ႇၸဵပ်းလူႉတၢႆၼမ်။