သိုၵ်းမၢၼ်ႈ ယိုတ်းမိူင်း တင်ႈၸႂ် ဢဝ်ၶိူင်ႈမိၼ် မႃးပွႆႇမၢၵ်ႇထႅင်ႈ တီႈဝဵင်းလႃႈသဵဝ်ႈ တိူဝ်ႉၺႃးၵူၼ်းမိူင်း လူႉတၢႆထႅင်ႈ 2 ၵေႃႉ မၢတ်ႇၸဵပ်း 6 ၵေႃႉလႄႈ ၵၢတ်ႇလူင်လႃႈသဵဝ်ႈ ၸိူဝ်းၼႆႉ လူႉၵွႆၼမ်။

ဝၼ်းတီႈ 27/09/2024 ယၢမ်းၵၢင်ၼႂ်မွၵ်ႈ 3 မူင်းၶိုင်ႈ ၽွင်းၵူၼ်းမိူင်း တိုၵ်ႉၼွၼ်းလပ်းယဵၼ်ယူႇၼၼ်ႉ သိုၵ်းမၢၼ်ႈ ယိုတ်းမိူင်း ဢဝ်ၶိူင်ႈမိၼ် မႃးပွႆႇမၢၵ်ႇ တီႈၵၢတ်ႇလူင်လႃႈသဵဝ်ႈ၊ တီႈပွၵ်ႉ 1 လႄႈ ပွၵ်ႉ 2 ၼႂ်းဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ၸိူဝ်းၼႆႉ။

ၵူၼ်းပိုၼ်ႉတီႈ ဝဵင်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ – “ဢိင်ၼိူဝ် လႆႈၶၢမ်ႇ လွင်ႈသိုၵ်းမၢၼ်ႈ ဢဝ်ၶိူင်ႈမိၼ် မႃးပွႆႇမၢၵ်ႇသႂ်ႇ ၸိူင်ႉၼႆၼႆႉ ပဵၼ်ဢၼ်တုမ်ႉတိူဝ်ႉပၢႆးၸႂ်တႄႉ။ ၵၢင်ၶမ်ႈၵၢင်ၶိုၼ်းၵေႃႈ ဢမ်ႇလႆႈၼွၼ်းလပ်းလီ။ ၵူဝ်မၢၵ်ႇၶိူင်ႈမိၼ်မႃးတူၵ်းသႂ်ႇ”- ဝႃႈၼႆ။

သိုပ်ႇလၢတ်ႈဝႃႈ – “တေပၢႆႈဢွၵ်ႇဝဵင်းၵေႃႈ ဢမ်ႇမီးငိုၼ်းယဝ်ႉ။ ယွၼ်ႉဢမ်ႇလႆႈႁဵတ်းၵၢၼ် ဢမ်ႇမီးငိုၼ်း ၶဝ်ႈလႄႈ ၸိူဝ်းပိူၼ်ႈၵႂႃႇၼၼ်ႉတႄႉ ၵမ်ႈၼမ် ပဵၼ်ၵူၼ်းမီးငိုၼ်း။ ဢၼ်ၵိုတ်းယူႇၼႆႉ ၵမ်ႈၼမ် ပဵၼ်ၵူၼ်းၽၢၼ်ၼၼ်ႉၶႃႈယဝ်ႉ”- ဝႃႈၼႆ။

ၵဵဝ်ႇလူၺ်ႈလွင်ႈ သိုၵ်းမၢၼ်ႈ ဢဝ်ၶိူင်ႈမိၼ် မႃးပွႆႇမၢၵ်ႇ တီႈဝဵင်းလႃႈသဵဝ်ႈၼႆႉ တင်းမူတ်း 3 လုၵ်ႈ ပဵၼ်မၢၵ်ႇ ၼမ်ႉၼၵ်း 500 ပွင်ႇလႄႈ 200 ပွင်ႇ တိူဝ်ႉၺႃးၵၢတ်ႇလူင်ဝဵင်းလႃႈသဵဝ်ႈ လူႉၵွႆၶိုင်ႈပၢႆ ယဝ်ႉၵေႃႈ တိူဝ်ႉၺႃး ႁိူၼ်းယေး ႁူင်းႁႅမ်း တီႈပွၵ်ႉ 1 တင်း ပွၵ်ႉ 2 လူႉၵွႆၼမ်။

မိူၼ်ၼႆ ၼင်ႇၵဝ်ႇ မိူဝ်ႈဝၼ်းတီႈ 24/09/2024 ယၢမ်းၵၢင်ၼႂ်ၸဝ်ႉ မိူင်းပႆႇလႅင်း သိုၵ်းမၢၼ်ႈ ဢဝ်ၶိူင်ႈမိၼ် မႃးပွႆႇမၢၵ်ႇ တီႈပွၵ်ႉ 2 တီႈဝဵင်းလႃႈသဵဝ်ႈ 2 လုၵ်ႈ တိူဝ်ႉၺႃးၵူၼ်းမိူင်းၼၢင်းယိင်း လူႉတၢႆထင်တီႈ ၵေႃႉၼိုင်ႈ လႄႈ မၢတ်ႇၸဵပ်း 9 ၵေႃႉ ၼႆယဝ်ႉ။

ၼႂ်းလိူၼ်သႅပ်ႊထႅမ်ႊပိူဝ်ႊၼႆႉ ပၢင်တိုၵ်း ဢမ်ႇ ပဵၼ်သေ သိုၵ်းမၢၼ်ႈ ဢဝ်ၶိူင်ႈမိၼ် မႃးပွႆႇမၢၵ်ႇ တီႈဝဵင်း လႃႈသဵဝ်ႈၼႆႉ မီး 7 ပွၵ်ႈယဝ်ႉ တိူဝ်ႉၺႃးၵူၼ်းမိူင်းတၢႆ 3 ၵေႃႉ၊ မၢတ်ႇၸဵပ်းမွၵ်ႈ 40 ၵေႃႉ – ယူႇတီႈ သိုၵ်း ၵဝ်ႈၵၢင်ႉ MNDAA ပိုၼ်ၽၢဝ်ႇ ဢွၵ်ႇဝႆႉၼင်ႇၼႆ။