ဝၼ်းတီႈ 26/09/2024 ၼႆႉ သိုၵ်းမၢၼ်ႈ ယိုတ်းမိူင်း ပိုၼ်ၽၢဝ်ႇဝႃႈ သိုၵ်းၸၢဝ်းၶိူဝ်းတင်း ၸုမ်းၵႅတ်ႇၶႄၵူၼ်းမိူင်း PDF ၸိူဝ်းၼႆႉ ႁႂ်ႈဢဝ်ၵၢၼ်မိူင်း ၵႄႈလိတ်ႈပၼ်ႁႃၵၢၼ်မိူင်းသေ ၶဝ်ႈပၢင်လိူၵ်ႈတင်ႈၵႂႃႇ ဝႃႈၼႆ။

ၾၢႆႇၼိုင်ႈၵေႃႈ သိုၵ်းမၢၼ်ႈ ၸႂ်ႉၶိူင်ႈမိၼ်သေ ပွႆႇမၢၵ်ႇသႂ်ႇ ၼႂ်းၼႃႈတီႈ ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်းတင်း ၸုမ်း PDF ယိုတ်းၵုမ်းဝႆႉႁၢဝ်ႈႁႅင်း ႁဵတ်းႁႂ်ႈၵူၼ်းမိူင်း မၢတ်ႇၸဵပ်းလူႉတၢႆၼမ် ႁိူၼ်းယေးတီႈယူႇၵေႃႈ လူႉၵွႆ။  

ၼႂ်းၶေႃႈပိုၼ်ၽၢဝ်ႇ သိုၵ်းမၢၼ်ႈၼၼ်ႉ ပႃးဝႆႉဝႃႈ – ၼင်ႇႁိုဝ် တေမီးလွင်ႈၶိုၼ်ႈယႂ်ႇ ႁုၼ်ႈမုၼ်းလႄႈ လွင်ႈငမ်းယဵၼ်ၼိမ်တဵင်ႈၼၼ်ႉ ၸုမ်းယိပ်းၵွင်ႈၵၢင်ႇၸၢဝ်းၶိူဝ်း၊ ၸုမ်းၵေႃႇၵၢၼ်ႁၢႆႉ၊ ၸုမ်း PDF ၸိူဝ်းၼႆႉ ႁႂ်ႈဝၢင်းၶိူင်ႈၵွင်ႈၵၢင်ႇ ဢဝ် ၵၢၼ်မိူင်းသေ တေၵႄႈလိတ်ႈၵႂႃႇလႆႈ ပၼ်ႁႃၵၢၼ်မိူင်းၼၼ်ႉ ယိုၼ်ႈမွၵ်ႇႁွင်ႉယူႇ – ဝႃႈၼႆဝႆႉ။

ပူၼ်ႉမႃး မိူဝ်ႈဝၼ်းတီႈ 25-26 ၼႆႉ သိုၵ်းမၢၼ်ႈ မၢပ်ႇၼႄးပိုၼ်ၽၢဝ်ဢွၵ်ႇမႃးဝႃႈ ၸုမ်းလူင်ပွင်ၸိုင်ႈၽွမ်ႉႁူမ်ႈ ၸိူဝ်ႉၸၢတ်ႈ NUG တင်း ၸုမ်းဢူၺ်းလီပွတ်းႁွင်ႇ 3 ၸုမ်းၼႆႉ လႆႈငိုၼ်းၵမ်ႉၸွႆႈတီႈ ဢမေႊရိၵၼ်ႊ ၼိုင်ႈပီလႂ် 200 လၢၼ်ႉ တေႃႊလႃႊ ဝႃႈၼႆ။

လိူဝ်ၼၼ်ႉ ပႃးဝႆႉထႅင်ႈဝႃႈ မိူင်းၶႄႇ ပဵၼ်မိူင်းဢူၺ်းလီ ဢၼ်ၸႅတ်ႈၸၢင်ႇ တႃႇၵူၼ်းမိူင်းမၢၼ်ႈ၊ ၶေႃႈမွၵ်ႇႁွင်ႉၼၼ်ႉ ပဵၼ်တႃႇၼႄၶေႃႈဢၢင်ႈ ႁႂ်ႈမိူင်းၶႄႇ ၵမ်ႉပၼ်ပၢင်လိူၵ်ႈတင်ႈလႄႈ ၵမ်ႉပၼ် သိုၵ်းမၢၼ်ႈၵူၺ်းယဝ်ႉၼႆ ၽူႈလဵပ်ႈႁဵၼ်း ၵၢၼ်မိူင်း ထတ်းသၢင်လၢတ်ႈဝႆႉ ၼင်ႇၼႆ။

တႄႇဝၼ်းတီႈ 01/10/2024 ၵႂႃႇ သိုၵ်းမၢၼ်ႈ တေတႄႇၵဵပ်းသဵၼ်ႈမၢႆ ႁူဝ်ႁိူၼ်းပတ်းပိုၼ်ႉ မိူင်းမၢၼ်ႈ၊ ဢိင်ၼိူဝ် သဵၼ်ႈမၢႆၼၼ်ႉသေ ၼႂ်းလိူၼ်ၼူဝ်ႊဝႅမ်ႊပိူဝ်ႊ ပီ 2025 ၼၼ်ႉ တေၸတ်းပၢင်လိူၵ်ႈတင်ႈ ၵႂႃႇၼႆ ၸွမ်ၸိၵ်းသိုၵ်း မိၼ်းဢွင်ႇလႅင်ႇ လၢတ်ႈဝႆႉၼင်ႇၼႆ။