မိူဝ်ႈၼႆႉ ဝၼ်းတီႈ 26/09/2024 ယၢမ်းၵၢင်ဝၼ်း 11 မူင်းပၢႆ ဢွၼ်ႇႁဵၼ်း သွင်ပီႈၼွင်ႉ ၺႃးၸူၼ်ၸွမ်းတၢင်း တီႈၾၢႆႇ ၼႃႈ ယေးငိုၼ်းၵမ်ႇပေႃးၸ မၢႆ (1) ပွၵ်ႉၼိူဝ် ၵၢင်ဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ သုမ်းၵႂႃႇ ၾူၼ်းလုၵ်ႈၼိုင်ႈလႄႈ ရူတ်ႉၶိူင်ႈလမ်းၼိုင်ႈ။
ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “လုၵ်ႈႁဵၼ်း သွင်ပီႈၼွင်ႉ ၺႃးၵူၼ်းႁၢႆႉ သွင်ၵေႃႉပဵၼ်ၽူႈ ၸၢႆး ဢဝ်ၵွင်ငႃသေ ၸူၼ်ၶဝ်ၸွမ်းတၢင်း တီႈပွၵ်ႉၼိူဝ် လႆႈၵႂႃႇရူတ်ႉၶိူင်ႈ (Scopy) လမ်းၼိုင်ႈလႄႈ ၾူၼ်းသႅၼ်း (I Phone) လုၵ်ႈၼိုင်ႈ ၵေႃႉပဵၼ် လုၵ်ႈႁဵၼ်း ၸိုဝ်ႈႁွင်ႉ ၸၢႆးယီႈ ဢႃယု 16 ပီၼၼ်ႉ ၺႃးၵွင်ႈယိုဝ်းသႂ်ႇ တိူဝ်ႉၺႃးတီႈ ၶႃၾၢႆႇသၢႆႉ ယၢမ်းလဵဝ် သူင်ႇယူတ်းယႃဝႆႉတီႈ ႁူင်းယႃသူၺ်ႇမူႇၸေႊယဝ်ႉ ဢမ်ႇထိုင်တီႈမႆႈၸႂ်”- ဝႃႈၼႆ။
ၸၢႆးယီႈ ဢႃယု 16 ပီ ဢၼ်တိူဝ်ႉၺႃးမၢၵ်ႇၵွင်ႈ တီႈၶႃၼၼ်ႉ ပဵၼ်လုၵ်ႈႁဵၼ်း တီႈႁူင်းႁဵၼ်း ICTC Private High School – Muse ယူႇဝႆႉၸၼ်ႉ 9 ဝႃႈၼႆ။
ဢွၼ်ႇႁဵၼ်း သွင်ပီႈၼွင်ႉ ဢၼ်ၺႃးၸူၼ် ၸွမ်းတၢင်းၼၼ်ႉ ပဵၼ်တီႈၾၢႆႇလင် ႁၢၼ်ႉသူဝ်ႇသူဝ်ႇပေႇပေႇ တီႈၼၼ်ႈသမ်ႉ ႁၢၼ်ႉၵဵမ်းၵေႃႈၼမ် ယဝ်ႉၵေႃႈ ၵူၼ်းသူႇသမ်းၵိၼ်ယႃႈမဝ်းၵမ် ၸိူဝ်းၼႆႉ ၵေႃႈၼမ် – ၵူၼ်းပိုၼ်ႉတီႈလၢတ်ႈ။
မိူဝ်ႈဝၼ်းတီႈ 23/08/2024 ယၢမ်းၵၢင်ၶမ်ႈမွၵ်ႈ 8:21 မူင်း ၸုမ်းဢမ်ႇႁူႉၾၢႆႇ 3 ၵေႃႉ ယိုဝ်းၵွင်ႈလွၵ်ႇငိုတ်ႈသေ ဢဝ်ၵွင်ႈငႃ ၸဝ်ႈၶွင်ရူတ်ႉၵႃး တီႈၼႃႈႁၢၼ်ႉ T Nail House တီႈပွၵ်ႉၵၢတ်ႇ ႁိမ်းၵွင်းမူးၶမ်း ဝဵင်းမူႇၸေႊ ၸူၼ်လႆႈၵႂႃႇ ၵႃးလမ်း ၼိုင်ႈ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ