ပျီႇတူႉၸိတ်ႉ ပဢူဝ်း  PNO ပိုတ်းယိုဝ်း ၵူၼ်းဝၢၼ်ႈၸၢမ်ၽူး၊ ထုင်ႉလွႆမႆႇ ၸႄႈဝဵင်းႁူဝ်ပူင်း ၸိုင်ႈတႆး ပွတ်းၸၢၼ်း။

ဝၼ်းတီႈ 23/09/2024 ၵၢင်ၼႂ်ၸဝ်ႉ 3 မူင်း ၵူၼ်းသိုၵ်း PNO ၵေႃႉၼိုင်ႈ ၸိုဝ်ႈႁွင်ႉ ပႃႉထူး ပိုတ်းယိုဝ်း ၵူၼ်းဝၢၼ်ႈလဵဝ် ၵၼ် ၸိုဝ်ႈႁွင်ႉ ဢူးၺဵဝ်ႇ။ ပႃႉထူးဢဝ်ၵွင်ႈမႃးၸမ်ႈသေ ၸႂ်ႉဢူးၺဵဝ်ႇသူင်ႇတၢင်း ၵႂႃႇဝၢၼ်ႈတလျႃးၼိူဝ်ႉ၊ ၽွင်းပူၼ်ႉဝၢၼ်ႈသေၵႂႃႇထိုင်ၼႂ်းလွႆယဝ်ႉ ပႃႉထူး လၼ်ႇၵွင်ႈတိူဝ်ႉသႂ်ႇဢူၵ်းသၢႆႉလႄႈ ႁိမ်းၶေႃး ဢူးၺဵဝ်ႇ။

ၵူၼ်းၸမ်ၸႂ်ဢူးၺဵဝ်ႇ လၢတ်ႈတီႈၽူႈတွႆႇႁွၵ်ႈဝႃႈ -“ၵတ်းၵႃႈလႃႈ မၼ်းဢမ်ႇတၢႆ၊ မၢၵ်ႇၵွင်ႈသိတ်ႈ ၽိဝ်ၼိူဝ်ႉ မၼ်းၵႂႃႇ ၵူၺ်း။ ပျီႇတူႉၸိတ်ႉၸိူဝ်းၼႆႉ ပေႃးလၢတ်ႈတႄႉဝႃႈ  တႃႇၵႅတ်ႇၶႄ ၵူၼ်းဝၢၼ်ႈဝႃႇ၊ တီႈတႄႉမႃးၵေႃႈ ၵဵပ်းငိုၼ်းၵူၼ်းဝၢၼ်ႈ ဢဝ်ငိုၼ်းၵူၼ်းဝၢၼ်ႈဢမ်ႇၵႃး ႁဵတ်းႁၢႆႉ ၵူၼ်းဝၢၼ်ႈၸိူင်ႉၼႆ ပဵၼ်လွင်ႈဢၼ်ႁၢႆႉၸႃႉၼႃႇ ” – ဝႃႈၼႆ။

ဢူးၺဵဝ်ႇ ၺႃးယိုဝ်းတီႈ ဢူၵ်းၾၢႆႇသၢႆႉသေ မၢတ်ႇၸဵပ်းႁၢဝ်ႈႁႅင်း ယၢမ်းလဵဝ် ယူတ်းယႃတူဝ်ဝႆႉ တီႈႁူင်းယႃ ဝဵင်းႁူဝ်ပူင်း ဝႃႈၼႆ။

ဢူးၺဵဝ်ႇ ၵေႃႉထုၵ်ႇယိုဝ်းၼႆႉ မိူဝ်ႈ 20 ပီ ပူၼ်ႉမႃး ယၢမ်ႈပဵၼ်ၵၢင်ႉၵႄႇ ၼႂ်းဝၢၼ်ႈသေ ယၢမ်ႈၵႄႈလိတ်ႈပၼ် ပၼ်ႁႃၽူဝ်မႄး ၸၢႆးပႃႉထူး- ၵေႃႉယိုဝ်းၼႆႉ။ ယၢမ်းလဵဝ်ၵေႃႈ တွပ်ႇတႅၼ်းၶိုၼ်းလွင်ႈ ဢမ်ႇပဵင်းပေႃးၸႂ်ၼိူဝ် ဢူးၺဵဝ်ႇၼႆႉႁိုဝ်ၼႆ ၵူၼ်းၸမ်ၸႂ် ဢူးၺဵဝ်ႇ လၢတ်ႈၼင်ၼႆ ။

ၵၢင်ႉၵႄႇဝၢၼ်ႈၸၢမ်ၽူး ၵေႃႉၼိုင်ႈလၢတ်ႈၽူႈတွႆႇႁွၵ်ႈဝႃႈ -“ ပၼ်ႁႃ ၼမ်ႉထူမ်ႈၼမ်ႉၼွင်းသမ်ႉ မဵဝ်းၼိုင်ႈ ၊ တေႃႈလဵဝ် သမ်ႉ ၵူၼ်းဝၢၼ်ႈလဵဝ်ၵၼ် ယိုဝ်းၵၼ်ၶိုၼ်း တေႁဵတ်းႁိုဝ်ၸွႆႈၵႄႈလိတ်ႈၵေႃႈ ပေႃးဢမ်ႇႁူႉယဝ်ႉ”- ဝႃႈၼႆ။

ပႃႉထူး ပျီတူႉၸိတ်ႉပဢူဝ်းၼႆႉ ၵႆႉမဝ်းလဝ်ႈမဝ်းၵႅပ်ႇသေ ၽိတ်းမေႃးသုၵ်ႉယုင်ႈၼႂ်းဝၢၼ်ႈ၊ ၵႆႉၽိတ်းၵၼ်တင်းမေးမၼ်းသေ ၵႆႉလၼ်ႇၵွင်ႈလွၵ်ႇၵၼ်ယူႇ – ၵၢင်ႉၵႄႇလၢတ်ႈၼင်ၼႆ။

လွင်ႈၼႆႉ ၶတ်းၸႂ်တိတ်းတေႃႇၸူး ၸုမ်ပျီႇတူႉၸိတ်ႉပဢူဝ်းတႄႉၵေႃႈ တိတ်းတေႃႇဢမ်ႇလႆႈ။

ၸုမ်းပျီႇတူႉၸိတ်ႉပဢူဝ်း ၸိူဝ်းၼႆႉ လၢတ်ႈဝႃႈတႃႇႁူမ်ႇလူမ်ႈၼႂ်းဝၢၼ်ႈၼႆသေ ပၼ်လုၵ်ႈၸုမ်းၶဝ်ယိပ်းၵွင်ႈ။ ၵူၼ်းယိပ်းၵွင်ႈၸိူဝ်းၼႆႉသမ်ႉပဵၼ် ၵမ်ႈၼမ်ပဵၼ်ၶီႈလဝ်ႈၶီႈယႃႈ။ ၵူၼ်းဝၢၼ်ႈဢမ်ႇမီးလွင်ႈႁူမ်ႇလူမ်ႈ၊ လႆႈလၵ်ႉလွမ်ၵူဝ်ဝႆႉယူႇတႃႇသေႇ ဝႃႈၼႆ။

ယၢမ်းလဵဝ်တီႈထုင်ႉလွႆႇမႆႇ ၼမ်ႉထူမ်ႈ၊ ၼမ်ႉၼွင်း ၵူၼ်းပိုၼ်ႉတီႈ လႆႈပၢႆႈၽႄးၼမ်ႉဝႆႉသေ ယွၼ်ႉၼမ်ႉထူမ်ႈလႄႈ ႁိူၼ်းယေး ၵူၼ်းမိူင်းလူႉၵွႆ ၊ ၶူဝ်ၵူၼ်ႇ သဵၼ်ႈတၢင်းၶၢတ်ႇဝႆႉလႄႈ ၵၢၼ်ၵႂႃႇမႃးႁႃၵိၼ် ပဵၼ်ဢၼ်ယၢပ်ႇၽိုတ်ႇဝႆႉ ဝႃႈၼႆ ။

တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)