ၾင်ႇမိူင်းၶႄႇ မိပ်ႇဢီးသိုၵ်းမၢၼ်ႈ ႁႂ်ႈတီႉၺွပ်း ၸုမ်းၵျႃးၽႅၼ်ႉ (ၸၢဝ်းၶႄႇ) ႁူဝ်ၵူၼ်း 600 ပၢႆ တီႈဝဵင်းမူႇၸေႊ သူင်ႇ ၸူးၶဝ် ဝႃႈၼႆ။

တႄႇဢဝ် ဝၼ်းတီႈ 22/09/2024 ယၢမ်းၵၢင်ၼႂ် သိုၵ်းမၢၼ်ႈ ယိုတ်းမိူင်းႁူမ်ႈတင်း ပလိၵ်ႈမၢၼ်ႈသေ ၵူတ်ႇထတ်း တီႉၺွပ်းၸုမ်းၵျႃးၽႅၼ်ႉ ၼႂ်းၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ ႁၢဝ်ႈႁႅင်း ၶၢဝ်းတၢင်း 3 ဝၼ်းမႃးၼႆႉ တီႉၺွပ်းလႆႈ 500 ပၢႆယဝ်ႉ ၼႂ်းၼၼ်ႉ ပႃးၵူၼ်းမိူင်းမၢၼ်ႈၶိုင်ႈၼိုင်ႈ ၼႆယဝ်ႉ။

ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “မိူင်းၶႄႇ မိပ်ႇဢီးမႃး တီႈသိုၵ်းမၢၼ်ႈ ႁႂ်ႈတီႉၺွပ်း ၸုမ်း ၵျႃးၽႅၼ်ႉ ဢၼ်ပဵၼ်ၵူၼ်းမိူင်းၶႄႇ မႃးယူႇတၢင်းမူႇၸေႊၼႆႉသေ ယွၵ်ႇလႅၼ်ၵိၼ်ငိုၼ်းတၢင်းဢွၼ်ႊလၢႆႊၼၼ်ႉ ဢေႃႈ ႁႂ်ႈသူင်ႇပၼ်ၶဝ် တႃႇႁူဝ်ၵူၼ်း 600 ပၢႆ။ သင်ဝႃႈ ဢမ်ႇလႆႈထိုင် 600 ပၢႆၸိုင် တီႈဢေႇသုတ်းမၼ်း ႁႂ်ႈတီႉသူင်ႇပၼ် 400 ပၢႆၼႆၶႃႈဢေႃႈ။ ၶၢဝ်းတၢင်း 3 ဝၼ်းမႃးၼႆႉ သိုၵ်းမၢၼ်ႈ တီႉၺွပ်းလႆႈ 500 ပၢႆယဝ်ႉ။ ၼႂ်းၼၼ်ႉ တႃႇ 260 ပၢႆတႄႉ ပဵၼ်ၵူၼ်းမိူင်းၶႄႇ။ လိူဝ်ၼၼ်ႉ ပဵၼ်ၵူၼ်းမိူင်းမၢၼ်ႈဢေႃႈ”- ဝႃႈၼႆ။

သိုပ်ႇလၢတ်ႈဝႃႈ – “ၵူၼ်းမိူင်းၶႄႇ 260 ပၢႆ ဢၼ်တီႉၺွပ်းလႆႈဝႆႉၼၼ်ႉ ယၢမ်းလဵဝ် တၢင်းၾင်ႇမိူင်းၶႄႇၶဝ် ပႆႇႁပ်ႉ ႁႂ်ႈတီႉပၼ်ၶဝ် 400 ပၢႆ ဢမ်ႇၼၼ် 600 ပၢႆယဝ်ႉ ၸင်ႇႁႂ်ႈသူင်ႇပၼ်။ ဢၼ်လိူဝ်ထႅင်ႈ ႁူဝ်ၵူၼ်း 200 ပၢႆ ၵူၼ်းမိူင်းမၢၼ်ႈ ၼၼ်ႉတႄႉ ယူႇတီႈ ၾၢႆႇသိုၵ်းမၢၼ်ႈၶဝ် ၸႂ်ႉဢဝ်ငိုၼ်းၶႄႇ 20,000 ယႂၼ်ႊ ၵႂႃႇထုတ်ႇတူဝ်ဢွၵ်ႇၼႆၶႃႈဢေႃႈ” – ဝႃႈ ၼႆ။

ယၢမ်းလဵဝ် ၸုမ်းၵျႃးၽႅၼ်ႉ ႁူဝ်ၵူၼ်း 500 ပၢႆၼႆႉ ၺႃးတီႉၺွပ်း ၵုမ်းတူဝ်ဝႆႉ တီႈမင်ႇၵလႃႇမူႇၸေႊ (9 ၸၼ်ႉ) ဝႃႈၼႆ။

“တေႃႈလဵဝ်ၼႆႉ ယူႇတီႈ ၾၢႆႇၽွင်းငမ်း ဝဵင်းမူႇၸေႊ ႁႂ်ႈၽူႈၵွၼ်းပွၵ်ႉယွမ်ႇ ႁႂ်ႈၸွပ်ႇႁႃပၼ် ၸုမ်းၵျႃးၽႅၼ်ႉ ဢၼ်မူၵ်းသွၼ်ႈတူဝ်ဝႆႉ ၸိူဝ်းၼၼ်ႉထႅင်ႈ။ ၵမ်ႈၼမ် ၸုမ်းၵျႃးၽႅၼ်ႉ ၸိူဝ်းၼႆႉ ယူႇတီႈ ပျီႇတူႉၸိတ်ႉသေ ဢဝ်ႁူမ်ႇလူမ်ႈပၼ်ဝႆႉ”- ၵူၼ်းပိုၼ်ႉတီႈ ဝဵင်းမူႇၸေႊ သိုပ်ႇလၢတ်ႈၼႄၼင်ႇၼႆ။

တႄႇဢဝ် ဝၼ်းတီႈ 22 ၼၼ်ႉမႃး ႁၢၼ်ႉတေႃႇထိုင်ယၢမ်းလဵဝ် တီႈၶူဝ်ပၢင်ႇၶမ်း ၼႂ်းၵႄႈမူႇၸေႊ – ၼမ်ႉၶမ်းၼၼ်ႉ ယူႇတီႈ သိုၵ်းမၢၼ်ႈ၊ ပလိၵ်ႈမၢၼ်ႈသေ ပိၵ်ႉဢိုတ်းဝႆႉ တႃႇၵူတ်ႇထတ်းတီႉၺွပ်း ၸုမ်းၵျႃး ၽႅၼ်ႉၼႆသေ ႁဵတ်းႁႂ်ႈၵူၼ်းပိုၼ်ႉတီႈ ထူပ်းတၢင်းယၢပ်ႇၽိုတ်ႇလိူဝ်ႁႅင်း လွင်ႈၵႂႃႇမႃး။ ရူတ်ႉၵႃး ၵိုတ်းၶမ်တၢင်း ၼပ်ႉႁူဝ်ပၢၵ်ႇ ဢမ်ႇၸၢင်ႈၵႂႃႇမႃး ၼႆယဝ်ႉ။