ဝၼ်းတီႈ 23/09/2024 ၼႆႉ ၵူၼ်းမိူင်းထႆးမွၵ်ႈ 30  ၵေႃႉ ၶွၼ်ႈတုမ်ၵၼ်ၵႂႃႇၼႄၵၢင်ၸႂ် ၾၢႆႇၼႃႈလုမ်း ၽွင်းတၢင်သိုၵ်းမၢၼ်ႈ တီႈမိူင်းၵွၵ်ႇ တုၵ်းယွၼ်းႁႂ်ႈၵႄႈလိတ်ႈပၼ် ပၼ်ႁႃႁႅင်းၵၢၼ် မိူင်းမၢၼ်ႈ ၶဝ်ႈၵႂႃႇ ၼႂ်းမိူင်းထႆးတင်းၼမ်တင်းလၢႆလႄႈ တႃႇၵႅတ်ႇၶႄႁႄႉၵင်ႈပၼ် ၽွၼ်းပၢင်ႈ ၵၢၼ်ပၢႆးမၢၵ်ႈမီး ၵူၼ်းမိူင်းထႆး – ၼႆယဝ်ႉ။

ၵဵဝ်ႈလူၺ်ႈလွင်ႈ ႁႅင်းၵၢၼ်မိူင်းမၢၼ်ႈသေ ၼႂ်းၵၢင်လိူၼ်ၼႆႉ ၸုမ်းၸိူဝ်ႉၸၢတ်ႈထႆး 3 ၸုမ်း လႆႈတႅမ်ႈလိၵ်ႈ ယိုၼ်ႈထိုင်တီႈ လူင်ပွင်ၸိုင်ႈထႆး ၽိုၼ်ၼိုင်ႈ။ ၼႂ်းၼၼ်ႉ ပႃးၶေႃႈတုၵ်းယွၼ်း 8 ၶေႃႈ မိူၼ်ၼင်ႇ ဢမ်ႇပၼ်ၶႂၢင်ႉႁႅင်းၵၢၼ်မိူင်းမၢၼ်ႈ ၵိူတ်ႇလဵင်ႉလုၵ်ႈ၊ ႁႅင်းၵၢၼ်မိူင်းမၢၼ်ႈ ဢၼ်ပၢႆႈၶဝ်ႈမိူင်းထႆး ယွၼ်ႉပၼ်ႁႃၵၢၼ်မိူင်းၼၼ်ႉ ႁႂ်ႈပၼ်ၶႂၢင်ႉယူႇ ဢွင်ႈတီႈပၢင်သဝ်းၸိူဝ်းမၵ်းမၼ်ႈဝႆႉၼၼ်ႉၵူၺ်း၊ ႁႂ်ႈၶိုၼ်းမႄးထတ်းသၢင် လွင်ႈပၼ်ၶႂၢင်ႉပဵၼ်ၵူၼ်းမိူင်းထႆး ၸဵမ်ၸိူဝ်း ၼႆႉ။

ဝၢႆးလင် မီးလွင်ႈတႅမ်ႈလိၵ်ႈယိုၼ်ႈထိုင် တီႈလူင်ပွင်ၸိုင်ႈယဝ်ႉ လွင်ႈတူင်ႉၼိုင်ၼႄၵၢင်ၸႂ် ၸိူဝ်းၼႆႉ ပဵၼ်မႃးထပ်းၵၼ်။

ၽူႈၸွႆႈထႅမ် လွင်ႈႁႅင်းၵၢၼ်မိူင်းမၢၼ်ႈၵေႃႉၼိုင်ႈ လၢတ်ႈဝႃႈ – ၵူၼ်းထႆး ၸိူဝ်းဢွၵ်ႇမႃးၼႄၵၢင်ၸႂ်ၼႆႉ ပဵၼ်ၵူၼ်းၸိူဝ်းဢၼ်ယၢမ်ႈၼႄၵၢင်ၸႂ်မႃး မိူဝ်ႈၵူႈပွၵ်ႈၼၼ်ႉၵူၺ်း။ ၾၢႆႇလင် လွင်ႈၼႄၵၢင်ၸႂ်ၼၼ်ႉ ယုမ်ႇယမ်ဝႃႈ တေမီးလွင်ႈၵဵဝ်ႇၶွင်ႈၸွမ်းၵၢၼ်မိူင်းယူႇ – ဝႃႈၼႆ။

လုမ်းၽွင်းတၢင်သိုၵ်းမၢၼ်ႈ ဢၼ်မီးတီႈမိူင်းၵွၵ်ႇတႄႉ ပိုၼ်ၽၢဝ်ႇဝႆႉဝႃႈ  တႄႇဢဝ်ဝၼ်းတီႈ 16 လိူၼ်သႅပ်ႊထႅမ်ႊပိူဝ်ႊၼႆႉၵႂႃႇ တေဢမ်ႇသိုပ်ႇတေႃႇပၼ် ဢႃယု ဝႂ်ၶၢမ်ႈမိူင်းလုၵ်ႈႁဵၼ်း ၸိူဝ်းယိပ်း Non – Immigrant ED Visa  (ဝီႊသႃႊၶိုၼ်ႈႁဵၼ်းၶၢဝ်းပွတ်း) သေ ၶိုၼ်ႈႁဵၼ်းဝႆႉ ၼႂ်းမိူင်းထႆး – ၼႆယဝ်ႉ။

ၾၢႆႇၼိုင်ႈၵေႃႈ သုၼ်ၶေႃႈမုလ်း လွင်ႈသိုဝ်ႉၶၢႆတီႈလိၼ် လူင်ပွင်ၸိုင်ႈမိူင်းထႆး (REIC) ပိုၼ်ၽၢဝ်ႇဝႆႉ ၼႂ်း ဝၼ်းတီႈ 20 ၼႆႉဝႃႈ ၼႂ်းပီ 2024 ၶၢဝ်းတၢင်း 6 လိူၼ်ၼႆႉ ၵူၼ်းၸိူဝ်းသိုဝ်ႉ ႁွင်ႈၶွၼ်ႊတူဝ်ႊ ယူႇၼႂ်းမိူင်းထႆး ၼမ်လိူဝ်ပိူၼ်သုတ်းထီႉ 2 ၼႆႉ ပဵၼ်မိူင်းမၢၼ်ႈ – သိုဝ်ႇၶၢဝ်ႇ RFA ဢွၵ်ႇဝႆႉၼင်ႇၼႆ။