တႄႇၵၢင်လိူၼ်သႅပ်ႊထႅမ်ႊပိူဝ်ႊ တပ်ႉသိုၵ်းတဢၢင်း TNLA လေႃႇတိုၵ်း တပ်ႉသိုၵ်းမၢၼ်ႈ ၶိုၼ်းႁၢဝ်ႈႁႅင်း တီႈဝဵင်းသီႇပေႃႉ ၸိုင်ႈတႆးပွတ်းႁွင်ႇ။

ဝၼ်းတီႈ 23/09/2024 ယၢမ်းဝၢႆးဝၼ်းမွၵ်ႈ 3 မူင်းၶိုင်ႈၼႆႉ ၶိူင်ႈမိၼ်သိုၵ်းမၢၼ်ႈ ပွႆႇမၢၵ်ႇသႂ်ႇ တီႈဝၢၼ်ႈလီႉသေႃး ႁိမ်းဝၢၼ်ႈၼႃးလွႆ ဝဵင်းသီႇပေႃႉ တူၵ်းတႅၵ်ႇသႂ်ႇႁိူၼ်းၵူၼ်းမိူင်း ၵမ်းသိုဝ်ႈ။ ၸၢၵ်ႇမၢၵ်ႇတိူဝ်ႉသႂ်ႇ ၼၢႆးလၢၼ် 4 ၵေႃႉ တၢႆထင်တီႈ၊ ႁိူၼ်းယေးၵေႃႈ လူႉၵွႆၵႂႃႇ 7 လင် ၵူၼ်းပိုၼ်ႉတီႈ လၢတ်ႈၼင်ႇၼႆ။

ၵူၼ်းပိုၼ်ႉတီႈ လၢတ်ႈတီႈၽူႈတွႆႇႁွၵ်ႈဝႃႈ– “ႁိူဝ်းမိၼ်သိုၵ်းမၢၼ်ႈ ယူႇယူႇမႃးပွႆႇမၢၵ်ႇ၊ ဝၼ်းတီႈ 22 မႃးတူၵ်း တၢင်းၵုင်း ၽြႃးလူင် ၵူၼ်းတၢႆ ၵေႃႉၼိုင်ႈ ၊ဝၼ်းတီႈ 23 သမ်ႉ တိူဝ်ႉ 4 ၵေႃႉ ၼၢႆးလၢၼ်။ ဢဝ်ႁိူဝ်းမိၼ်သေ မႃးပွႆႇမၢၵ်ႇၵေႃႈပွႆႇ၊ ဢဝ်မၢၵ်ႇလူင်သေ ယိုဝ်းၵေႃႈယိုဝ်း။ တေဢွၵ်ႇပၢႆႈၵေႃႈ သမ်ႉမႆႈၸႂ်တႃႇႁႃလဵင်ႉၵၼ်။ ဢမ်ႇၸၢင်ႈပၢႆႈၵႂႃႇတၢင်းလႂ် ”- ဝႃႈ ၼႆ။

4 ၵေႃႉ ၼၢႆးလၢၼ် ဢၼ်ၺႃးၸၢၵ်ႇမၢၵ်ႇသေ လူႉတၢႆၼၼ်ႉ ပဵၼ်ထဝ်ႈယိင်း ဢႃယု 70 ပၢႆ ၵေႃႉၼိုင်ႈ၊ လုၵ်ႈၸၢႆးမၼ်း ၵေႃႉၼိုင်ႈလႄႈ လၢၼ် 2 ၵေႃႉ။ လိူဝ်ၼၼ်ႉ ၶိူင်ႈမိၼ်သိုၵ်းမၢၼ်ႈ ပွႆႇမၢၵ်ႇသႂ်ႇထႅင်ႈ ႁိမ်း ႁွမ်းဝၢၼ်ႈၼႃးလွႆ မီးၵူၼ်းမၢတ်ႇၸဵပ်း 3 ၵေႃႉ၊ ပႃးၽူႈသိုဝ်ႇၶၢဝ်ႇ ၵေႃႉၼိုင်ႈ။ ၽူႈသိုဝ်ႇၶၢဝ်ႇၼၼ်ႉ ပဵၼ်ၽႂ် ၸုမ်းသိုဝ်ႇၶၢဝ်ႇလႂ်တႄႉ ပႆႇမီးၽႂ်ယိုၼ်ယၼ် – သိုဝ်ႇၶၢဝ်ႇသူၺ်ႇၽီႇမျေႇတႄႉ တႅမ်ႈတၢင်ႇဝႆႉၼင်ႇၼႆ။

ၵူၼ်းပိုၼ်ႉတီႈ လၢတ်ႈထႅင်ႈဝႃႈ – “ပေႃးၶဝ်ၶႆႈတိုၵ်းၵေႃႈ လူဝ်ႇၵႂႃႇတိုၵ်းၵၼ်တီႈ ဢၼ်မီးသိုၵ်းၼၼ်ႉၶႃႈၵႂႃႈ။ ယၢမ်းလဵဝ်သမ်ႉ မႃးႁဵတ်းတေႃႇႁိူၼ်းယေးၵူၼ်းမိူင်းတိၵ်းတိၵ်း။ တိူဝ်ႉၺႃးၵူၼ်းမိူင်းတၢႆတိၵ်းတိၵ်း။ ဢမ်ႇတိူဝ်ႉၵူၼ်းသိုၵ်းၶဝ်လူင်။ ၵူၼ်းမိူင်းၵူၺ်း ယဵၼ်းပဵၼ်တူဝ်ယိူဝ်ႇ”- ဝႃႈၼႆ။

တီႈတၢင်းမၢၵ်ႇတူၵ်းၼၼ်ႉ ပဵၼ်တၢင်းပွၵ်ႉၵုင်းၽြႃးလူင်၊ တူင်ႈၸၢင်ႉ၊ ပွၵ်ႉဝဵင်းၸၢၼ်း၊ ပွၵ်ႉမၢၼ်ႈၸၢတ်ႈ၊ ဢူၵ်ႉၵျိၼ်း ၸိူဝ်းၼႆႉ။

ဝဵင်းသီႇပေႃႉၼႆႉ ၸုမ်းႁူမ်ႈႁွမ်း သိုၵ်းတဢၢင်း ၶဝ်ႈလေႃႇတိုၵ်း တပ်ႉသိုၵ်းမၢၼ်ႈ ၸဵမ်မိူဝ်ႈဝၼ်းတီႈ 10 လိူၼ်ဢေႃႊၵတ်ႊသ် သဵင်ၵွင်ႈယဵၼ်ၵႂႃႇ ဝၢႆးၼၼ်ႉ ထိုင်မႃးၼႂ်းလိူၼ်သႅပ်ႊထႅမ်ႊပိူဝ်ႊ ဝၼ်းတီႈ 14 ၼႆႉ သွင်ၾၢႆႇယိုဝ်းတိုၵ်းၵၼ် ၶိုၼ်း ႁၢဝ်ႈႁႅင်း၊ ၵူၼ်းမိူင်းၺႃးၸၢၵ်ႇမၢၵ်ႇလူႉတၢႆ ၵႄႈပၢင်တိုၵ်း မီး 20 ပၢႆ မၢတ်ႇၸဵပ်းၸွမ်းထႅင်ႈ 50 ပၢႆ။

တီႈဝဵင်းသီႇပေႃႉၼႆႉ မီးဝႆႉ တပ်ႉသိုၵ်းမၢၼ်ႈ ၶလယ 23 ၊ ၶမယ 503 – 504 သေ သွင်ၾၢႆႇတိုၵ်ႉၶဵင်ႈၶႅင် ၵၢၼ်သိုၵ်း တေႃႇၵၼ်ဝႆႉႁၢဝ်ႈႁႅင်း ၵူၼ်းပိုၼ်ႉတီႈ လႆႈငိူင်ႉပၢႆႈၽေးသိုၵ်း ယူႇဝႆႉ ၸွမ်းၼႂ်းထိူၼ်ႇ/ ၼႂ်းၶိူဝ်း/ ၼႂ်းထမ်ႈလႄႈ တီႈ ႁိူၼ်းယေးပီႈၼွင်ႉၸမ်ၸႂ်ၵၼ် တၢင်ႇတီႈတၢင်ႇဝဵင်း ၼႆယဝ်ႉ။

တႅမ်ႈ – ယိင်းသဵဝ်ႈၶၢဝ် (ၽူႈသိုပ်ႇၶၢဝ်ႇၾိုၵ်းၵၢၼ်)