သဵၼ်ႈတႃႈသၢႆတၢင်းၵွႆ လႅင်းၾူၼ်းၶၢတ်ႇ ႁဵတ်းႁႂ်ႈၵူၼ်းမိူင်းတူၼ် ထူပ်းတၢင်းယၢပ်ႇၽိုတ်ႇႁႅင်း လွင်ႈၵႂႃႇမႃးလႄႈ လွင်ႈၵပ်းသိုပ်ႇတိတ်းတေႃႇၵၼ် ၸိူဝ်းၼႆႉ။

တႄႇဢဝ် ၵၢင်လိူၼ်သႅပ်ႊထႅမ်ႊပိူဝ်ႊၼၼ်ႉမႃး ႁဵတ်းႁႂ်ႈၼမ်ႉႁူၺ်ႈလွႆ လႆထူမ်ႈၽတ်ႉထွင်း ဢဝ်သဵၼ်ႈ တႃႈသၢႆတၢင်းလူႉၵွႆ/ ၶူဝ်ၶၢတ်ႇၵူၼ်ႇပင်း ၼႂ်းၵႄႈတႃႈၶီႈလဵၵ်း – မိူင်းသၢတ်ႇ၊ မိူင်းသၢတ်ႇ – မိူင်းတူၼ်၊ မိူင်းပၼ်ႇ – မိူင်းတူၼ် ၸိူဝ်းၼႆႉသေ ႁဵတ်းႁႂ်ႈၵူၼ်းမိူင်းယၢပ်ႇၽိုတ်ႇ ဢမ်ႇၸၢင်ႈၵႂႃႇမႃး ႁႃၵိၼ်လဵင်ႉတွင်ႉ ၼႆယဝ်ႉ။

ၵူၼ်းမိူင်းတူၼ် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၶဝ်ႈသၢၼ်၊ ၼမ်ႉမၼ်းၵိၼ်၊ ၼမ်ႉမၼ်းၸၢၵ်ႈ ၸိူဝ်းၼႆႉ ၶၢတ်ႇပႅတ်ႈမူတ်းယဝ်ႉ။ ၸဝ်ႈႁၢၼ်ႉယႂ်ႇ ၸဝ်ႈႁၢၼ်ႉလူင်ၶဝ်ၵေႃႈ ဢမ်ႇၶႂ်ႈၶၢႆပၼ်ၵူၼ်းမိူင်း ၽၵ်းၵႃ၊ ၶဝ်ၶႂ်ႈၶၢႆပၼ် ၵူၼ်း ဢၼ်ၶဝ်ၶႂ်ႈၶၢႆပၼ်ၼၼ်ႉၵူၺ်း။ ဢၼ်ႁၢႆႉႁႅင်းၵေႃႈ ပဵၼ်ၸဝ်ႈၼမ်ႉမၼ်း ၸၢၵ်ႈၼၼ်ႉယဝ်ႉ မီးယူႇၵေႃႈ လၢတ်ႈဝႃႈဢမ်ႇမီးၼႆသေ ဢမ်ႇၶၢႆပၼ်ၶႃႈ”- ဝႃႈၼႆ။

ၽွင်းသိုၵ်းမၢၼ်ႈ ယိုတ်းမိူင်းၼႆႉ ၶၼ်ၼမ်ႉမၼ်းၸၢၵ်ႈ တီႈမိူင်းတူၼ်ၼႆႉ ၼိုင်ႈလိတ်ႉလႂ် 4,000 ပျႃး၊ ဝၢႆးၼမ်ႉၼွင်းလုပ်ႇထူမ်ႈ သဵၼ်ႈတၢင်းၶၢတ်ႇၼႆႉ ယိင်ႈၶႅၼ်းႁဵတ်းႁႂ်ႈ ၶၼ်ၼမ်ႉမၼ်းပုင်ႈၶိုၼ်ႈႁႅင်း ၼိုင်ႈလိတ်ႉလႂ် 2 မိုၼ်ႇပျႃး ၼႆယဝ်ႉ။

ၼႂ်းၶၢဝ်းတၢင်း သၢႆသဵၼ်ႈတၢင်းၶၢတ်ႇ ၵုၼ်ႇၵႃႉတၢင်းၶၢႆဢမ်ႇထိုင်လႆႈ ၼႂ်းမိူင်းတူၼ်ၼႆႉသမ်ႉ မီးၵူၼ်း ဢဝ်တိုဝ်ႉတၢင်းလီသေ ၶိုၼ်ႈၵႃႈၶိုၼ်ႈၶၼ်သေၶၢႆ။ မၢင်ၸိူဝ်းၵေႃႈ တင်ႈၸႂ်လႄႇႁႃသိုဝ်ႉၵုၼ်ႇ ၶွၼ်ႈတုမ်ဝႆႉ ႁင်းၵူၺ်းသေ ၶၢႆတေႃႇ ၶိုၼ်း ၵႃႈယႂ်ႇၶၼ်သုင် ပဵၼ်လၢႆပုၼ်ႈ ၸိူဝ်းၼႆႉ။

တႄႇဢဝ် ဝၼ်းတီႈ 10/09/2024 ၼၼ်ႉမႃး ၼမ်ႉၼွင်းယႂ်ႇ လုပ်ႇထူမ်ႈ ဢွင်ႈတီႈၵူၼ်းမိူင်း ဢၼ်ၸမ် ၵႄးၼမ်ႉတူၼ်လႄႈ တီႈၶူင်ႈယၢၼ်း ၸိူဝ်းၼၼ်ႉ ႁဵတ်းႁႂ်ႈႁၢၼ်ႉၶၢႆၶူဝ်းၵုၼ်ႇ တင်းၼမ် လႆႈပိၵ်ႉဢိုတ်း ထိုင်ယၢမ်းလဵဝ် ႁဵတ်းႁႂ်ႈသဵၼ်ႈတႃႈသၢႆတၢင်းၶၢတ်ႇ ၶူဝ်ၵွႆ ရူတ်ႉၵႃးၵူႈသႅၼ်း ဢမ်ႇၸၢင်ႈၵႂႃႇမႃး ႁိုင် 2 ဝူင်ႈယဝ်ႉ ဝႃႈၼႆ။

“သဵၼ်ႈတၢင်းၸိူဝ်းၼႆႉ တီႈတႄႉမၼ်းလူဝ်ႇလႆႈမႄးၵုမ်းၶိုၼ်းဝႆးဝႆး ၵူၺ်းၵႃႈ ၽူႈမီးပုၼ်ႈၽွၼ်း ဢၼ်ပဵၼ်ၸႂ်သိုၵ်းမၢၼ်ႈၶဝ် ၸိူဝ်းၼၼ်ႉ ဢမ်ႇႁိပ်ႈႁဵတ်းသင်ပၼ်။ ၵမ်ႈၼမ်တႄႉ ထတ်းသၢင်ဝႃႈ သိုၵ်းမၢၼ်ႈ ဢၼ်ယူႇပွတ်းမိူင်းတူၼ် ၼႆႉ ဢမ်ႇၶႂ်ႈၵႂႃႇၶဝ်ႈၼႃႈသိုၵ်း တၢင်းပွတ်းႁွင်ႇ – ပွတ်းၸၢၼ်းလႄႈ ၶဝ်တင်ႈၸႂ်ယိုတ်ႈၶၢဝ်းယၢမ်းဝႆႉၼႆဢေႃႈ” – ၵူၼ်းပိုၼ်ႉတီႈ မိူင်းတူၼ် သိုပ်ႇလၢတ်ႈၼႄၼင်ႇၼႆ။

လိူဝ်သေ သဵၼ်ႈတၢင်းၶၢတ်ႇယဝ်ႉ လႅင်းၾူၼ်း ၸိူဝ်းၼႆႉၵေႃႈ ၶၢတ်ႇပႅတ်ႈမူတ်း မီးဝႆႉလၵ်း ၾူၼ်းလၢႆလၢႆၵူၺ်း မိူၼ်ၼင်ႇ – Telenor ၊ Ooredoo ၊ Mytel ၊ MPT ၸိူဝ်းၼႆႉသေတႃႉ ယၢမ်းလဵဝ် ဢမ်ႇပၼ်ႇ ၵၢၼ်သေဢၼ်လႄႈ ၵူၼ်းမိူင်း ၵိၼ်းၸႂ် ၶၢတ်ႇလွင်ႈၵပ်းသိုပ်ႇတိတ်းတေႃႇ ၾၢႆႇၼွၵ်ႈဢမ်ႇလႆႈ။

သင်မီး ၵၢၼ်လမ်ႇလွင်ႈၸိုင် ၵမ်ႈၼမ် ပေႃးလႆႈၵႂႃႇႁႃၸႂ်ႉ လႅင်းၾူၼ်း ၸွမ်းလႅၼ်လိၼ်တႆး – ထႆး ဢၼ်ယၢၼ်ၵႆတၢင်းဝဵင်းမိူင်းတူၼ် မွၵ်ႈ 50 လၵ်း။ ၼမ်ႉမၼ်းၸၢၵ်ႈသမ်ႉ ၶၢတ်ႇလႄႈ တႃႇတေၵႂႃႇ ႁႃသိုပ်ႇၾူၼ်း ၸိူင်ႉၼၼ်ၵေႃႈ ဢမ်ႇ ၸႂ်ႈလွင်ႈငၢႆႈ – ၵူၼ်းပိုၼ်ႉတီႈလၢတ်ႈ။

ၼႂ်းၵႄႈ ၵူၼ်းမိူင်းတူၼ် ထူပ်းတၢင်းယၢပ်ႇၽိုတ်ႇၵိၼ်းၸႂ်ယူႇၼႆႉ သိုၵ်းမၢၼ်ႈသမ်ႉ ဢဝ်တိုဝ်ႉတၢင်း လီသေဝႃႈ ၵူၼ်း ၸၢႆးသႅၼ်း ဢႃယု 35 ထိုင် 65 ၽႂ်သေဢမ်ႇဝႃႈ သင်ၶဝ်ႈၾိုၵ်း ၵၢၼ်သိုၵ်း တေၵမ်ႉၸွႆႈၼမ်ႉမၼ်းၸၢၵ်ႈ ၼိုင်ႈၵေႃႉ လႂ် 2 လိတ်ႉၼႆသေ ႁူၺ်းတႄႇပၢင်ၾိုၵ်းၵၢၼ်သိုၵ်း ၼႆယဝ်ႉ။