မိူဝ်ႈၼႆႉ 24/09/2024 ယၢမ်းၵၢင်ၼႂ်ၸဝ်ႉ မိူင်းပႆႇလႅင်း သိုၵ်းမၢၼ်ႈ ဢဝ်ၶိူင်ႈမိၼ် မႃးပွႆႇမၢၵ်ႇ တီႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ တိူဝ်ႉၵူၼ်းမိူင်းတၢႆထင်တီႈ ၵေႃႉၼိုင်ႈ ပဵၼ်ၼၢင်းယိင်း၊ ၵူၼ်းမၢတ်ႇတဵပ်း တင်းၼမ်။

ၽွင်းၵူၼ်းမိူင်းလပ်းယဵၼ် သိုၵ်းမၢၼ်ႈ မႃးပွႆႇမၢၵ်ႇ 2 လုၵ်ႈ ယၢမ်းၵၢင်ၼႂ်ၸဝ်ႉ 1:30 မူင်း၊ တူၵ်းတီႈပွၵ်ႉ 2 ၊ တိူဝ်ႉသႂ်ႇႁူင်းႁႅမ်း “ယထၢႆႉ/  ရထိုက်” လႄႈ ႁူင်းႁႅမ်း Golden Sunflower (ၾူႊလီႊလၢႆႉ) မီးၵူၼ်း မၢတ်ႇၸဵပ်း 9 ၵေႃႉ။

မိူၼ်ၼႆၼင်ႇၵဝ်ႇ ၽွင်းၵၢင်ၼႂ် 4:00  မူင်းၼၼ်ႉၵေႃႈ သိုၵ်းမၢၼ်ႈ ဢဝ်ႁိူဝ်းမိၼ်မႃးပွႆႇမၢၵ်ႇထႅင်ႈ တီႈပွၵ်ႉ 2 ။ တိူဝ်ႉတီႈ ႁၢၼ်ႉၶၢႆၶမ်း လၵ်ႊၵီႊ။ တီႈၼၼ်ႉ မီးၵူၼ်းလူႉတၢႆ ၵေႃႉၼိုင်ႈ ပဵၼ်ၼၢင်းယိင်း။ 

ၸုမ်းပရႁိတ FYV ၸွႆႈထႅမ်ၵူၼ်းမၢတ်ႇၸဵပ်းလူႉတၢႆၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ -“မိူဝ်ႈ 1 မူင်းၼႂ်ၸဝ်ႉၼၼ်ႉ သိုၵ်းမၢၼ်ႈ ဢဝ်ႁိူဝ်းမိၼ်မႃးပွႆႇမၢၵ်ႇ ၵူၼ်းမၢတ်ႇၸဵပ်းမီး 9 ၵေႃႉ၊ ၵၢင်ၼႂ် 4 မူင်း မႃးပွႆႇထႅင်ႈ တင်းပွၵ်ႉသွင် ၼၢင်းယိင်းတၢႆ ၵေႃႉၼိုင်ႈ မၢတ်ႇၸဵပ်းတင်းၼမ်၊ ၵူၼ်းပိုၼ်ႉတီႈ ဢၼ်ပၢႆႈၽေးသိုၵ်း ၸိူဝ်းၼၼ်ႉ ပွၵ်ႈမႃးယူႇၶိုၼ်းၽွင်ႈယဝ်ႉလႄႈ ပဵၼ်ဢၼ်မႆႈၸႂ်ဝႆႉ”- ဝႃႈၼႆ။

သိုၵ်းၵဝ်ႈၵၢင်ႉ ႁႅၼ်းသိုၵ်း ပိုတ်းယိုဝ်း သိုၵ်းမၢၼ်ႈႁၢဝ်ႈႁႅင်းသေ ပိုၼ်ၽၢဝ်ႇ ယိုတ်းလႆႈဝဵင်းလႃႈသဵဝ်ႈ ၼႂ်းလိူၼ်ဢေႃႊ ၵတ်ႊသ် ဝၼ်းတီႈ 3 ။ ၵူၼ်းမိူင်းဝဵင်းလႃႈသဵဝ်ႈ မွၵ်ႈ 90 ပိူဝ်ႊသႅၼ်ႊ ပၢႆႈၽေးသိုၵ်းဝႆႉ ပႆႇၸၢင်ႈ ပွၵ်ႈၶိုၼ်းႁိူၼ်းယေး တေႃႇထိုင်ဝၼ်းမိူဝ်ႈၼႆႉ။

ဝၢႆးသေ သိုၵ်းၵဝ်ႈၵၢင်ႉ ပိုၼ်ၽၢဝ်ႇယိုတ်း လုမ်းတိူင်းသိုၵ်းယဝ်ႉၼၼ်ႉ သိုၵ်းမၢၼ်ႈ မႃးပွႆႇမၢၵ်ႇႁဵတ်းႁႂ်ႈလူႉ သုမ်းယႂ်ႇလူင်ၼႆႉ 5 ၵမ်း ပႃးၼႆႉယဝ်ႉ။ ႁဵတ်းႁႂ်ႈႁိူၼ်းယေး ၵူၼ်းပိုၼ်ႉတီႈ လူႉၵွႆတင်းၼမ်။ ၵူၼ်းမိူင်းၸိူဝ်း ငိူင်ႉပၢႆႈၽေးသိုၵ်းသေ ပွၵ်ႈၸႂ်းၶိုၼ်းႁိူၼ်းယေးၵေႃႈ မၢတ်ႇၸဵပ်းလူႉတၢႆ။ 

သိုၵ်းမၢၼ်ႈၼႆႉ ၵမ်ႈၼမ် မႃးပွႆႇမၢၵ်ႇယၢမ်းၵၢင်ၶမ်ႈၵၢင်ၶိုၼ်းလႄႈ လိူၵ်ႈပွႆႇသႂ်ႇ ႁွင်ႈၵၢၼ်ၽွင်းငမ်းၶဝ်၊ ႁိူၼ်းယေးၵူၼ်းမိူင်း ၸိူဝ်းၼႆႉ။ ပဵၼ်ဢၼ်ပူၼ်ႉပႅၼ် မၢႆမီႈၶေႃႈတူၵ်းလူင်း Geneva Convention ႁၢႆႉႁႅင်း။

တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)