တင်ႈတႄႇ ဝၼ်းတီႈ 20/09/2024 တေႃႇထိုင်ဝၼ်းမိူဝ်ႈၼႆႉ 24/09/2024 ၾူၼ်တူၵ်းထပ်းၵၼ် ဢမ်ႇထၢတ်ႇ မိူင်းၸိုင်ႈထႆး တွၼ်ႈၼိူဝ်။ ႁဵတ်းႁႂ်ႈၼမ်ႉထူမ်ႈ တီႈၵဵင်းႁၢႆး ႁွပ်ႈ 2 လႄႈ ထူမ်ႈတီႈဝဵင်းၵဵင်းမႂ်ႇ ႁၢဝ်ႈႁႅင်း။

ၼမ်ႉႁူၺ်ႈၼမ်ႉလွႆ ၼွင်းလႆႁၢဝ်ႈႁႅင်း တွင်ႈဢဝ်ႁိူၼ်းယေး ၵူၼ်းမိူင်းၼႂ်းဝဵင်းပႃႇပဝ်ႉ ၵဵင်းႁၢႆး၊ ၸၼ်ႉၸွမ် မိူင်းၽယဝ်း၊ ၸႄႈဝဵင်းမႄႈရိမ်း၊ ဝဵင်းမႄႈရႅမ်းၵေႃႈ ၼမ်ႉလွႆလႆၼွင်းထူမ်ႈႁိူၼ်းယေး ၵူၼ်းမိူင်းႁၢဝ်ႈႁႅင်း။

ႁွင်ႈၵၢၼ်ၾၢႆႇမိူင်ၼမ်ႉ လူင်ပွင်ၸိုင်ႈထႆး ပိုၼ်ၽၢဝ်ႇဝႃႈ ၵူၼ်းယူႇႁိမ်းသွင်ၾင်ႇၶၢင်ႈ ၼမ်ႉပိင်း ႁႂ်ႈၾၢင်ႉသေပႂ်ႉတူၺ်း။ ၶူဝ်းၶွင်ဢၼ်လမ်ႇလွင်ႈ ႁႂ်ႈၶၢႆႉၶိုၼ်ႈဝႆႉတီႈသုင်။ ၼမ်ႉသုင် 3.70 ပေႇၼႆႉ ပဵၼ်ၶၵ်ႉတွၼ်ႈမီးၽေး။ ပေႃးတူၺ်းငဝ်းလၢႆး ယၢမ်းလဵဝ်ၸိုင် ၸၢင်ႈလၢမ်းၶၢတ်ႈလႆႈဝႃႈ ၼမ်ႉၸၢင်ႈထူမ်ႈထိုင် 3.90 ပေႇ (ထတ်း) လႄႈ ၵူၼ်းယူႇႁိမ်းၾင်ႇၼမ်ႉ ႁႂ်ႈဢွၼ်ၵၼ်ၾၢင်ႉဝႆႉ ဝႃႈၼႆ။

တေႃႇထိုင် ဝၼ်းတီႈ 24/09/2024 ယၢမ်းၵၢင်ဝၼ်းတဵင်ႈၼႆႉ ၼမ်ႉပိင်း ၼႂ်းၵေး သုင်ၶိုၼ်ႈထိုင် 3.50 ပေႇ ယဝ်ႉလႄႈ ႁူင်းႁဵၼ်း ၸိူဝ်းမီးႁိမ်းၾင်ႇၼမ်ႉပိင်း ၸိူဝ်းၼၼ်ႉ ပိုၼ်ၽၢဝ်ႇႁႂ်ႈပေႃႈမႄႈလုၵ်ႈႁဵၼ်း မႃးႁပ်ႉလုၵ်ႈလၢင်းၸဝ်ႈၵဝ်ႇဝႆးဝႆး – ဝႃႈၼႆယူႇ။

တီႈမိူင်းတႆးတႄႉ ၾူၼ်တူၵ်းႁႅင်းလႄႈ ၼမ်ႉထူမ်ႈ တႄႇဝၼ်းတီႈ 10/09/2024 တေႃႇထိုင် မွၵ်ႈဝၼ်းတီႈ 20/09/2024 ၸင်ႇယွမ်းယဵၼ်ၵႂႃႇၽွင်ႈ။ ဝႃႈၼၼ်သေတႃႉ ၼမ်ႉထူမ်ႈပွၵ်ႈၼႆႉ ၶီႈၵူမ်ႇငႂ်ႈၼမ်ႉ ၶၢင်ႉၶမ်ဝႆႉၼႂ်းႁိူၼ်းၼႂ်းယေး သုင်မွၵ်ႈႁူဝ်ၶဝ်ႇလႄႈ ၵူၼ်းမိူင်း ၸိူဝ်းၺႃးၼမ်ႉထူမ်ႈ တိုၵ်ႉဢွၼ်ၵၼ် လႆႈၽဵဝ်ႈၶီႈၵူမ်ႇယူႇ ယင်းပႆႇယဝ်ႉပႆႇတူဝ်ႈ။