ဝၼ်းတီႈ 21/09/2024 ပူၼ်ႉမႃးၼႆႉ တပ်ႉၸုမ်းၵႅတ်ႇၶႄၵူၼ်းမိူင်းတင်း သိုၵ်းမၢၼ်ႈ ယိုတ်းမိူင်း တႄႇပဵၼ်ပၢင်တိုၵ်း ၵၼ် ၼႂ်း ၸႄႈဝဵင်းမၢတ်ႇတရႃႇ ယၢၼ်ၵႆဝဵင်းလိူဝ်ႇ မွၵ်ႈ 10 လၵ်း ၵူၼ်းမိူင်းပိုၼ်ႉတီႈ ၺႃးၸၢၵ်ႇမၢၵ်ႇ လူႉတၢႆ 6 ၵေႃႉ ပႃးလုၵ်ႈဢွၼ်ႇ ဢႃယု ပႆႇတဵမ်ၶူပ်ႇ ၵေႃႉၼိုင်ႈ ဝႃႈၼႆ။  

ဝၼ်းၼၼ်ႉ သိုၵ်းမၢၼ်ႈတင်း တပ်ႉၸုမ်းၵႅတ်ႇၶႄၵူၼ်းမိူင်း ပဵၼ်ပၢင်တိုၵ်းၵၼ် တီႈဝၢၼ်ႈတူင်ႇသႄႇပေး ၾင်ႇၼမ်ႉၵဵဝ် ၼႂ်းၸႄႈဝဵင်းမၢတ်ႇတရႃႇ ယၢၼ်ၵႆဝဵင်းလိူဝ်ႇ မွၵ်ႈ 10 လၵ်း။ ၽွင်းပၢင်တိုၵ်းၼၼ်ႉ သိုၵ်းမၢၼ်ႈ ဢၼ်ပၵ်းတပ်ႉဝႆႉ တီႈၼႂ်းဝဵင်းလိူဝ်ႇၵေႃႈ ယိုဝ်းၸွႆႈၶိူင်ႈၵွင်ႈယႂ်ႇလၢႆလၢႆၵမ်း၊ မၢၵ်ႇလူင် ဢၼ်သိုၵ်းမၢၼ်ႈ ယိုဝ်းမႃးတူၵ်းသႂ်ႇၼႂ်းဝၢၼ်ႈသေ ၵူၼ်းမိူင်းၺႃးၸၢၵ်ႇမၢၵ်ႇ လူႉတၢႆၸွမ်းၼႆ ၽူႈမီးပုၼ်ႈၽွၼ်း ပၵၽ ၸႄႈတွၼ်ႈပၢင်ႁူႈ တွပ်ႇဝႆႉတီႈသိုဝ်ႇ RFA  ၼင်ႇ ၼႆ။

ယွၼ်ႉပၢင်တိုၵ်းသေ ၵူၼ်းမိူင်းၺႃးၸၢၵ်ႇမၢၵ်ႇလူႉတၢႆ 6 ၵေႃႉယဝ်ႉ၊ ပဵၼ်လုၵ်ႈဢွၼ်ႇ ဢႃယု ပႆႇတဵပ်ၶူပ်ႇ ၵေႃႉၼိုင်ႈ၊ လုၵ်ႈဢွၼ်ႇ ဢႃယု 5 ၶူပ်ႇ ၵေႃႉၼိုင်ႈ ၊ ဢႃယု 8 ၶူပ်ႇၵေႃႉၼိုင်ႈ၊ မႄႈလုၵ်ႈဢွၼ်ႇ ၵေႃႉၼိုင်ႈလႄႈ ၼၢႆးလၢၼ် 2 ၵေႃႉ ၼႆ ၵူၼ်းပိုၼ်ႉတီႈလၢတ်ႈ။

ယၢမ်းလဵဝ် သိုၵ်းမၢၼ်ႈ ၶဝ်ႈပၵ်းတပ်ႉၼႂ်းဝၢၼ်ႈတူင်းသႄႇပေးသေ ႁိူၼ်းယေးၵူၼ်းမိူင်းၵေႃႈ ၺႃးၽဝ်ဝႆႉ လၢႆလၢႆလင် ၵူၼ်းပိုၼ်ႉတီႈ လႆႈငိူင်ႉပၢႆႈဢွၵ်ႇဝၢၼ်ႈဝႆႉ။

ဝၢႆးလင် တပ်ႉၸုမ်းၵႅတ်ႇၶႄၵူၼ်းမိူင်း လေႃႇတိုၵ်းယိုတ်းလႆႈ ဝဵင်းမိူင်းၵုတ်ႈ၊ တႃႈၵွင်ႈ၊ ဝဵင်းၽိတ်ႉၶျၢင်း (သပိတ်ကျင်း) လႄႈ ၸၢင်ႉၵိုဝ် (စဉ့်ကူး) ၸိူဝ်းၼႆႉယဝ်ႉ ၾၢႆႇသိုၵ်းမၢၼ်ႈ ႁၢင်ႈႁႅၼ်း ပၵ်းတပ်ႉဝႆႉ ႁႂ်ႈၶၢမ်ႇၶိုၵ်ႉ ႁိမ်းႁွမ်းဝဵင်းလိူဝ်ႇ – သိုဝ်ႇၶၢဝ်ႇ RFA ဢွၵ်ႇဝႆႉၼင်ႇၼႆ။