သိုၵ်းမၢၼ်ႈ ယိုတ်းမိူင်း တင်ႈၸႂ် ဢဝ်ပိုၼ်ႉတီႈၵူၼ်းမိူင်းယူႇသဝ်း ႁဵတ်းပဝ်ႉမၢႆၵၢၼ်သိုၵ်းသေ ၸႂ်ႉၶိူင်ႈမိၼ် မႃးပွႆႇမၢၵ်ႇ ၶိူဝ်းယႂ်း ၼႂ်းၸိုင်ႈတႆးပွတ်းႁွင်ႇ တီႈဝဵင်းၼွင်ၶဵဝ်ၵေႃႈ မႃးပွႆႇမၢၵ်ႇသႂ်ႇထႅင်ႈ 3 လုၵ်ႈ ၼႆယဝ်ႉ။

ဝၼ်းတီႈ 22/09/2024 ယၢမ်းၵၢင်ၼႂ်မွၵ်ႈ 1 မူင်းၼႆႉ ၶိူင်ႈမိၼ်သိုၵ်းမၢၼ်ႈ ၵျႅတ်ႊၾၢႆႊတိူဝ်ႊ 2 လမ်း မႃးပွႆႇ မၢၵ်ႇသႂ်ႇ တီႈဝဵင်းၼွင်ၶဵဝ် ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ 3 လုၵ်ႈ ၸၢၵ်ႇမၢတ်ႇတိူဝ်ႉၺႃး ၵူၼ်းမိူင်း မၢတ်ႇၸဵပ်း 3 ၵေႃႉ ၼႂ်းၼၼ်ႉ ပႃးလုၵ်ႈဢွၼ်ႇ ဢႃယုမွၵ်ႈ 10 ၶူပ်ႇ ၵေႃႉၼိုင်ႈ။

ၵူၼ်းပိုၼ်ႉတီႈ ဝဵင်းၼွင်ၶဵဝ် လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ သိုၵ်းမၢၼ်ႈ ၸႂ်ႉၶိူင်ႈမိၼ် မႃးပွႆႇမၢၵ်ႇ တီႈၼႂ်းဝဵင်း တၢင်းၵၢၼ်ႉၵေႃႇၼၼ်ႉၶႃႈ။ ၸၢၵ်ႇမၢၵ်ႇတိူဝ်ႉၺႃး ၵူၼ်းမိူင်းမၢတ်ႇၸဵပ်းၸွမ်းၶႃႈဢေႃႈ”- ဝႃႈၼႆ။

ဢိင်ၼိူဝ် လွင်ႈၼႆႉသေ ယူႇတီႈ ၾၢႆႇသိုၵ်းတဢၢင်း TNLA ၵေႃႈ ပိုၼ်ၽၢဝ်ႇဢွၵ်ႇဝႆႉဝႃႈ – “ၶိူင်ႈမိၼ်သိုၵ်းမၢၼ်ႈ မႃးပွႆႇမၢၵ်ႇသႂ်ႇ ဢၼ်မီးၼမ်ႉၼၵ်း 500 ပွင်ႇ 4 လုၵ်ႈ၊ တႃႇ 3 လုၵ်ႈ တူၵ်းတႅၵ်ႇၼႂ်းပွၵ်ႉတၽၢၼ်းၵူင်း ဝဵင်းၼွင်ၶဵဝ် ၸၢၵ်ႇမၢၵ်ႇတိူဝ်ႉၵူၼ်းမိူင်းမၢတ်ႇၸဵပ်း 3 ၵေႃႉ” – ဝႃႈၼႆ။

ပူၼ်ႉမႃး မိူဝ်ႈဝၼ်းတီႈ 21 ၼၼ်ႉ ၶိူင်ႈမိၼ်သိုၵ်းမၢၼ်ႈ ပွႆႇမၢၵ်ႇသႂ်ႇၼႂ်းဝဵင်းၼွင်ၶဵဝ် မၢၵ်ႇလူင်တူၵ်းတႅၵ်ႇ ၵၢတ်ႇမဵဝ်ႉမႃႉ၊ ပွၵ်ႉၵၢတ်ႇ တိူဝ်ႉၺႃးၵူၼ်းမိူင်း ၵေႃႉၼိုင်ႈ မၢတ်ႇၸဵပ်း ႁိူၼ်းယေးလႄႈ ႁၢၼ်ႉတၢင်းၶၢႆ ၵမ်ႈၽွင်ႈ ၺႃးၸၢၵ်ႇမၢၵ်ႇတိူဝ်ႉသႂ်ႇ လူႉၵွႆ။

ယၢမ်းလဵဝ် ၼႂ်းဝဵင်းၼွင်ၶဵဝ်ၼႆႉ သိုၵ်းတဢၢင်း TNLA ပိုၼ်ၽၢဝ်ႇ ယိုတ်းၵုမ်းဝႆႉ၊ တီႈဝၢၼ်ႈတွင်ၶမ်း ယၢၼ်ၵႆဝဵင်းမွၵ်ႈ 20 လၵ်း တီႈမီးတပ်ႉသိုၵ်းမၢၼ်ႈ ၶိူင်ႈၵွင်ႈယႂ်ႇၼၼ်ႉ တိုၵ်ႉသိုပ်ႇပဵၼ်ပၢင်တိုၵ်းၵၼ် ႁၢဝ်ႈႁႅင်းဝႆႉ ၾၢႆႇသိုၵ်းမၢၼ်ႈ ၸႂ်ႉပႃးၶိူင်ႈမိၼ်သိုၵ်း မႃးယိုဝ်းၸွႆႈႁၢဝ်ႈႁႅင်း ၼႆယဝ်ႉ။

မိူၼ်ၼႆ တီႈဝဵင်းသီႇပေႃႉလႄႈ ဝဵင်းလႃႈသဵဝ်ႈ ၸိူဝ်းၼၼ်ႉၵေႃႈ ယၢမ်းၵၢင်ၶမ်ႈၵၢင်ၶိုၼ်း ၶိူင်ႈမိၼ်သိုၵ်းမၢၼ်ႈ တင်ႈၸႂ် ပွႆႇမၢၵ်ႇတူၵ်းတႅၵ်ႇႁိူၼ်းယေးၵူၼ်းမိူင်း လူႉၵွႆလၢႆလင် ႁဵတ်းႁႂ်ႈၵူၼ်းမိူင်း ဢမ်ႇႁတ်းယူႇသဝ်း ထၢင်ႇႁၢင်ႈလွတ်ႈလႅဝ်း။