ဝၼ်းတီႈ 22/09/2024 ယၢမ်းႁူဝ်ၶမ်ႈ 5 မူင်းၶိုင်ႈ ၵႃး – ရူတ်ႉၶိူင်ႈ ၽႃႇၵၼ် တၢင်းပွၵ်ႉတေႃႇယွတ်ႈ ဝဵင်းမူႇ ၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ ဝၢႆးၽႃႇသႂ်ႇယဝ်ႉ ၸဝ်ႈၵႃး ႁေႃႈပၢႆႈ။
ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်မိူဝ်ႈဝႃး ၶႃႈဢေႃႈ ၵႃးတင်း ရူတ်ႉၶိူင်ႈ ၽႃႇ ၵၼ်။ လုၵ်ႈဢွၼ်ႇတႄႉ တၢႆၵေႃႉၼိုင်ႈဢေႃႈ။ ၸဝ်ႈၵႃးတႄႉ ႁေႃႈပၢႆႈဝႆႉၶႃႈ။ လႅပ်ႈတေႁေႃႈဝႆးႁိုဝ် ဢမ်ႇႁူႉ ”- ဝႃႈၼႆ။
ဢိင်ၼိူဝ် လွင်ႈၼႆႉ လုၵ်ႈဢွၼ်ႇ ဢၼ်သွၼ်ႉရူတ်ႉၶိူင်ႈမႃးၼၼ်ႉ သဵၼ်တၢင်းရူတ်ႉသေ ၼွၼ်းတၢႆဝႆႉ ၼိူဝ်ၵၢင်တၢင်း ၵေႃႉပဵၼ်ပေႃႈလုၵ်ႈဢွၼ်ႇၼၼ်ႉတႄႉ လႆႈတိူဝ်ႉမၢတ်ႇၸဵပ်းသေ ရူတ်ႉၶိူင်ႈတႄႉ ထုၵ်ႇၾႆးမႆႈဝႆႉ ၼိူဝ်ၵၢင်တၢင်းၼၼ်ႉ – လႆႈႁၼ်ၼႂ်းၵွင်ႈထၢႆႇ VDO ၶွင်ၵူၼ်းပိုၼ်ႉတီႈ ဝဵင်းမူႇၸေႊ တၢင်ႇဝႆႉၼင်ႇၼႆ။
ပူၼ်ႉမႃး မိူဝ်ႈဝၼ်းတီႈ 13/07/2024 ယၢမ်းၵၢင်ၼႂ် ၼၼ်ႉၵေႃႈ သွင်မႄႈလုၵ်ႈ ၵူၼ်းၼမ်ႉၶမ်း သွၼ်ႉရူတ်ႉ ၶိူင်ႈမႃးၸွမ်းၵၼ် တေမႃးဢဝ်ဝႂ်ၶိဝ်း တႃႇႁဵတ်းသမၢတ်ႉၵၢတ်ႉၼႆသေ ၺႃးၵႃးၽႃႇသႂ်ႇ တီႈႁိမ်းၽၵ်းတူ လူင် ဝဵင်းမူႇၸေႊ ၵေႃႉပဵၼ်လုၵ်ႈၸၢႆး လႆႈလူႉတၢႆထင်တီႈ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ