မိူဝ်ႈၼႆႉ ဝၼ်းတီႈ 23/09/2024 ယၢမ်းၵၢင်ၼႂ် သိုၵ်းမၢၼ်ႈ ယိုတ်းမိူင်း ႁူမ်ႈတင်း ပလိၵ်ႈမၢၼ်ႈသေ ၵူတ်ႇထတ်းတီႉၺွပ်း ၸုမ်းၵျႃးၽႅၼ်ႉ တႄႇဢဝ် တၢင်းလွႆသူးတွင်း၊ မၢၼ်ႈတိုင်းလူင်၊ ပၢင်ႇၶမ်း၊ ၼွင်ယၢင်း၊ ပွၵ်ႉၸွၼ်ႊၸူဝ်ႇ၊ ၶူးဝဵင်းလႄႈ ဢိၵ်ႇထႅင်ႈလၢႆပိုၼ်ႉတီႈ ၼႂ်းဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ ၸိူဝ်းၼႆႉမႃး ႁၢဝ်ႈႁႅင်း။

ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ မိူဝ်ႈၼႆႉၵၢင်ၼႂ် ၵႃးသိုၵ်းမၢၼ်ႈ လမ်းၼိုင်ႈ၊ ၵႃးယေး လမ်းၼိုင်ႈ လူင်းၵႂႃႇတၢင်းလွႆသူးတွင်းၼၼ်ႉသေ တႄႇၵူတ်ႇထတ်းၸုမ်းၵျႃးၽႅၼ်ႉ ၶိုၼ်ႈမႃးတၢင်းဝဵင်းမူႇၸေႊ ၼႆႉ။ တီႈၶူဝ်ပၢင်ႇၶမ်းၼၼ်ႉ ၶဝ်ပိၵ်ႉဢိုတ်းတၢင်းသေ ၵူတ်ႇ ထတ်းႁၢဝ်ႈႁႅင်းၶႃႈဢေႃႈ။ ၸုမ်းၵျႃးၽႅၼ်ႉ ဢၼ်ၶဝ်တီႉလႆႈၼၼ်ႉ တင်းၼမ်ၶႃႈယဝ်ႉ”- ဝႃႈၼႆ။

သိုပ်ႇလၢတ်ႈဝႃႈ – “လႆႈငိၼ်းဝႃႈ တၢင်းၾင်ႇမိူင်းၶႄႇ ယွၼ်းမႃး ႁႂ်ႈတီႉပၼ် 300 ၵေႃႉၼႆၶႃႈဝႃႇ။ ယၢမ်းလဵဝ် ၸုမ်း ၵျႃးၽႅၼ်ႉဢၼ်ၶဝ် တီႉမႃးၼၼ်ႉ ဢဝ်မႃးဝႆႉ တီႈမင်ႇၵလႃႇမူႇၸေႊ (9 ၸၼ်ႉ) ၼႆႉၶႃႈဢေႃႈ”- ဝႃႈၼႆ။

ဢိင်ၼိူဝ် လွင်ႈသိုၵ်းမၢၼ်ႈတင်း ပလိၵ်ႈမၢၼ်ႈ ႁူမ်ႈၵၼ် တီႉၺွပ်း ၸုမ်းၵျႃးၽႅၼ်ႉၼႆႉသေ ယူႇတီႈ ပျီႇတူႉၸိတ်ႉ ၸိူဝ်းဢဝ်ႁူမ်ႇလူမ်ႈပၼ် ၸုမ်းၵျႃးၽႅၼ်ႉၼၼ်ႉ ယိုဝ်းၵွင်ႈလူင် 3 လုၵ်ႈ။ ယဝ်ႉၵေႃႈ ယိုဝ်းၵွင်ႈဢွၼ်ႇထႅင်ႈ တင်းၼမ် တီႈ ႁိမ်းမင်ႇၵလႃႇ မူႇၸေႊၼႆႉ – ၵူၼ်းပိုၼ်ႉတီႈလၢတ်ႈ။

ဝဵင်းမူႇၸေႊၼႆႉ ပဵၼ်ဝဵင်းလႅၼ်လိၼ် တိတ်းၸပ်းၶႄႇဝဵင်းၼိုင်ႈ ပဵၼ်ဝဵင်းၵႃႉၶၢႆ ၵူၼ်းၵိုၼ်းၶွၼ်ႈၵေႃႈၸႂ်ႈ၊ ၸုမ်းယိပ်း ၵွင်ႈၵၢင်ႇ၊ ပျီႇတူႉၸိတ်ႉ ၸိူဝ်းၼႆႉၵေႃႈၼမ်ႁႅင်း။ ၸူဝ်ႈသိုၵ်းမၢၼ်ႈ ယိုတ်းမိူင်း မႃးၼႆႉ ယိင်ႈၶႅၼ်းႁဵတ်းႁႂ်ႈၽူႈလၵ်ႉ ၸၵ်ႉၶုတ်ႈ လိူင်ႇၼမ်ႁႅင်း ႁဵတ်းႁႂ်ႈၵူၼ်းမိူင်း ဢမ်ႇမီးလွင်ႈႁူမ်ႇလူမ်ႈဢုၼ်ႇၸႂ်။ ၵူၼ်းမိူင်းၺႃးၸူၼ်၊ ၺႃးယိုဝ်းတၢႆလႄႈ ၺႃးတီႉၺွပ်း ဢဝ်ၵႂႃႇပဵၼ်တူဝ်ယိူဝ်ႇ ၸိူဝ်းၼႆႉၵေႃႈ မီးမႃးၼမ်။ ယဝ်ႉၵေႃႈ ၸုမ်းၵျႃးၽႅၼ်ႉ (ယွၵ်ႇလႅၼ်ၵိၼ်ငိုၼ်းတၢင်းဢွၼ်ႊလၢႆႊ) ၸိူဝ်းၼႆႉၵေႃႈၼမ်။

လိူဝ်ၼၼ်ႉ တီႈဝဵင်းၼမ်ႉၶမ်းၵေႃႈ ယၢမ်းလဵဝ် ၵူၼ်းပႅၵ်ႈၼႃႈ မႃးယူႇသဝ်းၼမ်၊ ႁၢၼ်ႉ KTV ၸိူဝ်းၼႆႉၵေႃႈ ပိုတ်ႇၼမ်မႃး ၸွမ်းၼႂ်းပွၵ်ႉၼႂ်းယွမ်ႇ ဢမ်ႇယွမ်း 5 တီႈ။ မိူၼ်ၼင်ႇ ၼႂ်းပွၵ်ႉၵွင်းသႃႇ၊ ပွၵ်ႉဢွင်ႇၶျၢမ်းသႃႇ၊ ပွၵ်ႉတႂ်ႈ၊ ပွၵ်ႉဢွင်ႇမဵတ်ႉတႃႇ ၸိူဝ်းၼႆႉ။

ၵူၼ်းပိုၼ်ႉတီႈ ဝဵင်းၼမ်ႉၶမ်း လၢတ်ႈၽူႈတွႆႇႁွၵ်ႈဝႃႈ – “ၸူဝ်ႈသိုၵ်းလွႆၶဝ် ၵုမ်းလႆႈဝဵင်းၼမ်ႉၶမ်းမႃးၼႆႉ ႁၢၼ်ႉ KTV ၼႆႉ ယိုင်ႈၶႅၼ်းပိုတ်ႇၼမ်မႃး ပိုတ်ႇတင်းဝၼ်းတင်းၶိုၼ်းၶႃႈယဝ်ႉ။ ပေႃးၼပ်ႉသွၼ်ႇတူၺ်းတႄႉ ဢမ်ႇယွမ်း 5 တီႈ။ ယႃႈမဝ်းၵမ် ၸိူဝ်းၼႆႉၵေႃႈ လိူင်ႇၼမ်ၶႃႈယဝ်ႉ။ ၵူၼ်းပႅၵ်ႇၼႃႈ ၸၢဝ်းၶႄႇ ၸိူဝ်း ၼႆႉၵေႃႈ မႃးယူႇၼမ်။ လႆႈငိၼ်းဝႃႈ မီးၶွမ်ႊပၼီႊ မႃးႁၢင်ႈႁႅၼ်းဝႆႉ တႃႇတင်ႈၸုမ်းၵျႃးၽႅၼ်ႉၼႆၶႃႈဢေႃႈ”- ဝႃႈၼႆ။

ဝဵင်းၼမ်ႉၶမ်းၼႆႉ ပဵၼ်ဝဵင်းတိတ်းၸပ်းလႅၼ်လိၼ်ၶႄႇ ဝဵင်းၼိုင်ႈၵေႃႈၸႂ်ႈ။ ယဝ်ႉၵေႃႈ ပဵၼ်ဝဵင်းဢၼ်ၶဝ်ႈ ပႃးၼႂ်း ၽႅၼ်ယၼ်ႇသိုၵ်း 1027 မႃးဝဵင်းၼိုင်ႈ။ ထိုင်မႃးဝၼ်းတီႈ 19/12/2023 ၼၼ်ႉ သိုၵ်းတဢၢင်း TNLA ယိုတ်းၵုမ်းလႆႈဝဵင်းသေ တႄႇဢဝ်ႁူဝ်ပီ 2024 ၼၼ်ႉမႃး တႄႇပၼ်ႇၵၢၼ်ပူၵ်းပွင် ၼႂ်းပိုၼ်ႉတီႈမႃး ႁၢၼ်ႉတေႃႇထိုင်ယၢမ်းလဵဝ်ယဝ်ႉ။