သိုၵ်းမၢၼ်ႈ ၸႂ်ႉၶိူင်ႈမိၼ် မႃးပွႆႇမၢၵ်ႇထႅင်ႈ တီႈဝဵင်းလႃႈသဵဝ်ႈ

သိုၵ်းမၢၼ်ႈ ၸႂ်ႉၶိူင်ႈမိၼ် မႃးပွႆႇမၢၵ်ႇထႅင်ႈ တီႈဝဵင်းလႃႈသဵဝ်ႈ 2 လုၵ်ႈ ၸၢၵ်ႇမၢၵ်ႇ တိူဝ်ႉၺႃးႁၢၼ်ႉၶၢႆၶူဝ်းၵုၼ်ႇလႄႈ ႁိူၼ်းယေးလူႉၵွႆ ၵမ်ႈၽွင်ႈ။

ဝၼ်းတီႈ 21/09/2024 ယၢမ်းၵၢင်ၶမ်ႈ မွၵ်ႈ 10:14 မူင်း သိုၵ်းမၢၼ်ႈ ယိုတ်းမိူင်း ၸႂ်ႉၶိူင်ႈမိၼ်တိုၵ်း မႃးပွႆႇမၢၵ်ႇတီႈပွၵ်ႉ 1 လႄႈ ပွၵ်ႉ 12 ၼႂ်းဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ 2 လုၵ်ႈ ၼႆယဝ်ႉ။

ၵူၼ်းပိုၼ်ႉတီႈ ဝဵင်းလႃႈသဵဝ်ႈ ၽူႈယိင်း ဢႃယု 40 ပၢႆ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မၢၵ်ႇၼႆႉ မႃးတူၵ်း 2 တီႈ။ တီႈၼိုင်ႈၼႆႉ မႃးတူၵ်းပွၵ်ႉ 1 ၾၢႆႇၼႃႈႁူင်းလိုဝ်ႈသဝ်း (မူဝ်းတေႇ) လႄႈ ႁိမ်းႁၢၼ်ႉၶၢႆၶဝ်ႈ ၽၵ်း၊ ယဝ်ႉၵေႃႈ ၸၢၵ်ႇမၢၵ်ႇ တိူဝ်ႉၺႃး ႁၢၼ်ႉၶၢႆတၢင်းၵိၼ်လူႉၵွႆထႅင်ႈ၊ ငိၼ်းဝႃႈ တိူဝ်ႉၺႃး ၽူႈလၵ်ႉဢၢင်ႈ တေၶဝ်ႈလၵ်ႉတီႈႁၢၼ်ႉတၢင်းၵိၼ်ယွႆႈ ပဵၼ်ၽူႈၸၢႆး 2 ၵေႃႉ ၼၼ်ႉတႄႉ မၢတ်ႇၸဵပ်းသေ လႆႈသူင်ႇႁူင်း ယႃယဝ်ႉ”- ဝႃႈၼႆ။

သိုပ်ႇလၢတ်ႈဝႃႈ – “ထႅင်ႈလုၵ်ႈၼိုင်ႈသမ်ႉ ၵႂႃႇတူၵ်းတီႈ ပွၵ်ႈ 12 ၼၼ်ႉတႄႉ တိူဝ်ႉၺႃးႁၢၼ်ႉၶၢႆ ၶိူင်ႈၶူဝ်း ႁိူၼ်းလႄႈ ႁၢၼ်ႉၶၢႆၸိူဝ်ႉၽၼ်းၶဝ်ႈၵၢပ်ႇ/ မေႇဢေႃးၸႃႇ ၸိူဝ်းၼႆႉ လူႉၵွႆ။ ယဝ်ႉၵေႃႈ တိူဝ်ႉၺႃးထႅင်ႈ ႁိူၼ်းယေး ႁိမ်းႁွမ်းၼၼ်ႉ လူႉၵွႆ 2 လင်။ လွင်ႈတိူဝ်ႉၺႃး ၵူၼ်းမၢတ်ႇၸဵပ်းလူႉတၢႆတႄႉ ဢမ်ႇမီး”- ဝႃႈၼႆ။

ဢိင်ၼိူဝ် လွင်ႈသိုၵ်းမၢၼ်ႈ ၸႂ်ႉၶိူင်ႈမိၼ်တိုၵ်း မႃးပွႆႇမၢၵ်ႇ တီႈဝဵင်းလႃႈသဵဝ်ႈ ၸိူင်ႉၼႆၼႆႉ ဢမ်ႇယွမ်း 4 ပွၵ်ႈယဝ်ႉ တႄႇဢဝ် ဝၼ်းတီႈ 30/08/2024 ၼၼ်ႉမႃး ႁၢၼ်ႉတေႃႇထိုင်ယၢမ်းလဵဝ်။  

မိူဝ်ႈၼႆႉ ဝၼ်းတီႈ 22/09/2024 ယၢမ်းၵၢင်ဝၼ်း 12 မူင်း သိုၵ်းမၢၼ်ႈ လုၵ်ႉတၢင်း ဢိူင်ႇႁူဝ်ယ ဝဵင်းမိူင်းယႆ ၼၼ်ႉသေ ယိုဝ်းၵွင်ႈလူင် မႃးတၢင်းဝၢၼ်ႈၼမ်ႉပွင်ႈ ၼႂ်းၸႄႈဝဵင်းလႃႈသဵဝ်ႈၼႆႉ ဢမ်ႇယွမ်း 7 လုၵ်ႈ ဝႃႈ ၼႆ။

“ၶဝ်လုၵ်ႉတၢင်းမိူင်းယႆသေ ယိုဝ်းမႃးၶႃႈဢေႃႈ မၢၵ်ႇၶဝ်ၼၼ်ႉ မႃးတူၵ်းတီႈတၢင်းဝၢၼ်ႈၼမ်ႉပွင်ႈၼႆႉ 7 လုၵ်ႈ ၸၢၵ်ႇမၢၵ်ႇတိူဝ်ႉၺႃး ၵူၼ်းမိူင်းမၢတ်ႇၸဵပ်း ၸၢႆး 1 ၵေႃႉလႄႈယိင်း 1 ၵေႃႉ။ ၼၼ်ႉတႄႉ ႁဝ်းၶႃႈ ပႆႇ လႆႈႁူႉ ႁူဝ်ယွႆႈမၼ်း တႅတ်ႈတေႃးလီၶႃႈ”- ၵူၼ်းပိုၼ်ႉတီႈ ဝဵင်းလႃႈသဵဝ်ႈ သိုပ်ႇလၢတ်ႈၼႄၼင်ႇၼႆထႅင်ႈ။

ၵဵဝ်ႇလူၺ်ႈ မၢၵ်ႇလူင် သိုၵ်းမၢၼ်ႈ ယိုဝ်းမႃး တၢင်းထုင်ႉၼမ်ႉပွင်ႈၼႆႉ မၢင်လုၵ်ႈၵေႃႈ မႃးတူၵ်းၼႂ်းတူင်ႈၼႃး မၢင်လုၵ်ႈ မႃးတူၵ်းသႂ်ႇတူၼ်ႈမႆႉသေ ႁၵ်းလူမ်ႉ ၸိူဝ်းၼႆႉ။ ဢိူင်ႇၼမ်ႉပွင်ႈ ၼႂ်းၸႄႈဝဵင်းလႃႈသဵဝ်ႈလႄႈ ဢိူင်ႇႁူဝ်ယ ၸႄႈဝဵင်းမိူင်းယႆၼႆႉ တေယၢၼ်ၵၼ် 16 လၵ်း ၼႆယဝ်ႉ။