ၸၢတ်ႈၸိုင်ႈ ယူႊရူပ်ႊ Europe ပိုၼ်ၽၢဝ်ႇ ၼႂ်းဝၼ်းတီႈ 19 ၼႆႉဝႃႈ တႃႇၵူၼ်းမိူင်းမၢၼ်ႈ ၸိူဝ်းထူပ်းၽေးၼမ်ႉ ယွၼ်ႉလူမ်းလႅင်ႉယႃႊၵီႊၼၼ်ႉ တေၵမ်ႉၸွႆႈထႅမ် ၵႂႃႇငိုၼ်းယူႊရူပ်ႊ 1 လၢၼ်ႉ 2 သႅၼ် ဝႃႈၼႆ။

ၼႂ်းငဝ်းလၢႆး ႁူပ်ႉၽေးသိုၵ်းသိူဝ်ယူႇၼၼ်ႉ သမ်ႉမႃးႁူပ်ႉထႅင်ႈ ၽေးလူမ်းလႅင်ႉ ၼမ်ႉၼွင်းလိၼ် ၵူၼ်ႇလႄႈ တေၵမ်ႉ ၸွႆႈပၼ် ၵူၼ်းမိူင်းမၢၼ်ႈ၊ ၼႂ်းၵုၼ်ဢေႊသျႃႊ။ ဢၼ် EU ၵမ်ႉၸွႆႈၼႆႉ တီႈမိူင်းမၢၼ်ႈ လႆႈငိုၼ်းၵမ်ႉၸွႆႈၼမ်သုတ်းယဝ်ႉ ဝႃႈၼႆ။

ၸွမ်းၼင်ႇ ၶေႃႈပိုၼ်ၽၢဝ်ႇ သိုၵ်းမၢၼ်ႈ ယိုတ်းမိူင်းၼႆ ၼႂ်းမိူင်းမၢၼ်ႈ ပတ်းပိုၼ်ႉၼႆႉ  ယွၼ်ႉတၢမ်ႇၽေးလူမ်းလႅင်ႉယႃႊၵီႊသေ ၵူၼ်းမိူင်းလူႉတၢႆ ဢမ်ႇယွမ်း 268 ၵေႃႉ၊ ၸႄႈဝဵင်းႁူပ်ႉၽေးလူမ်း လႅင်ႉၼမ်ႉၼွင်းထူမ်ႈၼႆႉ မီး 56 ၸႄႈဝဵင်းသေ ၸိူဝ်းႁၢႆတူဝ်ဝႆႉ မီးဝႆႉမွၵ်ႈ 100 ၵေႃႉ၊ ၵူၼ်းလူႉတၢႆၼႆႉ ၸၢင်ႈတိူဝ်းၼမ်မႃး ထႅင်ႈယူႇၼႆ ၽူႈၸွႆႈထႅမ်ၵူၼ်းထူပ်း ၽေးၼမ်ႉ ၼႂ်းပိုၼ်ႉတီႈလၢတ်ႈ။

လိူဝ်ၼၼ်ႉ ၼႂ်းဝၼ်းတီႈ 19 ၼႆႉ လူမ်းလႅင်ႉ သူဝ်ႊလိၶ်ႉ (Soulik) ပတ်ႉထွင်းၶဝ်ႈတီႈ မိူင်းဝႅတ်ႉၼၢမ်း ၊ ယွၼ်ႉႁႅင်းလူမ်းလႅင်ႉၼၼ်ႉသေ ၼႂ်းဝၼ်းတီႈ 20 တေႃႇထိုင် ဝၼ်းတီႈ 25 လိူၼ်ၼႆႉ ၼႂ်းမိူင်းတႆး၊ မိူင်းၶျၢင်း၊ မိူင်းရၶႅင်ႇ၊ မိူင်းယၢင်းလႅင်၊ မိူင်းယၢင်းၽိူၵ်ႇ၊ တိူင်းမၼ်းတလေး၊ တိူင်းမၵူၺ်း၊ တိူင်းပႃႇၵိူဝ်၊ တိူင်းယၢၼ်ႇၵုင်ႇ၊ တိူင်းဢေႇရႃႇဝတီႇလႄႈ တိူင်းၼေႇပျီႇတေႃႇ ၸိူဝ်းၼႆႉ ၾူၼ်ၸၢင်ႈ တူၵ်းၼမ်ထႅင်ႈ ၸၢင်ႈပဵၼ်ၼမ်ႉၼွင်းလိၼ်ၵူၼ်ႇ ၵူၼ်းပိုၼ်ႉတီႈႁႂ်ႈၾၢင်ႉယူႇသဝ်းၼႆ ႁွင်ႈၵၢၼ် ၾၢႆႇလၢမ်းၶၢတ်ႈၾူၼ်လူမ်းၾိင်ႈၾႃႉ ပၼ်ၾၢင်ႉဝႆႉၼင်ႇၼႆ။

တီႈမိူင်းမၢၼ်ႈ ပတ်းပိုၼ်ႉၼႆႉ ယွၼ်ႉၽေးလူမ်းလႅင်ႉ ယႃႊၵီႊ ဢၼ်ပတ်ႉထွင်းၶဝ်ႈ တႄႇမိူဝ်ႈဝၼ်းတီႈ 9 ပူၼ်ႉမႃး ၼၼ်ႉသေ သူၼ်ၽုၵ်ႇသွမ်ႈ 6 သႅၼ် 6 မိုၼ်ႇပၢႆ လူႉၵွႆ၊ ဝူဝ်းၵႂၢႆး သႅၼ်ပၢႆ လူႉတၢႆ ၊ ၵူၼ်းမိူင်း 6 သႅၼ် 6 မိုၼ်ႇပၢႆ ႁူပ်ႉ ၽေးၼမ်ႉဝႆႉ – သိုဝ်ႇၶၢဝ်ႇ VOA ဢွၵ်ႇဝႆႉၼင်ႇၼႆ။