ၾူၼ်တူၵ်းႁႅင်း ဢမ်ႇထၢတ်ႇလၢႆဝၼ်းလႄႈ ၼမ်ႉထူမ်ႈၼမ်ႉၼွင်း လိၼ်လွႆၵူၼ်ႇၼိူဝ်သဵၼ်ႈတၢင်း တူၼ်ႈတီး – ၼမ်ႉ ၸၢင် ၸိုင်ႈတႆးပွတ်းၸၢၼ်း ရူတ်ႉၵႃး ဢမ်ႇၸၢင်ႈၵႂႃႇမႃး ၵိုတ်းၶမ်ဝႆႉမွၵ်ႈ 500 လမ်း ၶူဝ်းၵုၼ်ႇ ဢမ်ႇၸၢင်ႈတေႃႉတၢင်ႇမႃးၶၢႆ ၵူၼ်းမိူင်းဝဵင်းၼမ်ႉၸၢင် ယၢပ်ႇၽိုတ်ႇလိူဝ်ႁႅင်း။

ၼၢင်းယိင်း ၵူၼ်းမိူင်း ဝဵင်းၼမ်ႉၸၢင် လၢတ်ႈဝႃႈ ယၢမ်းလဵဝ် ၶူဝ်းၵုၼ်ႇတၢင်းၵိၼ်လႄႈ ၶူဝ်းၸႂ်ႉ ၵႃႈယႂ်ႇၶၼ်သုင် ၶိုၼ်ႈ 2 ပုၼ်ႈ ဝႃႈၼႆ။

“တီႈၼႂ်းဝဵင်းတႄႉ တေႃႈလဵဝ် ၵႃးလူင်မႃးၶၢင်ႉၶမ်ဝႆႉ မွၵ်ႈ 20-30 လမ်း၊ တေၶိုၼ်ႈတူၼ်ႈတီးၵေႃႈ ဢမ်ႇၸၢင်ႈ၊ တေၵႂႃႇတၢင်းၵဵင်းတုင်ၵေႃႈ ဢမ်ႇၸၢင်ႈ။ လိၼ်ၵူၼ်ႇလႄႈ သဵၼ်ႈတၢင်းၶၢတ်ႇဝႆႉ။ ၵွပ်ႈၼႆလႄႈ ၶူဝ်းၵုၼ်ႇ ဢမ်ႇၸၢင်ႈ ဢဝ်မႃး ၼမ်ႉၸၢင်။ တီႈဝဵင်းၼမ်ႉၸၢင် ယၢမ်းလဵဝ်ၶူဝ်းၵိၼ်ယႅမ်ႉ ၵႃႈယႂ်ႇၶိုၼ်ႈ ၵူႈဝၼ်း”- ဝႃႈၼႆ။

ရူတ်ႉၵႃး ဢၼ်ၶၢင်ႉၶမ်ဝႆႉ တီႈဝဵင်းၼမ်ႉၸၢင် ယၢမ်းလဵဝ် ပဵၼ်ရူတ်ႉၵႃးတၢင်ႇထၢၼ်ႇႁိၼ်။ ၵႃးတၢင်ႇမၢၵ်ႇ မႆႉမၢၵ်ႇတွၵ်ႇ၊ ၶဝ်ႈၵၢပ်ႇ၊ ၶူဝ်းၵုၼ်ႇ ဢၼ်ဢွၵ်ႇမိူင်းတႆး ပွတ်းၸၢၼ်းသေ ဢၢၼ်းဢဝ်ၵႂႃႇၶၢႆတူၼ်ႈတီး။ ရူတ်ႉၵႃးလူင် ၸိူဝ်းၼႆႉ မီးတီႈဝဵင်းပၢင်လူင် မွၵ်ႈ 100 လမ်း၊ တီႈလွႆလႅမ်ၵေႃႈ မီး 300 ပၢႆ၊ တီႈၼမ်ႉၸၢင် ၵေႃႈ တေမီး 200 ပၢႆ၊ တင်းမူတ်း ဢၼ်ပႆႇ ၶိုၼ်ႈ 500 ပၢႆ ဝႃႈၼႆ။

ၽူႈၸၢႆး ၵူၼ်းမိူင်းဝဵင်းပၢင်လူင် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၵႃးတၢင်ႇၵုၼ်ႇ ၸိူဝ်းၼႆႉ ၶမ်ဝႆႉၼမ်ၼႃႇ၊ ၵႃးလူင် တၢင်ႇထၢၼ်ႇႁိၼ်ၼမ်လိူဝ်ပိူၼ်ႈ၊ ၵႃးတၢင်းတႃႈၶီႈလဵၵ်း – ၵဵင်းတုင်ၵေႃႈ မႃးၶမ်ဝႆႉတင်းၼႆႉမူတ်း ၼႂ်းဝဵင်းၼွၵ်ႈဝဵင်းၶပ်ႉလူင်ၵႂႃႇ ၼမ်ဝႃႈၼမ်”- ဝႃႈၼႆ။

ယၢမ်းလဵဝ် တီႈဝဵင်းၼမ်ႉၸၢင် ၶၼ်ၵုၼ်ႇၶိုၼ်ႈ 2 ပုၼ်ႈ ၶဝ်ႈၼိုင်ႈထူင်ၸမ် 2 သႅၼ်၊ ၼမ်ႉမၼ်းၵိၼ်ၸမ် 2 သႅၼ်၊ ၶႆႇ ၵႆႇ 1 လုၵ်ႈ 500 ပျႃး၊ ၽၵ်းယိူဝ်ႈၼၢင်းၶဵဝ် ၼိုင်ႈမတ်ႉ 500 ပျႃးသေ ၵုၼ်ႇႁႅင်ႈၶိုၼ်ႈမႃး ၼိုင်ႈမဵဝ်း 4- 5 ႁဵင် ဝႃႈၼႆ။

ၵူၼ်းၸၢႆးပိုၼ်ႉတီႈ ဝဵင်းလွႆလႅမ် ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ -“ၼမ်ႉမီႇၼမ်ႉမၼ်း၊ ၵုၼ်ႇႁႅင်ႈ ၸိူဝ်းၼႆႉၶၢတ်ႇ၊ တၢင်းၵႃးၵေႃႈ ဢမ်ႇၸၢင်ႈၵႂႃႇမႃးၸိူင်ႉၼႆ ၶၼ်ၼမ်ႉမၼ်းၸၢၵ်ႈၵေႃႈၶိုၼ်ႈ 1 လိတ်ႊ 7,000 – 8,000 ႁဵင် ၶၼ်ၵုၼ်ႇ ၵေႃႈ ၶိုၼ်ႈၵူႈမဵဝ်းမဵဝ်း ၵူၼ်းမိူင်းလႆႈယၢပ်ႇလိူဝ်ႁႅင်း”- ဝႃႈၼႆ။

ၼႂ်းၵႄႈလွႆလႅမ် – မိူင်းပွၼ် လိၼ်လွႆ ၵူၼ်ႇလူင်းသႂ်ႇၼိူဝ်တၢင်းၵႃးလႄႈ ႁဵတ်းႁႂ်ႈၵႃးလူင် လႆလူင်းႁူၺ်ႈၸွမ်းလိၼ် ၵူၼ်ႇ။ မၢင်လမ်း လူင်းၵႂႃႇထိုင်ၼႂ်းႁူၺ်ႈ၊ မၢင်လမ်း တိုၵ်ႉၶၢင်ႉၶမ်ဝႆႉ ၵၢင်လွႆ။ လိၼ်တေၵူၼ်ႇတဵင် ၸဝ်ႈၵႃး လူႉတၢႆၵေႃႈမီး ဝႃႈၼႆ။

ပီၼႆႉ ၸိုင်ႈတႆးပွတ်းၸၢၼ်း၊ ၸိုင်ႈတႆးပွၵ်းဢွၵ်ႇ ၼမ်ႉထူမ်ႈၼမ်ႉၼွင်းႁၢဝ်ႈႁႅင်းသေ ႁိူၼ်းၵူၼ်းပိုၼ်ႉတီႈ လူႉၵွႆ တင်းၼမ်တင်းလၢႆ၊ ယွၼ်ႉၼမ်ႉထူမ်ႈၼမ်ႉၼွင်းသေ ၵူၼ်းၸိုင်ႈတႆး ပွတ်းၸၢၼ်း လူႉတၢႆ 140 ၵေႃႉယဝ်ႉ – PYO ပိုၼ်ႇၽၢဝ်ႇဝႆႉ ၼင်ၼႆ။

တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)