ၽွင်းၵူၼ်းမိူင်း ၸိုင်ႈတႆးပွတ်းၸၢၼ်းလႄႈ ၸိုင်ႈတႆးပွတ်းဢွၵ်ႇ ထူပ်းၽေးၼမ်ႉၼွင်း လိၼ်ၵူၼ်ႇ တုမ်ႉတိူဝ်ႉ တၢႆမၢတ်ႇယူႇၼႆႉ ၸိုင်ႈတႆးပွတ်းႁွင်ႇသမ်ႉ ၶိူင်ႈမိၼ်သိုၵ်းမၢၼ်ႈ မႃးပွႆႇမၢၵ်ႇ တီႈဝဵင်းၼွင်ၶဵဝ် မိူဝ်ႈၼႆႉ ယၢမ်းၼႂ်ၸဝ်ႉ ၽွင်း ၵူၼ်းပိုၼ်ႉတီႈ ၼွၼ်းလပ်းၼွၼ်းယဵၼ် ႁိူၼ်းၵူၼ်းပိုၼ်ႉတီႈ လူႉၵွႆ။
မိူဝ်ႈၼႆႉ ဝၼ်းတီႈ 19/09/2024 ၵၢင်ၼႂ်ၸဝ်ႉ 3 မူင်း သိုၵ်းမၢၼ်ႈ ဢဝ်ၶိူင်ႈမိၼ် Y-12 မႃးပွႆမၢၵ်ႇ တူၵ်းသႂ်ႇ တီႈၶဵတ်ႇ ၼႃႈလိၼ် 4 လွၵ်း 1 ပွၵ်ႉပူႇတႃႇ တုမ်ႉတိူဝ်ႉႁိူၼ်းယေး ၵူၼ်းမိူင်းလူႉၵွႆ 3 လင်။
ၼၢင်းယိင်း ၵူၼ်းပိုၼ်ႉတီႈ ဝဵင်းၼွင်ၶဵဝ် လၢတ်ႈၽူႈတွႆႇႁွၵ်ႈဝႃႈ -“ၼႂ်ၼႆႉ ၵၢင်ၼႂ် 3 မူင်း သိုၵ်းမၢၼ်ႈ ဢဝ်မၢၵ်ႇ မႃးပွႆႇတီႈပွၵ်ႉပူႇတႃႇ ႁိူၼ်းၵွႆ 3 လင်။ ၵတ်းၵႃႈလႃႇ ၸဝ်ႈႁိူၼ်း ပၢႆႈၽေးသိုၵ်းဝႆႉလႄႈ ဢမ်ႇမီးလွင်ႈမၢတ်ႇၸဵပ်းလူႉတၢႆ။ သိုၵ်းမၢၼ်ႈ ၵႆႉမႃးပွႆႇမၢၵ်ႇၼႃႇ၊ မိူဝ်ႈဝၼ်းတီႈ 14 ၵေႃႈ မႃးပွႆႇၵမ်း ႞ ၊ 2-3 ဝၼ်းမႃးပွႆႇ ႞ ပွၵ်ႈ” – ဝႃႈၼႆ။
သိုၵ်းမၢၼ်ႈ ၵႆႉမႃးပွႆႇမၢၵ်ႇလႄႈ ၵူၼ်းပိုၼ်ႉတီႈၵူဝ်၊ တေပၢႆႈၵေႃႈသမ်ႉ မႆႈၸႂ်ႁိူၼ်းယေးလႄႈ ၶုတ်းလုၵ်းပဵမ်ႇဝႆႉ ၼႂ်းဝၢင်းႁိူၼ်း၊ လႆႈၾၢင်ႉယူႇၾၢင်ႉၵိၼ်။ ၸိူဝ်းဢမ်ႇႁတ်းယူႇတႄႉ ဢွၼ်ၵၼ်ပၢႆႈၵႂႃႇ ယူႇဝႆႉတၢင်ႇတီႈတၢင်ႇလႅၼ်ယဝ်ႉ – ဝႃႈ ၼႆ။
ၵူၼ်းပိုၼ်ႉတီႈ လၢတ်ႈၽူႈတွႆႇႁွၵ်ႈ ထႅင်ႈဝႃႈ -“ဢွၼ်ၵၼ် ၵူဝ်သိုၵ်းမၢၼ်ႈ ဢဝ်ၶိူင်ႈမိၼ် မႃးပွႆႇမၢၵ်ႇ ယၢမ်းၼွၼ်းဝၢၼ်။ ဢၼ်ၶဝ်ၵႆႉမႃးပွႆႇၼႆႉ ပဵၼ်တၢင်းပွၵ်ႉၵၢတ်ႇ။ ၵွပ်ႈၼႆ လႆႈဢွၼ်ၵၼ် ၶၢႆႉၶူဝ်းၶွင် ၵႂႃႇဝႆႉတၢင်ႇတီႈ။ ဢမ်ႇၸၢင်ႈ ၶၢႆႉၶူဝ်း ၼႂ်းၵၢတ်ႇ။ ၵူၼ်းမိူင်း ဢမ်ႇၸၢင်ႈႁဵတ်းၵိၼ်ၵၢၼ်သင်”- ဝႃႈၼႆ။
ၾၢႆႇၼိုင်ႈ တီႈဝဵင်းသီႇပေႃႉၼႆႉ ၸုမ်းယိပ်းၵွင်ႈၵၢင်ႇ ၵႆႉယိုဝ်းၵွင်ႈလူင်ၵႂႃႇၵူႈႁူး ၵူႈတၢင်း။ မၢၵ်ႇၵွင်ႈၶႂ်ႈတူၵ်း တီႈလႂ်ၵေႃႈတူၵ်း။ ၵူၼ်းမိူင်း ဢမ်ႇမီးလွင်ႈ ႁူမ်ႇလူမ်ႈသၢႆၸႂ်သေဢိတ်း။
တီႈဝၢၼ်ႈတွင်ၶမ်း၊ ဝၢၼ်ႈမၢၵ်ႇၵႅင်း၊ ဝၢၼ်ႈလွႆယၢဝ်းလႄႈ ဝၢၼ်ႈမႆႉပူၵ်ႇ ဢၼ်ယၢၼ်ၵႆၵၼ် တၢင်းဝဵင်းၼွင်ၶဵဝ် မွၵ်ႈ 30 လၵ်း ၼၼ်ႉၵေႃႈ တေႃႇထိုင်ယၢမ်းလဵဝ် သိုၵ်းမၢၼ်ႈတင်း သိုၵ်းတဢၢင်း TNLA တိုၵ်ႉသိုပ်ႇ ပိုတ်းယိုဝ်းၵၼ်ႁႅင်း ႁိူၼ်းယေးလႄႈ ဝတ်ႉဝႃးၽႃသိူဝ်ႇ လူႉၵွႆ။ ၵူၼ်းဝၢၼ်ႈ မွၵ်ႈ 500 လႆႈပၢႆႈယၢၼ်ႁိူၼ်းယေး ၵႂႃႇသွၼ်ႈဝႆႉၸွမ်း ပိုၼ်ႉတီႈ ဢၼ် ဢမ်ႇမီးပၢင်တိုၵ်း။
သိုၵ်းတဢၢင်း TNLA ပိုၼ်ၽၢဝ်ႇဝႆႉဝႃႈ ဝၼ်းတီႈ 13/09/2024 သိုၵ်းမၢၼ်ႈ ပွႆႇမၢၵ်ႇတၢင်းဝၢၼ်ႈပၢင်ႇၸူင် ဢိူင်ႇပၢင်တီး ၸႄႈဝဵင်းၼွင်ၶဵဝ် 2 လုၵ်ႈ။ တိူဝ်ႉမၢတ်ႇထဝ်ႈလၢၼ် 2 ၵေႃႉ လူႉတၢႆ။ ၸၢႆးၵေႃႉၼိုင်ႈ မၢတ်ႇၸဵပ်းႁၢဝ်ႈႁႅင်း၊ မိူဝ်ႈဝၼ်းတီႈ 14/09/2024 ၼၼ်ႉၵေႃႈ သိုၵ်းမၢၼ်ႈ မႃးပွႆႇမၢၵ်ႇတီႈ ပွၵ်ႉၸၢၼ်း တီႈဝဵင်းၼွင်ၶဵဝ် 3 လုၵ်ႈ တုမ်ႉတိူဝ်ႉႁိူၼ်းယေး ၵူၼ်းမိူင်း လူႉၵွႆ။
တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ