ၼႂ်းၶၢဝ်းတင်း 2-3 ဝၼ်းမႃးၼႆႉ ဢၵွင်ႉ KBZ Pay ဢၼ်မီးလွင်ႈဢူၼ်းငိုၼ်းၶဝ်ႈဢွၵ်ႇ ဢၼ်ႁူမ်ႈၵၼ် လူႇတၢၼ်း ၸွႆႈထႅမ်ၵူၼ်းထူပ်းၽေးၼမ်ႉထူမ်ႈ ၼႂ်းမိူင်းတႆးလႄႈ မိူင်းယၢင်းလႅင် ထုၵ်ႇၸုမ်းၽဵဝ်ႈမူၺ်ႉလွင်ႈလၢင်ႉငိုၼ်း တႂ်ႈသိုၵ်းမၢၼ်ႈ ႁၢမ်ႈႁႅတ်ႉပိၵ်ႉဝႆႉ ၸူဝ်ႈၶၢဝ်း။ 

တႄႇႁူဝ်လိူၼ် သႅပ်ႊထႅမ်ႊပိူဝ်ႊမႃး ၼႂ်းမိူင်းမၢၼ်ႈ ပတ်းပိုၼ်ႉ ၾူၼ်တူၵ်းထပ်းၵၼ်လၢႆဝၼ်း ပဵၼ်လွင်ႈၼမ်ႉထူမ်ႈၼမ်ႉၼွင်းသေ ၵူၼ်းထူပ်းၽေးၼမ်ႉ မီးၼပ်ႉႁူဝ်မိုၼ်ႇႁူဝ်သႅၼ်။ ဢၼ်လွင်ႈတၢႆၸွမ်းၼမ်ႉ မီးၼပ်ႉႁူဝ်ပၢၵ်ႇ။ တႃႇ ၵူၼ်းထူပ်းၽေး ၼမ်ႉထူမ်ႈၼမ်ႉၼွင်းၼႆသေ ၵူၼ်းမိူင်းမၢၼ်ႈ ၼွၵ်ႈမိူင်းၼႂ်းမိူင်း ဢွၼ်ၵၼ် သူင်ႇငိုၼ်းတွင်းၸွႆႈထႅမ်ၵၼ်။ ၽွင်းၼင်ႇၼႆ ၸုမ်းၽဵဝ်ႈမူၺ်ႉ လွင်ႈလၢင်ႉငိုၼ်းတွင်း သင်ႇႁၢမ်ႈႁႅတ်ႉ KBZ Pay မၢင်ဢၼ် လူၺ်ႈဢမ်ႇၸႅင်ႈၶၢဝ်ႇ မႃးသင်လူင်ႈၼႃႈ။   

ၵူၼ်းမိူင်းတႆးပွတ်းၸၢၼ်း ဢၼ်ၺႃးႁႅတ်ႉ Account  ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ထုၵ်ႇပိၵ်ႉ မိူဝ်ႈဝၼ်းတီႈ 16/09/2024 လူၺ်ႈဢမ်ႇလႆႈႁူႉဝႃႈ ပဵၼ်လွင်ႈတၢင်းသင်၊ သိုပ်ႇၾူၼ်းၸူး call center ၵေႃႈ ၶဝ်ဝႃႈ မီးလွင်ႈငမ်းငဝ်းလႄႈ ႁဵတ်းၸွမ်းၶၵ်ႉတွၼ်ႈၶူင်းၵၢၼ်ၽဵဝ်ႈလၢင်ႉ လွင်ႈလၢင်ႉငိုၼ်းလမ် ပဵၼ်ငိုၼ်း ၶၢဝ် (ငွေကြေးခဝါချမှုဆိုင်ရာ တိုက်ဖျက်ရေးအဖွဲ့မှ သံသယ) လႄႈ ပိၵ်ႉႁႅတ်ႉဝႆႉ။ ၵွပ်ႈၼႆ ၵႃႈဢမ်ႇပႆႇၵႄႈ လိတ်ႈ ၸွပ်ႇထၢမ်ယဝ်ႉတူဝ်ႈတႄႉ ဢမ်ႇၸၢင်ႈႁဵတ်းပၼ်သင် ဢမ်ႇၸၢင်ႈပိုတ်ႇပၼ် ၶိုၼ်းၼႆၵူၺ်း။ လွင်ႈတေဢိုတ်းႁႅတ်ႉၼႆႉ ၶဝ်ဢမ်ႇၸႅင်ႈမႃးလူင်ႈၼႃႈသင်သေဢိတ်း”- ဝႃႈၼႆ။

မိူၼ်ၼႆၼင်ႇၵဝ်ႇ ၵူၼ်းမိူင်းယၢင်းလႅင် ၵေႃႉၼိုင်ႈ ဢၼ်ထုၵ်ႇပိၵ်ႉႁႅတ်ႉ Kpay လႄႈ ထုၵ်ႇပိၵ်ႉႁႅတ်ႉ ပႃးသိမ်ႊ (မၢႆ) ၾူၼ်း ၵေႃႉၼိုင်ႈၵေႃႈ လၢတ်ႈတီႈၽူႈတွႆႇႁွၵ်ႈ ၼင်ႇၼႆ။ 

“ဝၢႆးလင် ၺႃးပိၵ်ႉႁႅတ်ႉ Kpay  ယဝ်ႉ 4-5 ဝၼ်း ၺႃးပိၵ်ႉႁႅတ်ႉပႃး မၢႆၾူၼ်းထႅင်ႈ။ ငိုၼ်းဢၼ်လူႇၶၢမ်ႇမႃး ၶမ်ဝႆႉၼႂ်းမိုဝ်းထိုဝ်ၼႆႉယင်း ပႆႇလႆႈသူင်ႇၸွႆႈထႅမ်လူႇၵႂႃႇ။ ၶဝ်ၵိုင်ႉၵၢင်ႉႁႅတ်ႉပႅတ်ႈ လူၺ်ႈဢမ်ႇသူင်ႇၶေႃႈ ၵႂၢမ်း ဢမ်ႇသူင်ႇၶၢဝ်ႇမႃးသင်”- ဝႃႈၼႆ။

ၵဵဝ်ႇလူၺ်ႈလွင်ႈ ဢၵွင်ႉငိုၼ်း ထုၵ်ႇပိၵ်ႉဢိုတ်းၼႆႉသေ သႄႊလီႊ ႁၢၼ်ႇငဵင်းဢူး ၶွၼ်ႉတဝ်ႉသိုၵ်းမၢၼ်ႈ ဢၼ်လၢတ်ႈလွင်ႈလီ သိုၵ်းမၢၼ်ႈယူႇတႃႇသေႇၼၼ်ႉ တႅမ်ႈဝႆႉတီႈ Telegram channel မၼ်းဝႆႉဝႃႈ – ၵူၼ်းလူႇၶၢမ်ႇငိုၼ်း ၸိူဝ်းၼႆႉ လႃႈလီႈလၢတ်ႈလွင်ႈဢမ်ႇၸိုဝ်ႈဢမ်ႇၸႂ်ႈသေ ႁူၺ်းသူၼ်းႁႂ်ႈၵူၼ်းမီးၸႂ် သတ်ႉထႃႇ မႃးလူႇတၢၼ်းၼမ်ၼမ် – ဝႃႈၼႆဝႆႉ။  

ယူႇတီႈ KBZ Bank တႄႉၵေႃႈ ပိုၼ်ၽၢဝ်ႇဝႆႉဝႃႈ တေၸွႆႈထႅမ်ၵူၼ်းထူပ်းၽေးၼမ်ႉ ၼိုင်ႈမိုၼ်ႇလၢၼ်ႉပျႃး ၼႆသေ KBZ Pay ၶွင်ၵူၼ်းမိူင်းဢၼ်ၸွႆႈၵၼ် ၵဵပ်းငိုၼ်းလူႇယူႇၼၼ်ႉတႄႉ သမ်ႉလမ်းႁႅတ်ႉႁၢမ်ႈပိၵ်ႉ။ 

တႅမ်ႈ – ယိင်းသဵဝ်ႈၶၢဝ် (ၽူႈသိုပ်ႇၶၢဝ်ႇၾိုၵ်းၵၢၼ်)