သိုၵ်းမၢၼ်ႈ ဝဵင်းပၢင်ႁူႈ တီႉၺွပ်းၵူၼ်းမိူင်း ဢၼ်ယူႇၼႂ်းဝဵင်းလႄႈ ၼွၵ်ႈဝဵင်း ၼိုင်ႈပွၵ်ႉဢမ်ႇယွမ်း 7 ၵေႃႉ တႃႇသူင်ႇၶိုၼ်ႈပၢင်သွၼ်ၵၢၼ်သိုၵ်း။

လွင်ႈလူင်းၵဵပ်း ၵူၼ်းၼုမ်ႇၼႂ်းဝၢၼ်ႈ တႃႇၾိုၵ်းၵၢၼ်သိုၵ်းၼႆႉ သိုၵ်းမၢၼ်ႈ တႄႇႁဵတ်းမႃး ၼႂ်းႁူဝ်လိူၼ်သႅပ်ႊထႅမ်ႊပိူဝ်ႊၼႆႉ။

ၵဵဝ်ႇလူၺ်ႈလွင်ႈၼႆႉ ၵူၼ်းမိူင်း ပိုၼ်ႉတီႈ လၢတ်ႈၽူႈတွႆႇႁွၵ်ႈဝႃႈ – “မိူဝ်ႈလဵဝ် ဢၼ်ၶဝ်လူင်းတီႉၺွပ်းၼႆႉ ဢမ်ႇၸႂ်ႈ ၼႂ်းပွၵ်ႉၼႂ်းဝဵင်း။ ပဵၼ်ၼႂ်းဝၢၼ်ႈ ၸွမ်းၶႅပ်ႇဝဵင်း ၸိူဝ်းၼႆႉ။ ၶဝ်ၶဝ်ႈၺွပ်းထိုင် ၼႂ်းႁိူၼ်းၼႂ်းယေး လၢတ်ႈဝႃႈ တႃႇသူင်ႇၵႂႃႇ ႁဵၼ်းၵၢၼ်သိုၵ်း။ ၵူၼ်းမိူင်း ၼႂ်းဝၼ်းမိူဝ်ႈၼႆႉ လိူဝ်သေ လႆႈမႆႈၸႂ် ယွၼ်ႉပၢင်တိုၵ်းယဝ်ႉ သမ်ႉလႆႈပၢႆႈလွင်ႈသိုၵ်းမၢၼ်ႈ မႃးၵဵပ်းသိုၵ်းထိုင် ၼႂ်းဝၢၼ်ႈၼႂ်းဝဵင်းထႅင်ႈ။ ပဵၼ်ဢၼ်တုၵ်ႉၶယဝ်ႉတုၵ်ႉၶထႅင်ႈ”- ဝႃႈၼႆ။     

ၼႂ်းႁူဝ်လိူၼ်သႅပ်ႊထႅမ်ႊပိူဝ်ႊ ၵူၺ်းၼင်ႇၵဝ်ႇ သိုၵ်းမၢၼ်ႈ ပႂ်ႉတီႈၼႃႈႁုၼ်ႇႁၢင်ႈတွင်း ႁိမ်းၸၼ်ႉၸွမ် သိုၵ်းၶဝ်ၼၼ်ႉသေ ၵူတ်ႇထတ်းၵူၼ်းၸၢႆး ၵူၼ်းၼုမ်ႇၶီႇရူတ်ႉၶိူင်ႈၵႂႃႇမႃး၊ တီႉၺွပ်းဝႆႉသေ ၵမ်ႈၽွင်ႈၵေႃႈ လွတ်ႈမႃးၶိုၼ်းယဝ်ႉ ၵမ်ႈ ၽွင်ႈၵေႃႈ ပႆႇလွတ်ႈမႃးၶိုၼ်း။

“ၶဝ်ပႂ်ႉတီႈ ႁိမ်းႁုၼ်ႇႁၢင်ႈတွင်းၼၼ်ႉသေ ပႂ်ႉတီႉၵူၼ်းမိူင်းၵႂႃႇမႃး။ တီႉၵႂႃႇဝႆႉမွၵ်ႈ 3 ဝၼ်း။ ဢၼ်ပွႆႇ မႃးၶိုၼ်းၵေႃႈမီး ဢၼ်ပႆႇပွႆႇမႃးၶိုၼ်း ၵေႃႈမီး။ ဢၼ်ၶဝ်ၺွပ်းဝႆႉ ၼၼ်ႉၵေႃႈ ၸွင်ႇတေပွႆႇဢမ်ႇပွႆႇတႄႉ ဢမ်ႇႁူႉ” – ၽူႈၸၢႆး ဢႃယု 50 ပၢႆ ဢၼ်ပဵၼ်ပီႈၼွင်ႉ ၵူၼ်းၺႃးၺွပ်းၼၼ်ႉ ၵေႃႉၼိုင်ႈ လၢတ်ႈၼင်ႇၼႆ။

လိူဝ်ၼၼ်ႉ တပ်ႉသိုၵ်းမၢၼ်ႈ ဢၼ်မီးၼႂ်းၸႄႈဝဵင်းၼွင်ၶဵဝ် တီႈဝၢၼ်ႈၵုင်းမၢၵ်ႇမူင်ႈလႄႈ ဝၢၼ်ႈၵုင်းၺွင်ႇ ၸိူဝ်း ၼၼ်ႉၵေႃႈ ၵႆႉမီးၶိူင်ႈမိၼ် မႃးသူင်ႇၶဝ်ႈၼမ်ႉတၢင်းၵိၼ်လႄႈ ၼႂ်းပၢင်တိုၵ်းၵေႃႈ မီးၶိူင်ႈမိၼ် မႃးပွႆႇမၢၵ်ႈၸွႆႈပႃး။

ယၢမ်းလဵဝ် သိုၵ်းမၢၼ်ႈ တင်ႈၵဵတ်ႉလၢၼ်ႇ ၼႂ်းၵႄႈဝဵင်းၼွင်ၶဵဝ်လႄႈ ဝဵင်းပၢင်ႁူႈ။ လိူဝ်ၼၼ်ႉ ထႅမ်ႁႅင်းဝႆႉ တီႈတပ်ႉယႂ်ႇလူင်ၶဝ် တီႈဝဵင်းလိူဝ်ႇ ၸီးပိၼ်ႇၵျီး ၸၼ်ႉၸွမ်ငဝ်ႈငုၼ်း ၶႃႈႁၢပ်ႇၵၢၼ်ၶုၼ်ၶဝ် ၸိူဝ်းၼႆႉၵေႃႈ သိုၵ်းမၢၼ်ႈ ထႅမ်ႈႁႅင်းသိုၵ်းဝႆႉ။

 တႅမ်ႈ – ၼၢင်သႅင်ၶမ်း (ၽူႈသိုဝ်ႇၶၢဝ်ႇၾိုၵ်းၵၢၼ်)