ၸူဝ်ႈသိုၵ်းမၢၼ်ႈ ပိုၼ်ၽၢဝ်ႇၵဵပ်းသိုၵ်းၼႆႉ ၸဵမ်ဢဝ်ၵူၼ်းၼုမ်ႇၵူၼ်းထဝ်ႈဢမ်ႇလႆႈယူႇၵတ်းၸႂ်၊ မိူဝ်ႈတႄႇဢွၵ်ႇပိူင်ၵဵပ်းသိုၵ်းတႄႉ လၢတ်ႈဝႃႈ တေဢဝ်သဵၼ်ႈမၢႆ ၵူၼ်းၼုမ်ႇၵူၺ်းဝႃႈၼႆသေတႃႉ ယၢမ်းလဵဝ်သမ်ႉ သိုၵ်းမၢၼ်ႈ ၶိုင်ၵဵပ်းသဵၼ်ႈမၢႆ ၵူၼ်းၶၢဝ်ႉၵူၼ်းၵႄႇပႃး။ ၾၢႆႇၼိုင်ႈၵေႃႈ မႆႈၸႂ် ၸွမ်းၵၢၼ် ႁႃၵိၼ်လဵင်ႉတွင်ႉ ၾၢႆႇၼိုင်ႈၵေႃႈ ၵူဝ်လႆႈယၢပ်ႇၸွမ်းသိုၵ်းမၢၼ်ႈထႅင်ႈ။

မိူၼ်ၼင်ႇ တၢင်းထုင်ႉၼႃးၵွင်းမူး၊ မိူင်းတူၼ်၊ ပုင်ႇပႃႇၶႅမ် ၸိုင်ႈတႆးပွတ်းဢွၵ်ႇၶူင်းၼႆႉ သိုၵ်းမၢၼ်ႈ တႄႇၵဵပ်းသဵၼ်ႈမၢႆၵူၼ်းၶၢဝ်ႉၵူၼ်း ထဝ်ႈပႃး။ ဢႃယု 60 လူင်းတႂ်ႈၼႆႉ ၽႂ်တေဢမ်ႇလွတ်ႈၼႆလႄႈ ၵူၼ်းမိူင်းၶီၸႂ်မႆႈၸႂ် ၵူဝ်လႆႈထူပ်း ၽေးၵွင်ႈၽေးၵၢင်ႇ ၼႆယဝ်ႉ။

ႁၢင်လိူၼ်ဢေႃႊၵတ်ႊသ်ၼႆႉၵူၺ်း မိူင်းတႆးပွတ်းဢွၵ်ႇၶူင်း တၢင်းထုင်ႉၼႃးၵွင်းမူး လႅၼ်လိၼ်တႆး – ထႆးၼႆႉ သိုၵ်းဝႃႉ လူင်းၵဵပ်းသိုၵ်းမႂ်ႇ ၼႂ်းၼႃႈတီႈၶဝ်ၵုမ်းၵမ်သေ ၵူၼ်းၼုမ်ႇၶဝ် ဢွၼ်ၵၼ်ပၢႆႈဢွၵ်ႇၼွၵ်ႈမိူင်းၼမ် ၵူၼ်းလုမ်းလႃးတိူၵ်ႇ ႁႆႈလွၵ်းၼႃး ပေႃးဢမ်ႇၶႂ်ႈၵိုတ်း။

ထိုင်မႃး ဝၼ်းတီႈ 01/09/2024 ၼႆႉသမ်ႉ သိုၵ်းမၢၼ်ႈ သင်ႇၵၢင်ႉၵႄႇ ၼႂ်းဢိူင်ႇၼႂ်းဝၢၼ်ႈ ဢၼ်ယူႇတၢင်းပွတ်းမိူင်းတူၼ် ၸိုင်ႈတႆးပွတ်းဢွၵ်ႇၶူင်း မိူၼ်ၼင်ႇ ပွၵ်ႉဝၢၼ်ႈဢိူင်ႇ ဢၼ်မီးၼႂ်းမိူင်းတူၼ်၊ ၼႃးၵွင်းမူး၊ ပုင်ႇပႃႇၶႅမ် ၸိူဝ်းၼႆႉ ႁႂ်ႈၵဵပ်းပၼ်သဵၼ်ႈၸိုဝ်ႈ သႅၼ်းဢႃယု 35 ၶိုၼ်ႈၼိူဝ်ထိုင် 60 ၼႆထႅင်ႈ။

သဵၼ်ႈမၢႆ တႃႇႁၢပ်ႇၵၢၼ်သိုၵ်းၼႆႉ သိုၵ်းဝႃႉၵေႃႈ ၶိုင်ႈၵဵပ်းယူႇတၢင်းၼိုင်ႈ သိုၵ်းမၢၼ်ႈၵေႃႈ သမ်ႉၶိုင်ႈၵဵပ်းယူႇ တၢင်းၼိုင်ႈလႄႈ ၵူၼ်းမိူင်းတႄႉ ၾၢႆႇလႂ်ၵေႃႈလႆႈမႆႈၸႂ် လႆႈၵူဝ်။ ၵၢင်ႉၵႄႇ ၶဝ်ၵေႃႈ ပေႃးၸွမ်း ၾၢႆႇၼိုင်ႈဢမ်ႇၸွမ်းတၢင်းၼိုင်ႈ ၵေႃႈ သမ်ႉၵူဝ်ၺႃးတူတ်ႈတၢမ်ႇလႄႈ ၵႃႈလႆႈႁဵတ်းၸွမ်းၼင်ႇၸီႉ သင်ႇမႃး။

ၵၢင်ႉၵႄႇတႄႉ လၢတ်ႈဝႃႈ ဢၼ်ၵဵပ်းသဵၼ်ႈမၢႆၵူၼ်းၶၢဝ်ႉ ၵမ်းၼႆႉ ဢမ်ႇၸႂ်ႈတႃႇၶဝ်ႈသိုၵ်း ၵမ်းသိုဝ်ႈ ပဵၼ်တႃႇပႂ်ႉဢဝ်လွင်ႈႁူမ်ႇလူမ်ႈ ၼႂ်းပိုၼ်ႉတီႈၽႂ်မၼ်းၵူၺ်းဝႃႈၼႆသေတႃႉ ၵူၼ်းမိူင်းတႄႉ ဢမ်ႇႁတ်းတမ်းၸႂ် ၽႂ်ၵေႃႈ ၵူဝ်ၺႃးသူင်ႇၵႂႃႇ ၼႃႈသိုၵ်းၵမ်းသိုဝ်ႈၵူၺ်းယဝ်ႉၼႆ ၵူၼ်းပိုၼ်ႉတီႈ ၵေႃႉၼိုင်ႈ လၢတ်ႈၼႄဝႆႉၼင်ႇၼႆ –

“တၢင်းထုင်ႉၼႃးၵွင်းမူးၼႆႉ ဢၼ်ၶဝ်တေၵဵပ်းမီးမွၵ်ႈ 90 ၵေႃႉၼႆႉ။ တၢင်းမိူင်းတူၼ်ၼႆႉတႄႉ တေမီးမွၵ်ႈ 300 ၼႆႉၼႆ ဢေႃႈ။ ဢႃယု 35 ၶိုၼ်ႈၼိူဝ်ၼႆႉ တေဢဝ်မူတ်းၶႃႈဝႃႈ။ သိုၵ်းမၢၼ်ႈ တေသင်ႇလူင်း ၵူၼ်းပႃႈတႂ်ႈၶဝ်သေ ယဝ်ႉၵေႃႈ ၸႂ်ႉၵၢင်ႉၵႄႇၶဝ် လၢတ်ႈၵူၼ်းမိူင်းၶိုၼ်းၼႆဢေႃႈ။ ၶဝ်ဝႃႈတႄႉ တႃႇပႂ်ႉၸွမ်းဝၢၼ်ႈ ၸွမ်းဢိူင်ႇၽႂ်မၼ်းၼႆ ၵူၺ်းၵႃႈ ဢမ်ႇမီးၽႂ်ယုမ်ႇ။ ၽႂ်ၵေႃႈ ၵူဝ်လႆႈၵႂႃႇၶဝ်ႈၼႂ်းပၢင်တိုၵ်း ၵူၺ်းၼၼ်ႉယဝ်ႉ။ ဢၼ်ၶဝ်တေၵဵပ်းၵႂႃႇၼႆႉသမ်ႉ တေဝႃႈႁႂ်ႈပၼ် ၵွင်ႈၼႆၵေႃႈ ဢမ်ႇပၼ်ၼင်ႇၵဝ်ႇ ၶႃႈ”- ဝႃႈၼႆ။

လွင်ႈတေၵဵပ်းၵူၼ်းထႅင်ႈၼႆႉ ၶဝ်ပႆႇလၢတ်ႈမႃးၶိုၼ်းဝႃႈ ဝၼ်းလႂ်ပဵၼ်ဝၼ်းလိုၼ်းသုတ်း။ ႁႂ်ႈၵူၼ်းမိူင်း ပၼ်သဵၼ်ႈမၢႆဝႆးဝႆး တႄႇဢဝ်ဝၼ်းတီႈ 01/09/2024 ၼႆႉၵႂႃႇ ဝႃႈၼႆ။ ၵၢင်ႉၵႄႇၶဝ်တႄႉ တေဢမ်ႇၵဵပ်း သဵၼ်ႈမၢႆၵေႃႈ သမ်ႉၵူဝ်လႆႈမီးပၼ်ႁႃၵၼ် တၢင်းသိုၵ်းမၢၼ်ႈ ပေႃးၵဵပ်းသမ်ႉ ၵူၼ်းမိူင်းဢမ်ႇထုၵ်ႇၸႂ်လႄႈ ၼႂ်းၵႄႈၽူႈၵွၼ်းပွၵ်ႉဢိူင်ႇလႄႈ ၵူၼ်းမိူင်း မီးလွင်ႈၶွင်ႈၶမ်ၵၼ်မႃးၼႆ ၵူၼ်းၼုမ်ႇပိုၼ်ႉတီႈလၢတ်ႈ ။

တႄႇဢဝ် ႁူဝ်လိူၼ်ၾႅပ်ႊပိဝ်ႊရီႊ 2024 ၼၼ်ႉမႃး သိုၵ်းမၢၼ်ႈ ပိုၼ်ၽၢဝ်ႇဝႃႈ ၵူၼ်းမိူင်း ၸိူဝ်းဢႃယုတဵမ် 18 ပီ ၶိုၼ်ႈ ၼိူဝ် တေလႆႈၶဝ်ႈႁၢပ်ႇၵၢၼ်သိုၵ်းၼႆသေ ဢမ်ႇမီးၽႂ်ၶႂ်ႈၵႂႃႇၵၢင်ႉၵႄႉ ၼႂ်းပွၵ်ႉ/ ဢိူင်ႇ ၸင်ႇသူၼ်းဢီးႁႂ်ႈၵူၼ်းမိူင်းၽၵ်း ၵႃႇ ၸၢင်ႈၵူၼ်းၵႂႃႇတႅၼ်း မိူၼ်ၼင်ႇ တီႈဝဵင်းမိူင်းတူၼ် ၸိုင်ႈတႆး ပွတ်းဢွၵ်ႇၼႆႉၵေႃႈ သိုၵ်းမၢၼ်ႈ တဵၵ်းႁႂ်ႈၵၢင်ႉၵႄႇၶဝ် လူင်းၵဵပ်းငိုၼ်းၵူၼ်းမိူင်း တႃႇၸၢင်ႈၵူၼ်းႁဵတ်း သိုၵ်းၼိုင်ႈႁိူၼ်းလႂ် ဢမ်ႇယွမ်း 3 မိုၼ်ႇပျႃး။ ၸၢင်ႈၵူၼ်းၵႂႃႇတႅၼ်းၼိုင်ႈၵေႃႉလႂ် လႆႈပၼ်ဢမ်ႇယွမ်း 60 သႅၼ်ပျႃး။ သိုၵ်းမၢၼ်ႈ တဵၵ်းၸႂ်ႉၵဵပ်းငိုၼ်းၵဵပ်းသိုၵ်း ၸိူင်ႉၼႆ ဢမ်ႇယွမ်း 6 ပွၵ်ႈယဝ်ႉ ဝႃႈၼႆ။

ယၢမ်းလဵဝ်သမ်ႉ ဢမ်ႇၵွမ်ႉၵူၺ်း သႅၼ်းၵူၼ်းၼုမ်ႇၵူၺ်း ၵူၼ်းၶၢဝ်ႉၵူၼ်းထဝ်ႈၵေႃႈ တေဢမ်ႇလွတ်ႈ ယဝ်ႉလႄႈ ၵူၼ်းမိူင်းဢွၼ်ၵၼ်ပဵၼ်ၸႂ်ဢမ်ႇလီ။ ၵူၼ်းၼုမ်ႇႁိူၼ်းလႂ်ၵေႃႈ ဢွၼ်ၵၼ်ပၢႆႈ ဢွၵ်ႇၵၼ် မူတ်းယဝ်ႉလႄႈ ၵမ်းၼႆႉသမ်ႉ ၵူၼ်းၸၢႆးသႅၼ်းပၢၼ် 35 ၶိုၼ်ႈၼိူဝ် ၸိူဝ်းၼႆႉၵေႃႈ တေႁႃလၢႆးပၢႆႈမၼ်းထႅင်ႈ။ တႃႇမိူဝ်းၼႃႈတႄႉ ၵူၼ်းၸၢႆးတႃႇႁဵတ်း ၵၢၼ်ဝၢၼ်ႈၵၢၼ်သူၼ်ၵေႃႈ ဢမ်ႇၶႂ်ႈၵိုတ်းၽႂ်ယဝ်ႉၼႆ  ၼုမ်ႇယိင်း ၵူၼ်းမိူင်း တူၼ်ၵေႃႉၼိုင်ႈ လၢတ်ႈၼႄၼင်ႇၼႆ –

“ၶဝ်တေၵဵပ်းသႅၼ်း ဢႃယု 60 လူင်းတႂ်ႈၼႆလႄႈ ၸိူဝ်းပၢႆႈၵေႃႈ ပၢႆႈၽွင်ႈယဝ်ႉ ၸိူဝ်းပႆႇပၢႆႈၵေႃႈ တင်းယူႇတင်းလႆႈၵူဝ်။ ပေႃးတႅၵ်ႈတူၺ်း ႁူဝ်ၼပ်ႉၵူၼ်း ဢၼ်ယူႇလႄႈ ဢၼ်ပၢႆႈတႄႉ ပဵၼ်ၵူၼ်းပၢႆႈၵမ်ႈ ၼမ်ယဝ်ႉ”- ဝႃႈၼႆ။

ဝၢႆးသေ သိုၵ်းမၢၼ်ႈဢွၵ်ႇပိူင်ၵဵပ်းသိုၵ်းသေ လူင်းမိုဝ်းႁဵတ်းတႄႉ ယဝ်ႉၼၼ်ႉ ၵူၼ်းၼုမ်ႇ တၢင်းထုင်ႉမိူင်းတူၼ်ၼႆႉ ဢွၼ်ၵၼ်ပၢႆႈၶဝ်ႈမိူင်းထႆးၼမ်။ ၵမ်ႈၼမ် ဢမ်ႇမီးငိုၼ်းၵဵပ်းလႄႈ လႆႈၶၢႆၶူဝ်းသူၼ်ၶူဝ်းႁႆႈ မိူၼ်ၼင်ႇ ၶဝ်ႈသၢၼ်၊ ၽၵ်းမီႇ ၸဵမ်ၸိူဝ်းၼႆႉ။ မိူဝ်ႈလူဝ်ႇပၢႆႈတႄႉ ႁိပ်ႈၼႅတ်ႈၶၢႆၵႃႈထုၵ်ႇၵႃႈပေႃးပၢႆႈ ၶဝ်ႈႁႃႁဵတ်းၵၢၼ်ၼႂ်းမိူင်းထႆး။ မၢင်ၸိူဝ်း ႁွတ်ႈထိုင်မိူင်းထႆးယဝ်ႉသေတႃႉ ဢမ်ႇပဵၼ်ၵၢၼ်ပဵၼ်ငၢၼ်း ႁႃၵၢၼ်ယၢပ်ႇယဵၼ်းလႄႈ လႆႈထူၵ်းၸႂ်ႉငိုၼ်း ဢၼ်မီးဝႆႉပေႃးမူတ်းပေႃးသဵင်ႈ ပဵၼ်ဢၼ်ၵိၼ်းၸႂ် တႄႉတႄႉ ၵူၼ်းပိုၼ်ႉတီႈလၢတ်ႈ။