သိုၵ်းမၢၼ်ႈ ယိုတ်းမိူင်း ယိုတ်းဢဝ်ႁွင်ႈၵၢၼ်လုမ်း ပႃႇတီႇၼူၵ်ႉယုင်း NLD တီႈဝဵင်းမိူင်းတူၼ် ၸိုင်ႈတႆးပွတ်းဢွၵ်ႇၶူင်း ဝႃႈၼႆ။

ဝၼ်းတီႈ 11/12/2024 ယၢမ်းၵၢင်ၼႂ် သိုၵ်းမၢၼ်ႈ ၵိုင်ႉၵၢင်ႉၸႂ်ႉႁွင်ႈၵၢၼ် ၾၢႆႇၽွင်းငမ်း ၵူႈလွင်ႈလွင်ႈ ၸႄႈဝဵင်းမိူင်းတူၼ် ၸိုင်ႈတႆးပွတ်းဢွၵ်ႇ ယိုတ်းဢဝ်လုမ်းပႃႇတီႇၼူၵ်ႉယုင်း NLD ဢၼ်ပၵ်းဝႆႉႁိမ်း ႁူင်းၽဝ်ထုၼ် ၼႂ်းဝၢၼ်ႈၼွင်ပႃယဵၼ်ႇ ၼၼ်ႉလႄႈ ႁဵတ်းႁႂ်ႈၵူၼ်းမိူင်းတူၵ်းၸႂ် ၵူဝ်မီးလွင်ႈတုမ်ႉ ယွၼ်ႈၵၢၼ်ယူႇၵိၼ် ၼႂ်းပိုၼ်ႉတီႈ ဝႃႈၼႆ။

လုမ်းပႃႇတီႇၼူၵ်ႉယုင်း NLD တီႈၸႄႈဝဵင်းမိူင်းတူၼ်ၼႆႉ မိူဝ်ႈသိုၵ်းမၢၼ်ႈ တႄႇယိုတ်းမိူင်းၼၼ်ႉတႄႉ ၾၢႆႇႁူမ်ႇလူမ်ႈ သိုၵ်းမၢၼ်ႈ ၵႂႃႇၽဵဝ်ႈပႅတ်ႈပၢႆႉလႄႈ တုင်းပႃႇတီႇ ဢၼ်ပႃးမိၵ်ႈမၢႆၼူၵ်ႉယုင်းဝႆႉၵူၺ်း။ ပႆႇထိုင်တီႈယိုတ်းဢဝ်တင်းပိုၵ်း ၸိူင်ႉၼႆ။ လၢႆးႁဵတ်းသိုၵ်းမၢၼ်ႈ ၵမ်းၼႆႉ ပဵၼ်ဢၼ်လၢၵ်ႇလၢႆးဝႆႉၼႆ ၵူၼ်းမိူင်းတူၼ် ၵေႃႉၼိုင်ႈ လၢတ်ႈၼႄဝႆႉၼင်ႇ ၼႆ။

“ထၢင်ႇတႄႉ ၽူႈၵွၼ်းတိူင်းသၢမ်ၸဵင်ႇၵဵင်းတုင်မႃးလႄႈ တေထၢမ်မႅၼ်ႈႁိုဝ်ဢမ်ႉႁူႉ။ ၽူႈၵွၼ်းၸႄႈ ဝဵင်းၶဝ်တေဝႃႈတူၺ်းယၢပ်ႇၼႆသေ ၸင်ႇဢွၼ်ၵႂႃႇယိုတ်းၶႃႈၵႂႃႈ။ ယိုတ်းဢႃႇၼႃႇ မႃးပေႃးမီး 3 ပီယဝ်ႉ ယူႇယူႇၸင်ႇမႃးယိုတ်းၼႆႉၵေႃႈ ဝူၼ်ႉယၢပ်ႇဝႆႉၼင်ႇၵဝ်ႇ။ ပၢႆႉမၼ်းၸိူဝ်းၼႆႉတႄႉ ၶဝ်ပူတ်းပႅတ်ႈ ၸဵမ် မိူဝ်ႈသိုၵ်းမၢၼ်ႈ ပိုၼ်ၽၢဝ်ႇႁႂ်ႈတၢင်ႇမၢႆၾၢင် ပုၼ်ႉယဝ်ႉ။ ၵူၺ်းၵႃႈ ဢၼ်ဢဝ်မၢၵ်ႇဢုတ်ႇ ၶပ်ႉယႆသေ တႅမ်ႈဝႆႉၸိုဝ်ႈပႃႇတီႇၼၼ်ႉတႄႉ တိုၵ်ႉမီးဝႆႉယူႇ။ ႁဵတ်းၼၼ်သေ ၽူႈၵွၼ်းၸႄႈဝဵင်းၵေႃႈ ၶၢဝ်းၵူၼ်း လူင်မၢၼ်ႈမႃးၼႆႉ ၶႂ်ႈလႆႈၸိုဝ်ႈလႆႈသဵင်လႄႈ ၸင်ႇသင်ႇႁဵတ်းၼႆၵႂႃႈ”- ဝႃႈၼႆ။

ဝၼ်းတီႈ 10/12/2024 ၼႆႉ ၽူႈၵွၼ်းတပ်ႉတိူင်းသိုၵ်းမၢၼ်ႈ သၢမ်ၸဵင်ႇၵဵင်းတုင် ဢွၵ်ႇတၢင်းၵႂႃႇမိူင်း တေႃႉမိူင်းထႃးလႄႈ လႆႈလတ်းမိူင်းတူၼ် ၸင်ႇၾၢင်ႉမႅၼ်ႈလုမ်းပႃႇတီႇၼူၵ်ႉယုင်းၵေႃႈ ၸၢင်ႈပဵၼ်လႆႈ။

လုမ်းပႃႇတီႈၼူၵ်ႉယုင်း NLD ဢၼ်ပၵ်းဝႆႉတီႈ ၼႂ်းၸႄႈဝဵင်းမိူင်းတူၼ်ၼႆႉ မီးတီႈႁိမ်းႁူင်းၽဝ်ထုၼ် ဝၢၼ်ႈၼွင်ပႃယဵၼ်ႇၼႆႉ တီႈလဵဝ်၊ လိူဝ်ၸိူဝ်းၼၼ်ႉ မိူၼ်ၼင်ႇ ၼႃးၵွင်းမူး၊ ပုင်ႇပႃႇၶႅမ် ၸိူဝ်းၼႆႉတႄႉ ပဵၼ်ဢွင်ႈတီႈၶွၼ်ႈတုမ် ၵၼ်ၵူၺ်းလႄႈ သိုၵ်းမၢၼ်ႈ ၸႂ်ႉပူတ်းပၢႆႉ NLD ဢွၵ်ႇၸဵမ်မိူဝ်ႈတႄႇယိုတ်း မိူင်းယဝ်ႉ ဝႃႈၼႆ။

ၼႂ်းၸႄႈဝဵင်းမိူင်းတူၼ်ၼႆႉ ပၼ်ႁႃၵၢၼ်သိုၵ်းသိူဝ် ဢမ်ႇပဵၼ်တႄႉတႄႉဝႃႈဝႃႈသေတႃႉ မိူၼ်ၼင်ႇ ၸွမ်းၵဵတ်ႉလၢၼ်ႇၶဝ်ႈဢွၵ်ႇမိူင်းၸိူဝ်းၼႆႉတႄႉ သိုၵ်းမၢၼ်ႈၵူတ်ႇထတ်းႁၢဝ်ႈႁႅင်း။ သင်ပဵၼ်ၵူၼ်းဢွၵ်ႇ ၶၢဝ်းတၢင်း ယိပ်းဝႆႉမၢႆၾၢင်ဢၼ် ဢမ်ႇၸႂ်ႈမၢႆၾၢင်မိူင်းတႆး (13 မၢႆၸိူၼ်း) ၼႆၸိုင် ဢမ်ႇပၼ်လတ်းၵႂႃႇ မႃးငၢႆႈငၢႆႈၼႆ ၵူၼ်းမိူင်းတူၼ် ၵေႃႉၼိုင်ႈ လၢတ်ႈ ၼႄဝႆႉၼင်ႇၼႆ –

“ပေႃးၸွမ်းၵဵတ်ႉၸွမ်းလၢၼ်ႇၸိူဝ်းၼႆႉ သင်ဢမ်ႇၸႂ်ႈၵူၼ်းယိပ်းမၢႆၾၢင်မိူင်းတႆး 13/ ၼႆ ၺႃးၵူတ်ႇထတ်းႁႅင်းၼႃႇ။ ၼႂ်းမိူင်းတူၼ်ၼႆႉၵေႃႈ ၵူၼ်းလၢၵ်ႇလၢႆးၼမ်ၼႃႇ။ လုၵ်ႉတီႈလႂ်ပႆတီႈလႂ်မႃးၵေႃႈ ဢမ်ႇႁူႉ။ ဢၼ်ၺႃးၺွပ်းဝႃႇသင်ဝႃႇတႄႉ ပႆႇမီးၼင်ႇၵဝ်ႇ”- ဝႃႈၼႆ။

သိုၵ်းမၢၼ်ႈ တၢင်းမိူင်းတူၼ်ၼႆႉ ယၢမ်ႈသွၵ်ႈတီႉၺွပ်းၵူတ်ႇထတ်း ၽူႈၶဝ်ႈၸုမ်းပႃႇတီႇၼူၵ်ႉယုင်း မႃးလၢႆပွၵ်ႈယဝ်ႉ မိူဝ်ႈဝၼ်းတီႈ 13/06/2022 ပူၼ်ႉမႃးၼၼ်ႉ ၼႄးဝႃႈပဵၼ်ၵူၼ်းၸွႆႈထႅမ် ၸုမ်း PDF ၼႆသေ တီႉၵႂႃႇၵေႃႉပဵၼ်ပေႃႈ ၽူႈတႅၼ်းၵဝ်ႇလႄႈ လုၵ်ႈယိင်းဢၼ်ႁဵတ်း CDM ဝႆႉၼၼ်ႉ။

ထိုင်မႃးထႅင်ႈ ၼႂ်းဝၼ်းတီႈ 14/06/2022 ၼၼ်ႉ ပလိၵ်ႈသိုၵ်းမၢၼ်ႈ ၶိုၼ်းၵႂႃႇၸွမ်းသွၵ်ႈလမ်းတီႉ ၵူၼ်းၸိူဝ်းပႃးၼႂ်းသဵၼ်ႈၸိုဝ်ႈ ၼႂ်းၾူၼ်း မေႃသွၼ်  CDM ၼၼ်ႉ လႆႈၵႂႃႇထႅင်ႈ 5 ၵေႃႉ။ ႁူမ်ႈတင်းမူတ်း ၺႃးၵုမ်းၶင် 7 ၵေႃႉ။ လွတ်ႈ ဢွၵ်ႇမႃးၵေႃႉၼိုင်ႈသေ ယၢမ်းလဵဝ် ၵိုတ်းဝႆႉ 6 ၵေႃႉ။

ၵူၼ်းမိူင်းတူၼ် ဢၼ်ၺႃးတီႉၺွပ်းဝႆႉ 6 ၵေႃႉၼႆႉ ဢွၼ်တၢင်းသိုၵ်းမၢၼ်ႈလၢတ်ႈဝႃႈ ပၼ်တူတ်ႈတၢမ်ႇ တႃႇ 20 ပီၼႆသေ ယၢမ်းလဵဝ် ၵူၼ်းပိုၼ်ႉတီႈငိၼ်းဝႃႈ သိုၵ်းမၢၼ်ႈ လူတ်းပၼ်တူတ်ႈတၢမ်ႇသေ တေတူၵ်းၶွၵ်ႈ 15 ပီ။ ၼႂ်းၵူၼ်းတူၵ်းၶွၵ်ႈၵၢၼ်မိူင်း ၸိူဝ်းၼႆႉ ပႃးဝႆႉၵူၼ်းၼုမ်ႇယိင်း ဢမ်ႇယွမ်း 2 ၵေႃႉ ဝႃႈၼႆ။