သိုၵ်းမၢၼ်ႈ လူင်းၵဵပ်းသဵၼ်ႈမၢႆၶႅၵ်ႇ ၼႂ်းဢိူင်ႇၼႂ်းဝၢၼ်ႈ ၼႂ်းၸႄႈဝဵင်းမိူင်းတူၼ် ၸိုင်ႈတႆးပွတ်းဢွၵ်ႇ ၵူၼ်းၼုမ်ႇပိုၼ်ႉတီႈ ၵူဝ်ပဵၼ်သိုၵ်းမၢၼ်ႈ လူင်းၵဵပ်းသိုၵ်းၼႆသေ ဢွၼ်ၵၼ်ငိူင်ႉပၢႆႈ။
ဝၢႆးလင် ၵိုတ်းလွင်ႈၵဵပ်းငိုၼ်းၵဵပ်းသိုၵ်းၵႂႃႇမွၵ်ႈ 3 လိူၼ်ယဝ်ႉသေ ထိုင်မႃးၼႂ်းၵၢင်လိူၼ်မေႊၼႆႉ မီးၶၢဝ်ႇဝႃႈ သိုၵ်းမၢၼ်ႈ ၶိုၼ်းၵဵပ်းၵူၼ်းမႂ်ႇထႅင်ႈၼႆလႄႈ ၽွင်းသိုၵ်းမၢၼ်ႈ လူင်းထတ်းသဵၼ်ႈသၢႆမၢႆၶႅၵ်ႇ ၵူၼ်းမိူင်း တူၼ်ဢွၼ်ၵၼ်တူၵ်းၸႂ်။
ၵူၼ်းၸၢႆး ၵေႃႉၼိုင်ႉ ယူႇဝဵင်းမိူင်းတူၼ် လၢတ်ႈၽူႈတွႆႇႁွၵ်ႈဝႃႈ -“ ဢၼ်ဢမ်ႇၵဵပ်းၵူၼ်းၵႂႃႇႁၢပ်ႇၵၢၼ် သိုၵ်းၼႆႉမီးၸမ် 3 လိူၼ်ယဝ်ႉ။ တေႃႈလဵဝ် ၸင်ႇၵိုင်ႉၵၢင်ႉ မႃးဝႃႈထတ်းသဵၼ်ႈမၢႆၶႅၵ်ႇၼႆသေ ၶဝ်ႈထိုင်ၼႂ်း ႁိူၼ်းၼႂ်းယေး။ ၵူၼ်းပိုၼ်ႉတီႈမႆႈၸႂ် ဢွၼ်ၵၼ်ငိူင်ႉပၢႆႈဝႆႉ”- ဝႃႈၼႆ။
မိူဝ်ႈဝၼ်းတီႈ 13/05/2025 သိုၵ်းမၢၼ်ႈ ၵိုင်ႉၵၢင်ႉၶဝ်ႈၵူတ်ႇထတ်းသဵၼ်ႈမၢႆၶႅၵ်ႇ ၼႂ်းပွၵ်ႉဝၢၼ်ႈမႂ်ႇလႄႈ မဵဝ်ႉမ၊ ယွၼ်းတူၺ်းသဵၼ်ႈမၢႆႁူဝ်ႁိူၼ်းပႃး။ ၵူၼ်းၸိူဝ်းမီးလုၵ်ႈၸၢႆးမၢဝ်ႇ သႅၼ်းပၢၼ်ႁၢပ်ႇၵၢၼ်သိုၵ်း ၼၼ်ႉၵေႃႈ ဢွၼ်ၵၼ်မႆႈၸႂ်။ သိုၵ်းမၢၼ်ႈၼႆႉ ယင်းပၢႆပႂ်ႉၵူတ်ႇထတ်းၵူၼ်းမိူင်း ၸိူဝ်းၵႂႃႇမႃးၸွမ်းတႃႈ ၸွမ်းတၢင်းထႅင်ႈ ၼွၵ်ႈဝဵင်းၼႂ်းဝဵင်းမိူင်းတူၼ်။
ၵူၼ်းၸၢႆး ပိုၼ်ႉတီႈ လၢတ်ႈၽူႈတွႆႇႁွၵ်ႈဝႃႈ -“ႁိူၼ်းဢၼ်ၶဝ်ၶဝ်ႈၵႂႃႇၸႅတ်ႈၼၼ်ႉ ပဵၼ်ႁိူၼ်းၵူၼ်းၼုမ်ႇ ဢၼ်ပႃးသဵၼ်ႈမၢႆ တႃႇႁၢပ်ႇၵၢၼ်သိုၵ်းဝႆႉ၊ လႆႈငိၼ်းဝႃႈ ပႃးၵႂႃႇသွင်ၵေႃႉ၊ ၵူၼ်းပႃးၵႂႃႇၾိုၵ်းၵၢၼ် သိုၵ်း ဢွၼ်တၢင်းၸိူဝ်းၼၼ်ႉၵေႃႈ ၽႂ်ဢမ်ႇႁၼ်ပွၵ်ႈမႃးႁိူၼ်းၶိုၼ်းလႄႈ ပိူၼ်ႈၵေႃႈဢွၼ်ၵၼ်ၵူဝ် ၽႂ်ၵေႃႈ ဢမ်ႇႁတ်းၵႂႃႇယွၼ်ႉၼၼ်ဢွၼ်ၵၼ်ပၢႆႈ”- ဝႃႈ ၼႆ။
ဢၼ်သိုၵ်းမၢၼ်ႈ လူင်းၵူတ်ႇထတ်းသဵၼ်ႈမၢႆၶႅၵ်ႇသေ တီႉၵႂႃႇပႃးၼၼ်ႉ ပဵၼ်ၸၢႆးၼုမ်ႇ 2 ၵေႃႉ ဢႃယု 20 ပၢႆ ပဵၼ်ၵူၼ်းပွၵ်ႉဝၢၼ်ႈမႂ်ႇ လႆႈႁူႉၼင်ႇၼႆ။
ဢွၼ်တၢင်း သိုၵ်းမၢၼ်ႈ တဵၵ်းႁႂ်ႈၵၢင်ႉၵႄႇၶဝ် လူင်းၵဵပ်းငိုၼ်းၵူၼ်းမိူင်း တႃႇၸၢင်ႈၵူၼ်းႁဵတ်း သိုၵ်းၼိုင်ႈ ႁိူၼ်းလႂ် ဢမ်ႇယွမ်း 3 မိုၼ်ႇပျႃး။ ၸၢင်ႈၵူၼ်းၵႂႃႇတႅၼ်းၼိုင်ႈၵေႃႉလႂ် လႆႈပၼ်ဢမ်ႇယွမ်း 60 သႅၼ်ပျႃး။
တီႈၼႂ်းဝဵင်းမိူင်းတူၼ်ၼႆႉ မီးပွၵ်ႉယႂ်ႇ 3 ပွၵ်ႉ ပဵၼ်ပွၵ်ႉၼွင်ပႃယဵၼ်ႇ ၊ ပွၵ်ႉမဵဝ်ႉမ ၊ ပွၵ်ႉဝၢၼ်ႈမႂ်ႇ သိုၵ်းမၢၼ်ႈ တဵၵ်းၸႂ်ႉၵဵပ်းငိုၼ်းၵဵပ်းသိုၵ်း ၸိူင်ႉၼႆ ဢမ်ႇယွမ်း 8 ပွၵ်ႈယဝ်ႉ ၊ ၼိုင်ႈပွၵ်ႈၼႆႉ လႆႈပၼ်ၵူၼ်းသိုၵ်း ၼိုင်ႈ ဝၢၼ်ႈၼိုင်ႈပွၵ်ႉ 2-3 ၵေႃႉ ဝႃႈၼႆ။
ဝၢႆးသေ သိုၵ်းမၢၼ်ႈဢွၵ်ႇပိူင်ၵဵပ်းသိုၵ်းသေ လူင်းမိုဝ်းႁဵတ်းတႄႉ ယဝ်ႉၼၼ်ႉ ၵူၼ်းၼုမ်ႇ တၢင်းထုင်ႉ မိူင်းတူၼ်ၼႆႉ ဢွၼ်ၵၼ်ပၢႆႈၶဝ်ႈမိူင်းထႆးၼမ်။ ၵမ်ႈၼမ် ဢမ်ႇမီးငိုၼ်းၵဵပ်းလႄႈ လႆႈၶၢႆၶူဝ်းသူၼ်ၶူဝ်းႁႆႈ မိူၼ်ၼင်ႇ ၶဝ်ႈသၢၼ်၊ ၽၵ်းမီႇ သေပၢႆႈ ပဵၼ်ဢၼ်ၵိၼ်းၸႂ်တႄႉတႄႉ – ၵူၼ်းပိုၼ်ႉတီႈလၢတ်ႈ။
ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ လၢတ်ႈၼႂ်းပၢင်ၵုမ်မိူဝ်ႈဝၼ်းတီႈ 15-16 ၼၼ်ႉလၢတ်ႈဝႃႈ ၼႃႈ လိၼ် ဢၼ်ၶဝ်သုမ်းပၼ်သိုၵ်းၸၢဝ်းၶိူဝ်းၸိူဝ်းၼၼ်ႉ တေဢဝ်ၶိုၼ်းႁႂ်ႈလႆႈၼႂ်းၶၢဝ်းတၢင်း 6 လိူၼ်။ တေ ၸႂ်ႉႁႅင်းသိုၵ်း ၵူၼ်းသိုၵ်းမႂ်ႇ ဢၼ်ၾိုၵ်းဝႆႉပၼ်ၵၢၼ်သိုၵ်း ၸိူဝ်းၼၼ်ႉ။ တေႁႂ်ႈၽူႈၼမ်းသိုၵ်းၼႂ်းတပ်ႉ သိုၵ်းမၢၼ်ႈ ဢွၼ်ႁူဝ်ၼမ်းၼႃႈၶဝ်သေ ပိုတ်းယိုဝ်းသိုၵ်းလုၵ်ႉၽိုၼ်ႉၸိူဝ်းၼႆႉ ဝႃႈၼႆပႃး။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ